އިނގިރޭސި ޕްރިމިއާ ލީގުގެ ޗެމްޕިއަންކަން ހޯދި ލިވަޕޫލަށް ގާޑް އޮފް އޮނާ ދިނުމަށް މެންޗެސްޓާ ސިޓީން ނިންމައިފިއެވެ.

ބާކީ ހަތް މެޗު އޮއްވައި ލިވަޕޫލުން މި ސީޒަނުގެ ޕްރިމިއާ ލީގުގެ ޗެމްޕިއަންކަން ކަށަވަރުކުރިއިރު، މިއީ އެޓީމުން 1989-1990 ގެ ސީޒަނުގެ ފަހުން އިނގިރޭސި ޗެމްޕިއަންކަން ހޯދި ފުރަތަމަ ފަހަރެވެ. އަދި އެ ޓީމުން އިނގިރޭސި ޗެމްޕިއަންކަން ހޯދި ޖުމްލަ 19 ވަނަ ފަހަރެވެ. އެކަމަކު މިއީ 1992 ވަނަ އަހަރު އިނގިރޭސި ފުރަތަމަ ޑިވިޝަން، ޕްރިމިއާ ލީގަށް ރިބްރޭންޑްކުރި ފަހުން އެ ޓީމުން ޗެމްޕިއަންކަން ހޯދި ފުރަތަމަ ފަހަރެވެ.

ލީގު ޗެމްޕިއަންކަން ލިވަޕޫލުން ކަށަވަރުކުރިއިރު، އެޓީމު އެއްވަނައިގައި އޮތީ 23 ޕޮއިންޓުގެ ލީޑަކާއެކުއެވެ. ލިވަޕޫލަށް 31 މެޗުން 86 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 31 މެޗުން ލިބިފައިވަނީ 63 ޕޮއިންޓެވެ.

ފާއިތުވި ދެ އަހަރު ޕްރިމިއާ ލީގު އުފުލާލިސިޓީގެ ކޯޗު ޕެޕް ގާޑިއޯލާ ބުނީ އަންނަ ބުރާސްފަތި ދުވަހު ސިޓީ އާއި ލިވަޕޫލް ބައްދަލުކުރާ މެޗުގައި ލިވަޕޫލަށް މަރުހަބާ ކިޔުމުގެ ގޮތުން ގާޑް އޮފް އޮނާ ދިނުމަށް ނިންމާފައިވާ ކަމަށާއި ލިވަޕޫލަށް އެކަން ހައްގު ކަމަށެވެ. އަދި އޭނާ ވަނީ ލިވަޕޫލް ހޯދި ކާމިޔާބީއަށް މަރުހަބާ ކިޔާފައެވެ.

ސިޓީއަށް މިފަހަރު ލީގު ކާމިޔާބު ނުކުރެވުނަސް މި ސީޒަނުގައި އަދި ޔުއެފާ ޗެމްޕިއަންސް ލީގާއި އެފްއޭ ކަޕް ކާމިޔާބުކުރުމުގެ ފުރުސަތު އަދި އެބައޮތެވެ.

ޕްރިމިއާ ލީގުގައި ސިޓީ އާއި ލިވަޕޫލް ބައްދަލުކުރާ މެޗު ކުޅުމަށް ތާވަލުކޮށްފައިވަނީ އަންނަ ބުރާސްފަތި ދުވަހުގެރޭއެވެ. ސިޓީގެ އިއްތިހާދު ސްޓޭޑިއަމްގައި ކުޅޭ މެޗު ފަށާނީ އެރޭ ދަންވަރު ރާއްޖެ ގަޑިން 12:15 ގައެވެ.