ބޭރު ޤައުމުތަކަށް ރާއްޖެއިން ސަފީރުން ކަނޑައެޅުމަށްޓަކައި، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ފޮނުއްވާފައިވާ މައްސަލަ ދިރާސާކޮށް ގޮތެއް ނިންމުމަށް އެ މައްސަލައާ ގުޅޭ ދާއިމީ ކޮމިޓީއަށް ފޮނުވައިފިއެވެ.
ރައީސުލްޖުމްހޫރިއްޔާ މަޖިލީހަށް ފޮނުއްވި މި ސިޓީގައި ވަނީ ބޭރު ޤައުމުތަކަށް ރާއްޖެއިން ސަފީރުން ކަނޑައެޅުމަށްޓަކައި، ނަން ފޮނުއްވާފައިވާ ބޭފުޅުން ސަފީރު ކަމަށް ހަމަޖެއްސެވުމާ މެދު ރައްޔިތުންގެ މަޖިލީހުގެ މަޝްވަރާ ހޯދާ، މަޖިލީހުން ގޮތެއް ނިންމާ އެންގެވުމަށެވެ. ސަފީރުކަމަށް އައްޔަނުކުރުމަށް ފަސް ބޭފުޅެއްގެ ނަން ފޮނުއްވާފައިވެއެވެ.
ޕީޕަލްސް ރިޕަބްލިކް އޮފް ބަންގްލަދޭޝަށް ދިވެހި ރާއްޖެއިން ކަނޑައަޅާފައި ހުންނަވާ ސަފީރުކަމަށް އައްޔަނުކުރުމަށް މ.ޒީނާ، ޝިރުޒިމަތު ސަމީރުގެ ނަން ފޮނުއްވާފައިވާއިރު ޕާކިސްތާނަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމަށް ގ.ޗޭނުގެ، ފަރުޒާނާ ޒާހިރުގެ ނަން ވަނީ ފޮނުއްވާފައެވެ. އަދި އެކުވެރި ޢަރަބި އިމާރާތައް ދިވެހިރާއްޖެއިން ކަނޑައަޅާފައި ހުންނަވާ ސަފީރު ކަމަށް ހ.މިސްޓީލޮޖް، އާމިނަތު ޝަބީނާގެ ނަން ފޮނުއްވާފައިވެއެވެ.
މީގެ އިތުރުން، އިންޑިއާއަށް ދިވެހިރާއްޖެއިން ކަނޑައަޅާފައި ހުންނަވާ ސަފީރުކަމަށް، އަދި ދިވެހިރާއްޖެއިން ނޭޕާލް، ބޫޓާން އަދި އަފްޣާނިސްތާނަށް ކަނޑައަޅާ ނޮން-ރެސިޑެންޓް ސަފީރުކަމަށް ހ.ނިޔާސާ، ޑރ. ޙުސައިން ނިޔާޒުގެ ނަމުގެ އިތުރުން ދިވެހިރާއްޖެއިން އ.ދ. އަށް ކަނޑައަޅާފައިވާ ދާއިމީ މިޝަންގެ ޖެނީވާ އޮފީހުގެ ޕާރމަނަންޓް ރެޕްރެޒެންޓޭޓިވް އަދި ސްވިސް ކޮންފެޑެރޭޝަނަށް ދިވެހިރާއްޖެއިން ކަނޑައަޅާ ނޮން-ރެސިޑެންޓް ސަފީރު ކަމަށް ގ.ފަރުކަނި، އެމްބެސެޑަރ އެޓް ލާޖް، ޑރ.ޢާޞިމް އަޙްމަދުގެ ނަން ވަނީ ފޮނުއްވާފައެވެ.
މި ނަންތައް ދިރާސާ ކުރުމަށް ފޮނުވާފައިވަނީ ގައުމީ ސަލާމާތާއި ޚާރިޖީ ގުޅުންތަކުގެ ކޮމިޓީއަށެވެ.
