ތިން އަހަރުގެ މެދުކެނޑުމަކަށްފަހު މަސްތުވާތަކެތީގެ ވަބާގައި ޖެހިފައިވާ މީހުނަށްދޭ ފަރުވާ އަލުން ފަށަނީ
ރާއްޖޭގައި އަލުން ފެށުމަށް ހަމަޖެހިފައިވަނީ މެތަޑޯން މެއިންޓެނަންސް ތެރަޕީ
މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އައިޝަތު މުހައްމަދު ދީދީ މރައްޔިތުންގެ މަޖިލީހުގެ ކޮމިޓީއެއްގައި ބައިވެރިވެ ވަޑައިގަންނަވަނީ
މަސްތުވާތެކެތީގެ ވަބާގައި ޖެހިފައިވާ މީހުންނަށް ދޭ ފަރުވާއެއް ކަމަށްވާ މެތަޑޯން މެއިންޓެނަންސް ތެރަޕީ އަނެއްކާވެސް ރާއްޖޭގައި ދޭން ފެށުމަށް ތައްޔާރު ވަމުންދާ ކަމަށް މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް އައިޝަތު މުހައްމަދު ދީދީ ވިދާޅުވެއްޖެއެވެ.
މަސްތުވާތަކެއްޗާއި ދެކޮޅަށް މަސައްކަތް ކުރާ ބައިނަލްއަގުވާމީ ދުވަހުގެ މުނާސަބަތުގައި ޖެންޑަރ މިނިސްޓަރ ފޮނުއްވި މެސެޖުގައި ވިދާޅުވެފައިވަނީ މަސްތުވާތަކެތީގެ ނުރައްކަލުގައި ޖެހިފައިވާ މީހުނަށް ފަރުވާ ދިނުމުގައި ބޭނުންކުރާ މެތަޑޯން މެއިންޓެނަންސް ތެރަޕީއަކީ ދުނިޔޭގެ ގިނަ ގައުމުތަކުގައި ކާމިޔާބުކަމާއެކު ކުރިއަށް ގެންދާ ޕްރޮގްރާމެއް ކަމަށެވެ.
މީގެ ކުރިން ރާއްޖޭގައިވެސް މި ޕްރޮގްރާމު ކުރިއަށްގެންދިޔަ ނަމަވެސް، ތަފާތު ސަބަބުތަކާ ހެދި ޕްރޮގްރާމު ވަނީ މީގެ 3 އަހަރު ދުވަސް ކުރިން ހުއްޓާލާފައެވެ. އެހެންނަމަވެސް އިންޑިއާ ސަރުކާރުގެ އެހީގައި އިންޑިއާގެ އޯލް އިންޑިއާ މެޑިކަލް ސައިންސަސް (އެއިމްސް) ގެ ފަންނީ އެހީތެރިކަމާއެކު މެތަޑޯން މެއިންޓެނަންސް ތެރަޕީ ރާއްޖޭގައި ފެށުމުގެ މަޝްވަރާތަކެއް ކުރެވި، މިފަރުވާއަށް ބޭނުންވާ ބޭސް ރާއްޖޭން ބޭރުން ގެނެސް، ސެޕްޓެމްބަރު މަހު ފަރުވާގެ މަސައްކަތް ފެށުމަށް މަސައްކަތް ކުރެވެމުންދާ ކަމަށް ވިދާޅުވިއެވެ.
އަދި މަސްތުވާތަކެއްޗާ ބެހޭ ޤާނޫނު ލާޒިމުކުރާ ޑްރަގް އޮފެންޑަރ ރިމާންޑް ސެންޓަރު މިއަހަރު ގާއިމުކުރެވި، އެ ސެންޓަރުން މަސްތުވާތަކެތި ބޭނުންކުރާ މީހުންގެ ތެރެއިން ބަންދުގައި ތިބޭ މީހުނަށް ބޭނުންވާ އަސާސީ ފަރުވާ ލިބިގެންދާނެ ކަމަށްވެސް މިނިސްޓަރު ވިދާޅުވިއެވެ.
މިނިސްޓަރުގެ މެސެޖުގައި އިތުރަށް ވިދާޅުވީ މަސްތުވާތަކެއްޗަކީ ދިވެހިރާއްޖެއަށާއި، މުޅި ދުނިޔެއަށް ކުރިމަތިވެފައިވާ އެންމެ ބޮޑު އެއް ނުރައްކާ ކަމަށާއި ދިވެހިރާއްޖޭގައި މަސްތުވާތަކެތި ޓްރެފިކު ކުރުން ހުއްޓުވުމާއި، މަސްތުވާތަކެތި ބޭނުން ކުރުން ހުއްޓުވުމާއި، މަސްތުވާތަކެތި ބޭނުންކުރާ މީހުނަށް ފަރުވާދިނުމުގެ މަސައްކަތް ކުރެވެމުން އަންނައިރު، މި މަސައްކަތަކީ އަބަދު ތަރައްގީވެ، އައު ހޯދުންތަކާއި "އެވިޑެންސް ބޭސްޑް އެޕްރޯޗް" ބޭނުންކުރަމުން ގެންދަން ޖެހޭ މަސައްކަތެއް ކަމަށެވެ. އަދި މަސްތުވާތަކެއްޗާ ދެކޮޅަށް މަސައްކަތް ކުރުމަކީ ހަމައެކަނި އެއިރެއްގައި އޮންނަ ސަރުކާރަކުން ކުރައްވާ ކަމެއްގެ ގޮތުގައި އޮތުމުގެ ބަދަލުގައި އާންމު ފަރުދުންނާއި މުޅި މުޖުތަމަޢު ބައިވެރިވާން ޖެހޭ ކަމެއް ކަމަށެވެ.
މަސްތުވާތަކެތީގެ ވިޔަފާރި ކުރާ މީހުންގެ ސަބަބުން ޒުވާން ޖީލަށް ނުރައްކާ ވަމުންދާއިރު، މިކަމުގައި އެންމެން ގުޅިގެން އިތުރު ހިތްވަރަކާއެކު މަސައްކަތްތަކެއް ކުރަން ޖެހިފައިވާކަން ފާހަގަކުރައްވާ މިނިސްޓަރު ވިދާޅުވީ، ގޭތެރެއިން ފެށިގެން ރިހެބިލިޓޭޝަން ސެންޓަރާއި ހިސާބަށް، އަދި ރިހެބިލިޓޭޓް ވުމަށްފަހު މުޖަތަމަޢަށް ބޭނުންތެރި މީހެއްގެ ގޮތުގައި އަނބުރާ އައުމަށްފަހުވެސް، އެމީހަކީ މުޖުތަމަޢުން ބަލައިގަންނަ މީހަކަށް ހެދުމަށް އެންމެންވެސް މަސައްކަތްކުރަން ޖެހޭ ކަމަށެވެ.
މަސްތުވާތަކެއްޗާ ދެކޮޅަށް މަސައްކަތް ކުރާ ބައިނަލްއަގުވާމީ ދުވަހުގެ މިއަހަރުގެ ޝިޢާރަކީ "ރަނގަޅަށް އަޅާލުމަށް – ރަނގަޅު މަޢުލޫމާތު" ލިބުމުގެ މުހިންމުކަން ކަމަށް މިނިސްޓަރު ފާހަގަ ކުރެއްވިއެވެ.
މަސްތުވާތަކެތި ބޭނުންކުރާ މީހުން އާއިލާތަކުން އެކަހެރި ކޮށްނުލާ އެކަމުން ދުރުހެލި ކުރެވޭނީ ފުރިހަމަ މައުލޫމާތު ލިބިގެން ކަމަށާއި، އާއިލާގެ ތެރެއިންނާއި، އެކިއެކި ފަންނީ ފަރާތްތަކުންނާއި އަދި އިދާރާތަކުންވެސް މައުލޫމާތު ލިބިގެން ކަމަށް މިނިސްޓަރު ވިދާޅުވިއެވެ.
އަދި މަސްތުވާތަކެތި ބޭނުންކުރާ ފަރާތްތަކަށް ފަރުވާދީ، އެކަމުން ސަލާމަތްވެފައިވާ މީހުންގެ ގޮތުގައި އަނބުރާ މުޖުތަމަޢަށް ނެރުމަކީ ބުރަ އަދި އެހާމެ ގޮންޖެހުން ގިނަ މަސައްކަތެއް ކަމަށާއި، ފަރުވާ ބޭނުންވާ ގިނަ ފަރާތްތަކަކަށް ފަރުވާގެ އިންތިޒާރުގައި ތިބެން ޖެހުމުގެ ބަދަލުގައި ބޭނުންވާ ފަރުވާ ލިބުމުގައި ހުރިހާ ދާއިރާތަކެއް ގުޅިގެން މަސައްކަތް ކޮށްފިނަމަ މިކަމުގައި އިތުރު ކާމިޔާބުތަކެއް ލިބިގެންދާނެ ކަމަށްވެސް ވިދާޅުވިއެވެ.
މިކަމުގައި ނޭޝަނަލް ޑްރަގް އޭޖެންސީ އާއި، ޞިއްޙީ ފަރުވާދޭ މަރުކަޒުތަކާއި، އަދި އަމިއްލަ ޖަމުޢިއްޔާތަކާއި، ހިލޭސާބަހަށް މަސައްކަތް ކުރާ ފަރާތްތައް ގުޅިގެން މަސައްކަތްތަކެއް ކުރެވިއްޖެނަމަ އެކަމުން ލިބޭ ނަތީޖާ މިހާރަށްވުރެ އެތައް ގުނައެއް ބޮޑުތަނުން ރަނގަޅުވާނެ ކަމަށްވެސް މިނިސްޓަރު ވިދާޅުވިއެވެ.
މަސްތުވާތަކެއްޗާއި ދެކޮޅަށް މަސައްކަތް ކުރާ ބައިނަލްއަގުވާމީ ދުވަހުގެ މުނާސަބަތުގައި، މި ނުރައްކާތެރި ވަބާއިން މުޖުތަމަޢު ސަލާމަތްކުރުމުގެ މަސައްކަތުގައި ޝާމިލްވާ އެންމެހައި ފަރާތްތައް ކުރައްވަމުން ގެންދަވާ ބުރަ މަސައްކަތް ފާހަގަކޮށް މިނިސްޓަރު ވަނީ ޝުކުުރު ދަންނަވާފައެވެ.
އެންމެން ގުޅިގެން ކުރެވޭ ހަރުދަނާ މަސައްކަތަކުން މަސްތުވާތަކެތީގެ ނުރައްކާ މުޅި ގައުމުން ނައްތާލެވިދާނެކަމީ ޝައްކެއް އޮތްކަމެއް ނޫން ކަމަށްވެސް މިނިސްޓަރު ވިދާޅުވިއެވެ.
