މޫދަށް ވެއްޓިގެން ގެއްލުނު މީހަކު ހޯދަމުންދާ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) ން ބުނެފިއެވެ.
އެމްއެންޑީއެފުން ބުނީ ތިލަފުށީ އުތުރުގައި އަޅާފައި އޮތް "ގޭސް އެޓްލާންޓިކް" ބޯޓުން ބިދޭސީއަކު މޫދަށް ވެއްޓި ގެއްލުމާ ގުޅިގެން އޭނާ ހޯދުމަށް އެމްއެންޑީއެފް މާލެ އޭރިއާ ސީޖީ ސްކުއާޑްރަނުން ހަރަކާތްތެރިވާން ފަށާފައިވާ ކަމަށެވެ.
އެމްއެންޑީއެފުން ބުނީ ބޯޓުން ދެ ބިދޭސީއެއް މޫދަށް ވެއްޓުނު ކަމަށާއި އެތަނުން އެކަކު އެސަރަހައްދުން މަސްވެރިކަން ކުރަން އުޅުނު ޑިންގީ އަކަށް ފެނިގެން ނަގާފައިވާ ކަމަށެވެ. އަދި މިހާރު އެމީހާ ވިލިމާލެ ހޮސްޕިޓަލަށް ގެންގޮސްފައިވާ ކަމަށްވެސް ވަނީ ބުނެފައެވެ.
މީގެ ތެރެއިން ދެވަނަ މީހާ ހޯދުމަށް އެމްއެންޑީއެފްގެ ކޯސްޓްގާޑުގެ ޑައިވަރުން ދަނީ ހަރަކާތްތެރިވަމުން ކަމަށް ވަނީ ބުނެފައެވެ.
މި ހާދިސާގެ މައުލޫމާތު ސީޖީ އެމްއާރުސީސީއަށް ލިބިފައިވަނީ ހުކުރު ދުވަހުގެރޭ 22:20 ހާއިރުއެވެ.
