ބުރާސްފަތި 09 ޖުލައި 2020
09 ފުނޯސް
1441 ޒުލްގައިދާ 18
ފަތިސް 04:41
އިރުއަރާ 05:59
މެންދުރު 12:15
އަސްރު 15:38
އިރުއޮއްސޭ 18:23
އިޝާ 19:41
ސްޕެނިޝް ލީގު

ސެލްޓައާ އެއްވަރުވެ ބާސާއަށް ފުރުސަތު ހަނިވެއްޖެ

  • ސެލްޓަ އާއި ބާސާ އެއްވަރުވީ 2-2 ން
  • ބާސާއަށް މިހާރު ވަނީ ލީގު ތަށި ދިފާއުކުރުމުގެ ފުރުސަތު ހަނިވެފައި

ކ. މާލެ | 28 ޖޫން 2020 | އާދީއްތަ 00:10 | 1,961

ސެލްޓަ އާއި ބާސާ ބައްދަލުކުރި މެޗުގެ ތެރެއިން: މި މެޗު ނިމުނީ 2-2 ން ދެޓީމު އެއްވަރުވެގެން - ގެޓީ އިމޭޖާސް

ސެލްޓަ ވީގޯއާ އެއްވަރުވެ، ސްޕެނިޝް ލީގު ދިފާއުކުރުމުގެ ފުރުސަތު އެންމެ ފަހުގެ ޗެމްޕިއަން ބާސެލޯނާއަށް ހަނިވެއްޖެއެވެ.

ސެލްޓަގެ ދަނޑުގައި ހޮނިހިރު ދުވަހުގެރޭ ކުޅުނު މެޗު އެއްވަރުވީ 2-2 ންނެވެ.

މި ނަތީޖާއާއެކު ބާސާ އެއްވަނައިގައި އޮތީ 32 މެޗުން 69 ޕޮއިންޓާއެކުއެވެ. ދެވަނައިގައި 31 މެޗުން 68 ޕޮއިންޓާއެކު އޮތީ ރެއާލް މެޑްރިޑެވެ. ހެޑް ޓު ހެޑް އުސޫލުން ރެއާލަށް ފައިދާވާން އޮތުމާއެކު، ބާސާއަށް މިހާރު ވަނީ ލީގު ތަށި ދިފާއުކުރުމުގެ ފުރުސަތު ހަނިވެފައެވެ.

ސެލްޓަގެ ދަނޑުގައި ހޮނިހިރު ދުވަހުގެރޭ ކުޅުނު މެޗު ފެށުމުގެ ކުރިން ވަނީ ރާއްޖެ އިސްތިހާރު ކުރުމުގެ ހަރަކާތެއް ކުރިއަށް ގެންގޮސްފައެވެ.

މި މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ ބާސާއިންނެވެ. މެޗުގެ 20 ވަނަ މިނެޓުގައި ކެޕްޓަން ލިއޮނެލް މެސީ ހުރަސް ކޮސްދިން ބޯޅައަކުން މި ލަނޑު ކާމިޔާބުކޮށްދިނީ ލުއިސް ސުއަރޭޒެވެ. އެކަމަކު ދެވަނަ ހާފުގައި ސެލްޓައިން ކުޅުން ރަނގަޅުކުރިއިރު، މި ހާފު ފަށައިގެން ފަސްވަނަ މިނެޓްގައި ފެޑޯ ސްމޮލޯވް ވަނީ ސެލްޓައަށް ނަތީޖާ އެއްވަރުކޮށްދީފައެވެ.

ސެލްޓައިން ނަތީޖާ އެއްވަރުކުރި ނަމަވެސް، މެސީގެ އެހީއާއެކު ސުއަރޭޒް ވަނީ މެޗުގެ 67 ވަނަ މިނެޓުގައި ބާސާއަށް އަލުން ލީޑު ނަގައިދީފައެވެ. މި މެޗުން ސެލްޓައަށް ޕޮއިންޓެއް ކަށަވަރުކޮށްދިން ލަނޑު މެޗު ނިމެން ދެ މިނެޓަށް ވެފައި ވަނިކޮށް ސެލްޓައަށް ކާމިޔާބުކޮށްދިނީ ކެޕްޓަން އިއާގޯ އަސްޕާސްއެވެ.

ސެލްޓައާ އެއްވަރުވެ ބާސާއަށް ފުރުސަތު ހަނިވިއިރު، ލީގުގައި އާދީއްތަ ދުވަހުގެރޭ އެސްޕަންޔޯލް ބަލިކޮށް ރެއާލަށް އަލުން އެއްވަނައަށް އެރުމުގެ ފުރުސަތު އެބައޮތެވެ. މި މެޗު ފަށާނީ ރާއްޖެ ގަޑިން އާދީއްތަ ދުވަހުގެރޭ ދަންވަރު 1:00 ގައެވެ.

އެންމެ ފަހުން އަޕްޑޭޓް ކުރީ: 2 ހަފްތާ ކުރިން | ރިވިއު ކުރީ: އަބުދުﷲ ނަސީރު އިބްރާހިމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.