ޓްރީޓޮޕް ވެންޓިލޭޓަރުގައި އޮތް 3 މީހަކު ދަރުމަވަންތަ ހޮސްޕިޓަލަށް ބަދަލުކުރަނީ
27 ޖޫން 2020 | ހޮނިހިރު 22:00މެއި މަހުގެ 6 ވަނަ ދުވަހުން ފެށިގެން ޓްރީޓޮޕް ނެޝަނަލް ކޮވިޑް ޓްރީޓްމަންޓް ސެންޓަރަކަށް ބަދަލުކުރި
ޓްރީޓޮޕް ހޮސްޕިޓަލް - އަންނަ ޖުލައި މަހުގެ 1 ވަނަ ދުވަހުން ފެށިގެން ހޮސްޕިޓަލް އާންމު ޙާލަތަށް ބަދަލުކުރާނެ
ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ތެރެއިން ޓްރީޓޮޕް ހޮސްޕިޓަލުގެ ވެންޓިލޭޓަރުގައި 3 މީހަކު އެބައޮތް ކަމަށް ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)އިން ބުނެފިއެވެ.
ހޮނިހިރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ރާއްޖެއިން ކޮވިޑް-19 އަށް ޕޮޒިޓިވްވި މީހުންގެ ތެރެއިން 3 މީހަކަށް ޓްރީޓޮޕް ހޮސްޕިޓަލުގެ ވެންޓިލޭޓަރުގައި ފަރުވާދެމުންދާ ކަމަށެވެ. މަބްރޫކު ވިދާޅުވީ، އެ 3 މީހުންވެސް ދަރުމަވަންތަ ހޮސްޕިޓަލަށް ބަދަލު ކުރުމަށް ނިންމާފައިވާ ކަމަށެވެ.
ޓްރީޓޮޕް ހޮސްޕިޓަލުގައި ތިބި ބަލި މީހުން ދަރުމަވަންތަ ހޮސްޕިޓަލަށް ބަދަލުކުރުމަށް ނިންމާފައިވާއިރު، އަންނަ ޖުލައި މަހުގެ 1 ވަނަ ދުވަހުން ފެށިގެން އެ ހޮސްޕިޓަލަށް އާންމު ޙާލަތަށް ބަދަލުކޮށް، ކުރިޔެކޭ އެއްފަދައިން ހޮސްޕިޓަލުގެ ހުރިހާ ޚިދުމަތެއް ލިބޭ ގޮތަށް ހުޅުވާލުމަށް ވަނީ ނިންމާފައެވެ.
ކޮވިޑް-19 ހަލުވިކަމާއެކު ފެތުރެމުން ދިޔަ ދުވަސްވަރު، ސަރުކާރުން ކުރި މަސައްކަތްތަކަށް އެހީތެރިވުމަށް މެއި މަހުގެ 6 ވަނަ ދުވަހުން ފެށިގެން ޓްރީޓޮޕް ނެޝަނަލް ކޮވިޑް ޓްރީޓްމަންޓް ސެންޓަރަކަށް ބަދަލުކުރިއެވެ.
