ރޭޕާއި ދެކޮޅަށް މާދަމާ މުޒާހަރާއަށް ނިކުންނަނީ
28 ޖޫން 2020 | އާދީއްތަ 15:46މުޒާހަރާ އޮންނާނީ ޖެންޑަރ މިނިސްޓްރީ ކުރިމަތީގައި
ރޭޕާއި ދެކޮޅަށް މާލޭގައި ކުރި އިހްތިޖާޖެއްގެ ތެރެއިން
ރޭޕާއި ދެކޮޅަށް އަޑު އުފުލުމުގެ ގޮތުން ހޯމަ ދުވަހު ޖެންޑަރ މިނިސްޓްރީ ބޭރުގައި މުޒާހަރާ ކުރަން ނިންމައިފިއެވެ.
މުޒާހަރާ ރާވަނީ ރަޖިސްޓަރީ ކުރުމުގެ މަރުހަލާގައި އޮތް އަމިއްލަ ޖަމިއްޔާ އެއް ކަމަށްވާ ވޮއިސް އޮފް ޗިލްޑްރެންސް ޖަމިއްޔާއިންނެވެ. ހޯމަ ދުވަހު ބާއްވާ މި ހަރަކާތް ފަށާނީ ހަވީރު ހަތަރެއް ޖަހާއިރު ޖެންޑަރ މިނިސްޓްރީ ބޭރުގައެވެ.
މުޒާހަރާއަށް ދާ އެންމެން ވެސް މާސްކު އަޅައިގެން ގައިދުރުކަމަށް އިސްކަން ދިނުމަށް ވޮއިސް އޮފް ޗިލްޑްރެންއިން ވަނީ އިލްތިމާސްކޮށްފައެވެެ.
މި މުޒާހަރާގެ މައިގަނޑު މަގްސަދަކީ ރޭޕާއި ދެކޮޅަށް އަޑު އުފުލާއި އެކަންތައް ކުރާ މީހުންނަށް އަދަބު ދިނުމަށް ބާރުއެޅުމެވެ. ރޭޕާއި ދެކޮޅަށް މުޒާހަރާއެއް ރާވާފައި މިވަނީ ހުޅުމާލޭ ފަޅުތެރޭގައި އަޅަފައިވާ އޮތް ސަފާރީއެއްގައި ހުރި ބިދޭސީ އަންހެނަކު ރޭޕްކުރި މައްސަލާގައި އެކަން ކުރި މީހުން ދޫކޮށްލާފައި ވަނިކޮށެވެ.
އެ ބިދޭސީ އަންހެން މީހާ ރޭޕްކުރި ކަމުގެ ތުހުމަތުގައި ހިމެނޭ މީހުން ފުލުހުން ދޫކޮށްލުމާއި ގުޅިގެން ފުލުހުންނަށާއި ސަރުކާރަށް ފާޑުކިޔުން ވަނީ އިންތިހާއަށް ގިނަވެފައެވެ. އެ މީހުންނަށް ހައްގު އަދަބު ދޭން އެކި ފަރާތްތަކުން ދަނީ ގޮވާލަމުންދާއިރު، އަދި އެ މައްސަލަ ހިއުމަން ރައިޓްސް ކޮމިޝަން (އެޗްއާރްސީއެމް) އަދި ރައްޔިތުންގެ މަޖިލީހުގެ ކޮމިޓީން ވެސް ބަލާނެ ކަމަށް ވަނީ ބުނެފައެވެ.
ރޭޕްގެ މައްސަލަ ތަކުގައި ހައްޔަރު ކުރާ މީހުންނަށް އެންމެ އެކަށީގެންވާ އަދަބު ނުލިބުމަކީ ގިނަ ބައެއްގެ ހުރި ކަންބޮޑުވުމެކެވެ. ދޭތެރޭ ދޭތެރެއިން މައްސަލަތައް ހޫނުވެ ރައްޔިތުން ރުޅިގަދަވާ ހިސާބަށް ދިޔުމުން ފިޔަވަޅު އެޅުމަށް ފަހު އަނެއްކާ ވެސް، އެކަމަށް މާ ބޮޑު ސަމާލުކަމެއް އެއްވެސް މުއައްސަސާއަކުން ދޭ ތަނެއް ނުފެންނަ ކަމަށް ބުނެ ރައްޔިތުންނާއި ކަމާބެހޭ ޖަމިއްޔާތަކުން އަންނަނީ ކަންބޮޑުވުން ފާޅުކުރަމުންނެވެ.
