ހުޅުމާލެ ދެވަނަ ފިޔަވައްސަށް 2 ސްކޫލް އަދި 2 މިސްކަތް އެޅުމުގެ މަސައްކަތް އެބަކުރެވޭ: އެޗްޑީސީ
25 ޖޫން 2020 | ބުރާސްފަތި 07:49އެއް ސްކޫލް ޑިޒައިންކޮށް، ޑެންޓަރިންގ މަރުހަލާގައި، އަނެއް ސްކޫލް އިންޓަރނޭޝަނަލް ސްކޫލަކަށް، ބަޔަކާ ހަވާލުކުރުމުގެ މަސައްކަތްވެސް ކުރިއަށްދޭ
ހުޅުމާލެ ދެވަނަ ފިޔަވަހީގެ 25 ބުރީގެ ޓަވަރެއް: 25 ބުރީގެ 16 ޓަވަރު ހުރިއިރު، 6720 ފްލެޓް ހިމެނޭ، މި ފްލެޓްތަކުގައި ގާތްގަނޑަކަށް 32،000 މީހުން ދިރިއުޅޭނެ ކަމަށް ބެލެވޭ
ހުޅުމާލެ ދެ ވަނަ ފިޔަވަހީގައި 2 ސްކޫލަކާއި ދެ މިސްކިތް ބިނާކުރުމުގެ މަސައްކަތް ކުރެވެމުންދާ ކަމަށް އެޗްޑީސީން ބުނެފި އެވެ.
"ހިޔާ" މަޝްރޫއުގެ ފްލެޓްތަކާ ގުޅޭގޮތުން ރައްޔިތުންގެ މެދުގައި އެކި ގޮތްގޮތަށް ވާހަަކަ ފެތުރެމުންދާތީ، މީޑިއާތަކަށް ހިޔާ މަޝްރޫއުގެ ދަށުން އިމާރާތް ކޮށްފައިވާ 25 ބުރީގެ 16 ޓަވަރާއި، އަދި އެޓަވަރުތަކުގައި ހަދާފައިވާ ޔުނިޓްތައް ނުވަތަ ފްލެޓްތައް ބުދަ ދުވަހު ދައްކާލުމަށްފަހު، ނޫސްވެރިންނަށް މައުލޫމާތު ދެއްވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަހުމަދު ވިދާޅުވީ، އެ ފްލެޓްތަކުގައި މީހުން ދިރިއުޅެން ފަށަންވާއިރަށް ސްކޫލްތަކާއި މިސްކިތްތައް ފަދަ ތަންތަން ބިނާ ކުރުމުގެ މަސައްކަތް ކުރެވެމުންދާ ކަމަށެވެ.
ސުހައިލް ވިދާޅުވީ، ހުޅުމާލެ ދެވަނަ ފިޔަވަހީގެ ފްލެޓްތަކަށް މީހުން ދާންވާއިރަށް ސްކޫލްތައް ނުނިމި ހުރުމަކީ އެކަށީގެންވާ ކަމެއް ކަމަށާއި ނަމަވެސް މަސައްކަތް ކުރަމުންދަނީ ވަރަށް އަވަހަށް ހަތަރު ސްކޫލެއްގެ މަސައްކަތް ފަށައި ނިންމުމަށް ކަމަށެވެ.
ސުހައިލް ވިދާޅުވީ، ހުޅުމާލެ ފޭސް އެކެއްގައި ހުރި ބައެއް ސްކޫލްތަކުގައި ވެސް ޖާގަ އެބަހުރި ކަމަށެވެ.
ހިޔާ މަޝްރޫއުގެ ދަށުން ހުޅުމާލެ ދެވަނަ ފިޔަވަހީގައި 25 ބުރީގެ 16 ޓަވަރުގައި، ޖުމްލަ 6720 ފްލެޓް ހިމެނެއެވެ. އެއީ މުޅިންވެސް އެވްރެޖް 570 އަކަފޫޓުގެ ފްލެޓް ކުދި ފްލެޓްތަކެކެވެ. ކޮންމެ ފްލެޓެއްގައި ވެސް ހުންނަނީ ދެ ކޮޓަރީއާއެކު ދެ ފާހާނާ އެވެ. އަދި ލިވިންގ އޭރިއާގައި ކައްކައި ކެވޭ ގޮތަށް ބޭނުންކުރަން ޖެހޭއިރު، އަންނައުނު ފަދަ ތަކެތި ދޮވުމާއި ހިއްކަން އެޅުމަށް ހަމަޖައްސާފައިވަނީ ބެލްކަނީގަ އެވެ. އެތަނުގެ ޖާގަވެސް ވަރަށް ކުޑައެވެ.
ކޮންމެ ޓަވަރެއްގައި 2000 އެއްހާ މީހުން އުޅޭނެ ކަމަށް ބެލެވޭއިރު، ކޮންމެ ޓަވަރެއްގައި އަރާ ފޭބުމަށް ބޭނުން ކުރަން ހުންނަނީ 3 ލިފްޓެވެ. އެއިން ކޮންމެ ލިފްޓަކަށް އެފަހަރާ އެންމެ ގިނަ ވެގެން ވެސް އެރެނީ 14 މީހުންނަށެވެ.
މި ފްލެޓްތައް ދޫކުރަން ނިންމާފައިވަނީ، 20 އަހަރަށް ބަހާލައިގެން ކޮންމެ މަހަކު 11،000ރ ދައްކާ ހަލާސްކުރާ ގޮތަށެވެ.
މި ފްލެޓްތައް އިމާރާތްކުރުމަށް ސަރުކާރުން 434 މިލިއަން ޑޮލަރުގެ ލޯނެއް ނަގާފައިވެއެވެ.
