ރާއްޖެއިން ބޭރުގައި ތަޢުލީމު ޙާޞިލު ކުރާ ދަރިވަރުންގެ ތެރެއިން ފައިސާގެ އެހީތެރިކަމަށް އެދިފައިވާ 180 ދަރިވަރަކަށް އެއް މިލިއަނަށް ވުރެ ގިނަ ރުފިޔާގެ އެހީތެރިކަން ފޯރުކޮށްދީފައިވާކަމަށް މިނިސްޓަރ އޮފް ހަޔަރ އެޑިއުކޭޝަން ޑރ އިބްރާހިމް ހަސަން ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަފުޅު ދައްކަވަމުން މިނިސްޓަރ ވިދާޅުވީ، ކޮވިޑް-19ގެ މި ހާލަތާއި ގުޅިގެން ރާއްޖެއިން ބޭރުގައި ދަތި ހާލުގައި ޖެހިފައިވާ ދަރިވަރުންނަށް މާލީ އެހީތެރިކަން ފޯރުކޮށް ދިނުމަށް ވަކި ހާއްސަ އުސޫލެއް އެކުލަވާފައިވާކަމަށެވެ. އެގޮތުން، އަމިއްލަ ޚަރަދުގައި ތަޢުލީމު ޙާޞިލު ކުރުމަށް ގޮސް ތިބި ދަރިވަރުންން ހިމެނޭ ގޮތަށް ޖުމްލަ 180 ދަރިވަރަކަށް 1،088،000 (އެއް މިލިއަން އަށްޑިހަ އައްހާސް)ށް ވުރެ ގިނަ ރުފިޔާގެ ފައިސާގެ އެހީތެރިކަން ފޯރުކޮށްދީފައިވާކަމަށް މިނިސްޓަރ ވިދާޅުވިއެވެ.

މިނިސްޓަރ ވިދާޅުވީ، ފައިސާ ދެނީ ކޮންމެ ދެ ހަފްތާއަށް ވާވަރަށް އެއްފަހަރާ ކަމަށެވެ. ވަރަށް ގިނަ އަދަދެއްގެ ދަރިވަރުން ސަރުކާރުން އިންތިޒާމް ކުރި ފްލައިޓްތަކުގައި އެނބުރި ރާއްޖެ އައިސްފައިވާކަން ފާހަގަކުރައްވަމުން މިނިސްޓަރ ވިދާޅުވީ ފައިސާގެ އެހީތެރިކަން ފޯރުކޮށްދެމުން ދަނީ ހަމައެކަނި ރާއްޖެއިން ބޭރުގައި ކިޔަވަން ތިބޭ ވަގުތު އެކަނި ކަމަށެވެ.

މިނިސްޓަރ ވިދާޅުވީ، މި ސްކީމް ބައްޓަން ކޮށްފައިވަނީ ސަރުކާރުގައި މާގިނަ ފައިސާ ހުރެގެން ނޫންކަމަށާއި ބޭނުންވީ ރާއްޖެއިން ބޭރުގައި ހާލުގައި ޖެހިފައި ތިބި ދަރިވަރުންނަށް ކޮންމެވެސް ވަރެއްގެ އެހީތެރިކަމެއް ފޯރުކޮށްދިނުން ކަމަށެވެ. މިނިސްޓަރ ވިދާޅުވީ ފައިސާ ދިނުމުގައި މިންގަނޑަކަށް ބަލާފައިވަނީ، އެ ގައުމުގައި ތިބޭ ދަރިވަރުންނަށް މިނިސްޓްރީން ދޭ ފިކްސްޑް އަދަދު ކަމަށާއި، 2 ހަފްތާއަށް ފައިސާ ދިނުމަށް ފަހު ދަރިވަރުގެ ހާލަތު ބަދަލުނުވާ ނަމަ އަނެއްކާވެސް 2 ހަފްތާއެއްގެ އެހީ ދެމުންދާކަމަށެވެ. އަދި ސްކީމް ހަމަޖެހިފައިވަނީ ދެ މަސް ދުވަހަށް ފައިސާ ދޭގޮތަށް ކަމަށް މިނިސްޓަރ ވަނީ ފާހަގަކުރައްވާފައެވެ.

އެހީއަށް އެދި ހުށަހަޅާއިރު އެދަރިވަރަކީ ކޮވިޑް-19ގެ ސަބަބުން ކިޔެވުމަށް ސްޕޮންސަރ ކުރާ ފަރާތުން ފައިސާ ދިނުމަށް ދަތިވެފައިވާ ފަރާތެއްކަން ނުވަތަ އެހީ ލިބުން ދަތިވެފައިވާކަން ސާބިތުކޮށްދޭން ޖެހޭ ކަމަށް ހަޔަރ އެޑިއުކޭޝަން މިނިސްޓްރީން ވަނީ ބުނެފައެވެ.