"ފުލުހުން ހިންގާ ވިޔަފާރިތަކުގެ އެއްވެސް އޮޑިޓް ރިޕޯޓެއް ހުށައަޅާފައެއް ނުވޭ"
ކުންފުނިތަކުގެ އޮޑިޓް ރިޕޯޓެއް މިނިސްޓަރަށް ލިބިފައިވޭތޯ މެމްބަރު ޔައުޤޫބު ސުވާލު ކުރެއްވި
ހޯމް މިނިސްޓަރ ޝެއިޙް އިމްރާން ޢަބްދުﷲ- މިނިސްޓަރ ވަނީ ފުލުހުންގެ ޚިދުމަތުގެ ބިލު ފާސްވުމުން އެކަންކަމަށް ޙައްލެއް ލިބޭނެ ކަމަށް ޤަބޫލު ކުރައްވާ ކަމަށް ވިދާޅުވެފައި
ފުލުހުންގެ މުއައްސަސާގެ ދަށުން ހިންގާ އެއްވެސް ވިޔަފާރިއަކާ ގުޅޭ އޮޑިޓް ރިޕޯޓެއް ލިބިފައިނުވާ ކަމަށް ހޯމް މިނިސްޓަރ ޝެއިޙް އިމްރާން ޢަބްދުﷲ ވިދާޅުވެއްޖެއެވެ.
މިނިސްޓަރ އެހެން ވިދާޅުވީ، ބުދަ ދުވަހުގެ މަޖިލިސް ޖަލްސާގައި ދާންދޫ ދާއިރާގެ މެމްބަރު ޔައުޤޫބު އަބްދުﷲ ކުރެއްވި ސުވާލަކަށް ޖަވާބު ދެއްވަމުންނެވެ. އެގޮތުން ފުލުހުންގެ އިދާރާގެ ވަސީލަތްތައް ބޭނުންކޮށްގެން ފުލުހުން އެކި ވިޔަފާރި ކުންފުނިތައް ހިންގާއިރު، އެފަދައިން ހިންގާ ކުންފުނިތަކުގެ ތަފްސީލު ހޯއްދެވުމަށް މެމްބަރު ވަނީ އެދިވަޑައިގެންފައެވެ. އަދި އެ ކުންފުނިތަކުގެ އޮޑިޓް ރިޕޯޓެއް މިނިސްޓަރަށް ލިބިފައިވޭތޯ މެމްބަރު ޔައުޤޫބު ސުވާލު ކުރައްވާފައިވެއެވެ.
އެ ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ، އެކަމާ ގުޅޭ އެކި ޝަކުވާތައް މިނިސްޓަރަށް ވެސް ހުށައެޅޭ ކަމަށާއި، އެކަންކަމަށް ޙައްލު ލިބިގެންދާނީ މިހާރު ހުށައެޅިފައިވާ ފުލުހުންގެ ޚިދުމަތުގެ ބިލު ފާސްވުމުން ކަމަށް ޤަބޫލު ކުރައްވާ ކަމަށެވެ.
މިނިސްޓަރ ވިދާޅުވީ، ފުލުހުން ހިންގަމުން އަންނަ އެއްވެސް ވިޔަފާރިއެއްގެ އޮޑިޓް ރިޕޯޓެއް މިހާތަނަށް ލިބިފައި ނުވާ ކަމަށެވެ.
އެކަމާ ގުޅޭގޮތުން ވާހަކަ ދައްކަވަމުން މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވީ، ފުލުހުންގެ މުއައްސަސާގެ ބައިވެރިވުން ހިމެނޭ ގޮތަށް އިންތިޒާމު ކުރާ ވިޔަފާރިތައް ހިންގުމާއި އެކަމުގެ ފަންޑުތައް ބެލެހެއްޓެމުންދާ ގޮތެއް މާބޮޑަށް ސާފު ވެވަޑައިނުގަންނަވާ ކަމަށެވެ. އަދި އެކަމުގެ ކަންބޮޑުވުން މަޖިލިސް މެމްބަރުން އަބަދުވެސް ފާހަގަ ކުރައްވާކަން ރައީސް ނަޝީދު ފާހަގަ ކުރެއްވިއެވެ.
ރައީސް ނަޝީދު ވިދާޅުވީ، މާލިއްޔަތު ކޮމިޓީއަށް އޮޑިޓް ރިޕޯޓުތައް ހުށައަޅަން ޖެހޭއިރު، ކޮމިޓީންވެސް ފުލުހުންގެ އެފަދަ އޮޑިޓް ރިޕޯޓެއް ފެންނަން ނެތް ކަމަށެވެ. އެއާއެކު މިހާރު އެކަންކަން ހިނގަމުންދަނީ ޤާނޫނުތަކާއި ޤަވާއިދުތަކާ އެއްގޮތަށްތޯ ސުވާލު އުފެދޭކަން ފާހަގަ ކުރައްވައި ރައީސް ނަޝީދު ވިދާޅުވީ، ފުލުހުންގެ ޚިދުމަތުގެ ބިލަށް ގެނެވޭ އިސްލާޙުތަކާއެކު އެކަން ކަމަށް ޖަވާބު ދެވިގެންދާނެ ކަމަށެވެ.
ދިވެހި ފުލުހުންގެ ޚިދުމަތުގެ ބިލުގައި ބުނެފައިވާ ގޮތުން، އެ ބިލުގެ ބޭނުމަކީ ފުލުހުންގެ ޚިދުމަތުގެ އެންމެހާ ކަންކަމަކީ ދިވެހި ޖުމްހޫރިއްޔާގެ ޤާނޫނު އަސާސީ އާއި، ޤާނޫނު އާސާސީ ގައި ބަޔާންކޮށްފައިވާ ދުސްތޫރީ ހަމަތަކާއި އިންސާނީ ޙައްޤުތަކަށް އިޙުތިރާމާއެކު ޤާނޫނުގެ ޙުކޫމާތުގެ ތެރެއިން ދެވޭ ޚިދުމަތެއްކަން ކަށަވަރުކުރުން ކަމަށެވެ. އަދި މިހާރު ޢަމަލު ކުރަމުންދާ ޤާނޫނު ނަންބަރު 5/2008 (ފުލުހުންގެ ޤާނޫނު)ގެ ބަދަލުގައި އާ ޤާނޫނެއް ތަޢާރަފުކޮށް، ފުލުހުންގެ ޚިދުމަތް ޤާއިމުކުރެވިފައިވާ ގޮތާއި، ފުލުހުންގެ ޚިދުމަތް ފޯރުކޮށްދިނުމުގެ މައިގަނޑު އަސާސްތަކާއި އުޞޫލުތަކާއި، ފުލުހުން ޚިދުމަތުގެ މައިގަނޑު މަސްއޫލިއްޔަތުތަކާއި، ބާރުތަކާއި، އެ ޚިދުމަތާގުޅޭ އެނޫންވެސް ކަންކަން އެ ޤާނޫނު މެދުވެރިކޮށް އަލުން ކަނޑައެޅުން ކަމަށް ވެސް ދިވެހި ފުލުހުންގެ ޚިދުމަތުގެ ބިލުގައިވެއެވެ.
