ޔޫއެންޑަބްލިއުޓީއޯ ކޮމިޝަންގެ 32ވަނަ ބައްދަލުވުން މި މަހުގެ 30ގައި

ދުނިޔޭގެ ފަތުރުވެރިކަމުގެ ޖަމިއްޔާ ޔޫއެންޑަބްލިއުޓީއޯގެ ކޮމިޝަން ފޮރ އީސްޓް އޭޝިއާ އެންޑް ދަ ޕެސިފިކް، އަދި ކޮމިޝަން ފޮރ ސައުތު އޭޝިއާގެ 32 ވަނަ ބައްދަލުވުން، 30 ޖޫން ގައި ބޭއްވުމަށް ނިންމައިފިއެވެ.

ކޮމިޝަން ފޮރ ސައުތު އޭޝިއާގެ ބައްދަލުވުމުގެ ރިޔާސަތު ބެލެހެއްޓުމަށް ހަމަޖެހިފައިވަނީ އެކޮމިޝަންގެ ޗެއަރ އަދި ދިވެހިރާއްޖޭގެ ޓޫރިޒަމް މިނިސްޓަރ ޢަލީ ވަޙީދެވެ. އަދި ކޮމިޝަން ފޮރ އީސްޓް އޭޝިއާ ދަ ޕެސިފިކްގެ ބައްދަލުވުމުގެ ރިޔާސަތު ބަލަހައްޓާނީ މެލޭޝިޔާގެ ފަރާތުންނެވެ. މީގެ އިތުރުން މިބައްދަލުވުމުގައި ޔޫއެންޑަބްލިއުޓީއޯގެ ސެކްރެޓަރީ ޖެނެރަލް ރޫރަތް ޕޮލޮލިކަޝްވިލި ބައިވެރިވަޑައިގަންނަވާނެއެވެ.

ޔޫއެންޑަބްލިއުޓީއޯގެ ކޮމިޝަން ފޮރ އީސްޓް އޭޝިއާ އެންޑް ދަ ޕެސިފިކް، އަދި ކޮމިޝަން ފޮރ ސައުތު އޭޝިއާގެ 32 ވަނަ ބައްދަލުވުން ބާއްވާނެ ޤައުމަކަށް ސްރީލަންކާ ހޮވިފައިވީނަމަވެސް، ދުނިޔެއަށް ކުރިމަތިވި ކޮވިޑް-19 ބަލިމަޑުކަމާގުޅިގެން މިބައްދަލުވުން މިހާރު ބޭއްވުމަށް ނިންމާފައިވަނީ ވެބް މެދުވެރިކޮށެވެ.

މިބައްދަލުވުމުގެ އެޖެންޑާގައި ފަތުރުވެރިންގެ ސަލާމަތާއި ރައްކާތެރިކަމާއި، އެމީހުންގެ އިތުބާރު ނެގެހެއްޓުމާއި، ކޮވިޑް-19 އާ ގުޅިގެން ސިޔާސަތުތައް ކަނޑައެޅުން ހިމެނެއެވެ.

މީގެ އިތުރުން، ކޮވިޑް-19 ގެ ސަބަބުން ދުނިޔޭގެ ފަތުރުވެރިކަމަށް ކޮށްފައިވާ އަސަރުތަކާއި ގުޅޭގޮތުން މަޝްވަރާކުރުމަށް ވަނީ ހަމަޖެހިފައެވެ. ހަމައެހެންމެ ޔޫއެންޑަބްލިއުޓީއޯގެ "ގްލޯބަލް ގައިޑްލައިން ޓު ރީސްޓާޓް ޓޫރިޒަމް" އަށް މެންބަރުން ޚިޔާލު ބަދަލުކުރުމަށްވެސް ހަމަޖެހިފައިވެއެވެ.