ލެއްޗޭ ފަސޭހަކަމާއެކު ބަލިކޮށް ޔުވެންޓަސްއިން އިޓާލިއަން ލީގުގެ އެއްވަނައިގައި ހަތް ޕޮއިންޓުގެ ލީޑެއް ނަގައިފިއެވެ.

ޔުވެންޓަސްގެ ދަނޑުގައި ހުކުރު ދުވަހުގެރޭ ކުޅުނު މެޗު އެޓީމުން ކާމިޔާބުކުރީ 4-0 ގެ ތަފާތު ބޮޑު ނަތީޖާއަކުންނެވެ.

މެޗު ފަށައިގެން ޔުވެންޓަސްއިން ލެއްޗޭގެ ހާފަށް ބާރު ބޮޑުކުރިއިރު، އެޓީމުން ވަނީ ފުލުފުލުގައި ލެއްޗޭގެ ގޯލާ އަމާޒުކޮށް ހަމަލާތައް ފޮނުވައިލާފައެވެ. އެގޮތުން ޔުވެންޓަސްގެ އެންމެ ކުރިއަށް ކުޅޭ ދެ ކުޅުންތެރިން ކަމަށްވާ ޕައުލޯ ޑިބާލާ އާއި ކްރިސްޓިއާނޯ ރޮނާލްޑޯގެ ހަމަލާތައް ހިމެނެވެ. މި ހަމަލާތައް ލެއްޗޭގެ ގޯލްކީޕަރު ވަނީ ހުޝިޔާރުކަމާއެކު ދިފާއުކޮށްފައެވެ.

މެޗުގެ ދެވަނަ ހާފު ފަށައިގެން ޔުވެންޓަސްއިން އެޓީމުގެ އެޓޭކުތައް އިތުރަށް ވަރުގަދަ ކުރިއިރު، މެޗުގެ 53 ވަނަ މިނެޓުގައި ޔުވެންޓަސްއިން ވަނީ ލީޑު ނަގާފައެވެ. މި ލަނޑު އެޓީމަށް ކާމިޔާބުކޮށްދިނީ ރޮނާލްޑޯގެ އެހީތެރިކަމާއެކު ޑިބާލާ އެވެ.

މި ލަނޑަށް ފަހުވެސް ޔުވެންޓަސްއިން ވަނީ ފުލުފުލުގައި ލެއްޗޭގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 62 ވަނަ މިނެޓުގައި ލިބުނު ޕެނަލްޓީ ކާމިޔާބުކޮށް ރޮނާލްޑޯ ވަނީ ޔުވެންޓަސްއަށް ލީޑު ފުޅާކޮށްދީފައެވެ. މެޗުގައި ޔުވެންޓަސް އިން ކާމިޔާބުކުރި އަނެއް ދެ ލަނޑު އެޓީމަށް ކާމިޔާބުކޮށްދިނީ ގޮންޒާލޯ ހިގުއައިން އާއި މަތިއަސް ޑި ލީޓެވެ.

މިނަތީޖާ އާއެކު ޔުވެންޓަސްއިން ލީގު ތާވަލުގެ އެއްވަނައިގައި އޮތީ ކުޅުނު 27 މެޗުން ލިބުނު 69 ޕޮއިންޓާއެކުގައެވެ. ދެވަނައިގައި އޮތް ލާޒިއޯއަށް 27 މެޗުން 62 ޕޮއިންޓު ލިބިފައިވާއިރު، ތިންވަނައިގައި އިންޓަ މިލާން އޮތީ ކުޅުނު 27 މެޗުން ލިބުނު 58 ޕޮއިންޓާ އެކުގައެވެ.