ލިވަޕޫލުން 30 އަހަރަށްފަހު އިނގިރޭސި ޕްރިމިއާ ލީގު ކާމިޔާބުކުރިއިރު، މި ކާމިޔާބީ ހައްގުވަނީ ލިވަޕޫލްގެ ދެ ލެޖެންޑުން ކަމަށްވާ ކެނީ ޑަލްގްލިޝް އާއި ސްޓީވަން ޖެރާޑަށް ކަމަށް އެޓީމުގެ ކޯޗު ޔާގެން ކްލަޮޕް ބުނެފިއެވެ.

ބާކީ ހަތް މެޗު އޮއްވައި ލިވަޕޫލުން މި ސީޒަނުގެ ޕްރިމިއާ ލީގުގެ ޗެމްޕިއަންކަން ކަށަވަރުކުރިއިރު، މިއީ އެޓީމުން 1989-1990 ގެ ސީޒަނުގެ ފަހުން އިނގިރޭސި ޗެމްޕިއަންކަން ހޯދި ފުރަތަމަ ފަހަރެވެ. އަދި އެ ޓީމުން އިނގިރޭސި ޗެމްޕިއަންކަން ހޯދި ޖުމްލަ 19 ވަނަ ފަހަރެވެ. އެކަމަކު މިއީ 1992 ވަނަ އަހަރު އިނގިރޭސި ފުރަތަމަ ޑިވިޝަން، ޕްރިމިއާ ލީގަށް ރިބްރޭންޑްކުރި ފަހުން އެ ޓީމުން ޗެމްޕިއަންކަން ހޯދި ފުރަތަމަ ފަހަރެވެ.

ލީގު ޗެމްޕިއަންކަން ލިވަޕޫލުން ކަށަވަރުކުރިއިރު، އެޓީމު އެއްވަނައިގައި އޮތީ 23 ޕޮއިންޓުގެ ލީޑަކާއެކުއެވެ. ލިވަޕޫލަށް 31 މެޗުން 86 ޕޮއިންޓު ލިބިފައިވާއިރު، ދެވަނައިގައި އޮތް މެންޗެސްޓާ ސިޓީއަށް 31 މެޗުން ލިބިފައިވަނީ 63 ޕޮއިންޓެވެ.

ލިވަޕޫލަށް ޗެމްޕިއަންކަން ކަށަވަރުވުމުން ސްކައި ސްޕޯޓްސްއަށް ދިން އިންޓަވިއުގައި ކްލޮޕް ހުރީ އުފަލުން ރޮވިފައެވެ. ލިވަޕޫލުގެ ޒަމާންވީ އުންމީދު ހާސިލްކޮށްދިން ޖަރުމަންގެ ކޯޗު ކްލޮޕް ބުނީ މި ކާމިޔާބީ ހައްގުވަނީ އެ ޓީމުގެ ދެ ލެޖެންޑުން ކަމަށްވާ ޑަލްގްލިޝް އާއި ޖެރާޑަށް ކަމަށެވެ. އެ ދެ ލެޖެންޑުންނަކީ މިހާރުގެ ކުޅުންތެރިން އަދިވެސް ނަމޫނާއަކަށް ބަލަމުން އަންނަ ދެ ލެޖެންޑުން ކަމަށާއި، ލީގު ކާމިޔާބުކުރަން އެ ދެ މީހުންގެ ފަރާތުން ލިބުނު އެހީތެރިކަމަށް ހާއްސަ ޝުކުރެއް އަދާކުރާ ކަމަށެވެ.

2015 ވަނަ އަހަރު ލިވަޕޫލާ ހަވާލުވި ކްލޮޕް ބުނީ މި ޓީމުގައި އޭނާ ހޭދަކުރި ހަތަރު އަހަރުގެ ތެރޭގައި ބޮޑެތި ކާމިޔާބީތަކެއް ހޯދިފައިވާ ކަމަށާއި، އެކަމަކު ދިގު އިންތިޒާރަކަށްފަހު ޕްރިމިއާ ލީގު ލިބުމަކީ ލިވަޕޫލަށްވެސް ލިބޭނެ އެންމެ ބޮޑު ކާމިޔާބީ ކަމަށެވެ.

ލިވަޕޫލުން ބާކީ ހަތް މެޗު އޮއްވާ ލީގު ކަށަވަރުކުރުމާއެކު ރެކޯޑެއް ވަނީ ގާއިމްކޮށްފައެވެ. މީގެ ކުރިން މި ރެކޯޑް އޮތީ ފަސް މެޗު އޮއްވާ 2000-2001 ގައި ލީގު ކާމިޔާބުކުރި މެންޗެސްޓާ ޔުނައިޓެޑާއި 2017-2018 ގައި ކާމިޔާބުކުރި ސިޓީ އަތުގައެވެ.

ކްލޮޕުގެ އިރުޝާދުގެ ދަށުން ލިވަޕޫލުން ބޮޑެތި ކާމިޔާބީތަކެއް ހޯދަމުން އަންނައިރު، މިހާރު ލިވަޕޫލުން ވަނީ ކްލޮޕުގެ އިރުޝާދުގެ ދަށުން ޕްރިމިއާ ލީގާއި، ޔުއެފާ ޗެމްޕިއަންސް ލީގު އަދި ފީފާ ކްލަބު ވޯލްޑް ކަޕް ކާމިޔާބުކޮށްފައެވެ.