ކޮވިޑާއި ގުޅިގެން ހާލުގައި ޖެހުނު ފަރާތްތަކަށް ޕާރުސަލް ފޯރުކޮށްދިނުމަކީ ޖެންޑަރ މިނިސްޓްރީން ކުރި ވަރަށް ރަނގަޅު މަސައްކަތެއް ކަމަށް ޖެންޑަރ މިނިސްޓަރ އައިޝަތު މުހައްމަދު ދީދީ ވިދާޅުވެއްޖެއެވެ.
އަންގާރަ ދުވަހުގެ އިޖުތިމާއީ ކޮމެޓީގެ ބައްދަލުވުމުގައި މިނިސްޓަރ މިހެން ވިދާޅުވީ ފުނަދޫ ދާއިރާގެ މެމްބަރު މުޙައްމަދު ޝާހިދު ދެއްކެވި ވާހަކައަކާއި ގުޅިގެންނެވެ. ކޮމެޓީގައި ވާހަކަދައްކަވަމުން މެމްބަރު ވިދާޅުވީ ސައިކޯ ސޯޝަލް ސަޕޯޓު ފޯރުކޮށްދިނުމުގައި ޖެންޑަރ މިނިސްޓްރީން ފަސްޖެހިވަޑައިގެން ކަމަށެވެ. އަދި މިކަންކަމަށް ވުރެ ބޮޑަށް މިނިސްޓްރީން އިސްކަން ދިނީ ޕާރުސަލް ބެހުމާއި ރަށްރަށަށް މީހުން ފޮނުވުމާއި އެ ބާވަތުގެ ކަންކަމަށް ކަމަށެވެ.
މިކަމާއި ގުޅިގެން މިނިސްޓަރ ވިދާޅުވީ ކޮވިޑާއި ގުޅިގެން ސައިކޯ ސޯޝަލް ސަޕޯޓު ދިނުމަށް ނެޝަނަލް އިމަރޖެންސީ އޮޕަރޭޝަން ސެންޓަރުގައި ރެޑް ކްރެސެންޓުގެ ބޮޑު ޓީމަކުން ދަނީ މަސައްކަތް ކުރަމުންކަމަށެވެ.
ޖެންޑަރ މިނިސްޓްރީން ސައިކޯ ސޯޝަލް ސަޕޯޓު ދެނީ މިނިސްޓްރީން ބަލަމުންދާ މައްސަލަތަކާއި ގުޅުން ހުރި އާއިލާތަކާއި ޚާއްސަ އެހީއަށް ބޭނުންވާ ފަރާތްތަކާއި ކުޑަކުދިންނަށްކަން ފާހަގަކުރައްވާ މިނިސްޓަރ ވިދާޅުވީ މި ދަނޑިވަޅުގައިވެސް އެ މަސައްކަތް ހުއްޓާނުލާ ކުރިއަށް ގެންދާ ކަމަށެވެ. އަދި ލޮކްޑައުން ކުރެވުމާއި ގުޅިގެން މިނިސްޓްރީގައި ރެޕިޑް ރެސްޕޮންސް ޓީމެއް އެކުލަވާލެވި އެ ޓީމުން ދިޔައީ 24 ގަޑިއިރު މަސައްކަތް ކުރަމުން ކަން ވެސް ފާހަގަކުރެއްވިއެވެ.
ޕާރުސަލް ބެހުމާއި ގުޅިގެން މެމްބަރު ދެއްކެވި ވާހަކައަށް ރައްދު ދެއްވާ މިނިސްޓަރ ވިދާޅުވީ އެއީ މިނިސްޓްރީން ކުރި ވަރަށް ރަނގަޅު މަސައްކަތެއް ކަމަށެވެ.
އަޅުގަނޑަށް ހީވަނީ މާލޭގައި މަގުމަތީގައި މީހުން އެހެން މީހުންނަށް އުނދަގޫނުކޮށް، ސަލާން ޖަހަން ނޫޅޭ. އަދި ތިބޭފުޅުންނަށް ވެސް ލުއިވެގެން ދިޔައީ އަޅުގަނޑުމެން ޕާރުސަލް ބެހީމަ. އެހެންމަ އެކަމުގައި އަޅުގަނޑު ހަމަ ބުނަން ބޭނުމީ އެއީ އަޅުގަނޑުމެންނަށް ކުރެވުނު ވަރަށް ރަނގަޅު ކަމެކޭ. އެ ޕާރުސަލް އަޅުގަނޑުމެން ނުބެހިނަމަ ވަރަށް ގިނަ މީހުން ތިބޭނީ ނުކައި. ރޯދަ މަހު ރޯދަ ހިފޭނެ ގޮތް ނެތިފަޖެންޑަރ މިނިސްޓަރ އައިޝަތު މުހައްމަދު ދީދީ
މިނިސްޓަރ ވިދާޅުވީ އެންމެ ފުރަތަމަ ބެލީ ނެޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އާއި ހަވާލުކޮށްގެން އެ މަސައްކަތް ކުރެވޭތޯ ކަމަށެވެ. އެހެންނަމަވެސް، ގާނޫނީ ގޮތުން އެންސްޕާއަށް އެ މަސައްކަތް ކުރެވެން ނެތުމުން ފަންޑް ރެއިޒް ކޮށްގެން އެ ފަރާތްތަކަށް އެހީވުމުގެ މަސައްކަތް މިނިސްޓްރީން އިން ފެށީ ކަމަށެވެ. އަދި އެ މަސައްކަތް ވެސް ކޮށްފައިވާނީ އުސޫލާއި އެއްގޮތަށް ކަމަށެވެ.
މިނިސްޓްރީން މި ދަނޑިވަޅުގައި ފޯރުކޮށްދީފައިވާ އެހީގެ ތަފާސްހިސާބުތައްވެސް މިނިސްޓަރ ވަނީ ކޮމެޓީއާއި ހިއްސާ ކުރައްވާފައެވެ.
- 50،314 ފަހަރުމަތިން އެކި މީހުންނަށް ކައްކާފައި ހުރި ކާބޯތަކެތި ފޯރުކޮށްދީފައިވޭ
- 1492 އުމުރުން ދުވަސްވީ މީހުންގެ ހާލުބެލިފައި
- 2508 ނުކުޅެދުންތެރިކަން ހުރި ފަރާތްތަކުގެ ހާލު މޮނީޓަރ ކޮށްފައިވޭ
- 885 ފަރާތަކަށް ކެއަރ ޕެކޭޖް ފޯރުކޮށްދީފައިވޭ
- ކުލި ނުދެއްކިގެން މަގުމަތިވި 7 އާއިލާއަށް ނިސްބަތްވާ 48 މީހުންނަށް ވަގުތީ ބޯހިޔާވަހިކަން ފޯރުކޮށްދީފައިވޭ
- 12 އާއިލާއަށް ނިސްބަތްވާ 52 މީހުންނަށް ހުޅުމާލޭގެ ޔޫތު އެކެޑަމީގައި ވަގުތީ ބޯހިޔާވަހިކަން ފޯރުކޮށްދީފައިވޭ
- 100 މީހުންނަށް ވަގުތީ ބޯހިޔާވަހިކަން ފޯރުކޮށްދިނުމުގެ އިތުރުން ރަށްރަށަށް ފޮނުވާލެވުނު
މިނިސްޓްރީން ބުނީ ދުވާލެއްގެ މައްޗަށް އެވަރެޖްކޮށް 250 އާއި 300 އާއި ދެމެދުގެ މީހުންނަށް ކާބޯތަކެތި ފޯރުކޮށްދެވޭ ކަމަށެވެ. އަދި އެކަމަކަށް މިހާތަނަށް 1.5 މިލިއަން ރުފިޔާ ޚަރަދުކޮށްފައިވާ ކަމަށެވެ.
