"އާބާދީގެ ނިސްބަތުން މި ސަރަހައްދުގައި އެންމެ ގިނައިން ކޮވިޑަށް ޓެސްޓްކުރާ ގައުމަކީ ރާއްޖެ"
23 ޖޫން 2020 | އަންގާރަ 13:26ޕޮޒިޓިވްވާ މީހުންނަށް އެކަށީގެންވާ ވަރަށް ފަރުވާދިނުމަށް ތައްޔާރުވެވިފައި ވާކަން ފާހަގަ ކުރެއްވި
ލެބޯޓްރީގައި ކޮވިޑް-19 އަށް ޓެސްޓް ކުރަނީ
ދިވެހިރާއްޖެއަކީ އާބާދީގެ ނިސްބަތުން މިހާރުވެސް މި ސަރަހައްދުގައި އެންމެ ގިނައިން ކޮވިޑް-19އަށް ޓެސްޓް ކުރެވޭ ޤައުމު ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވެއްޖެއެވެ.
އަންގާރަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ ކޮވިޑް-19 އަކީ ދުނިޔޭގެ ކޮންމެ ގައުމެއްގެ ސިއްޚީ ނިޒާމް ހުއްޓުވުމަކަށް ގެނުވި ހަމަލާއެއް ކަމަށާއި ހުރިހާ ގައުމަކުންވެސް މި ބައްޔާއި ދެކޮޅަށް ކުރަން ޖެހުނީ އާއު ތަޖުރިބާ ތަކެއް ކަމަށެވެ.
ފަރުވާއެއް ހޯދިފައި ނުވާ މި ބައްޔާއި ކުރިމަތިލި ކޮންމެ ގައުމަކުން ވެސް ހޯދަން ޖެހުނީ އައު ގޮތްތަކެއް ކަމަށާއި، އެކަމުގައި ދުނިޔޭގެ އެންމެ ކުރިއަރާފައިވާ އެންމެ ބޮޑެތި ގައުމުތަކުންވެސް އިސްތިސްނާނުވާ ކަމަށް ރައީސް ވިދާޅުވިއެވެ.
ކޮންމެ ގައުމަކުން ވެސް ދިޔައީ އައު ހޯދުންތައް ހޯދަމުން ކަމަށާއި ރާއްޖެވެސް މި ބައްޔައި ކުރިމަތިލީ މިހާލަތުގައި ކަމަށެވެ. ރާއްޖެއިން މިހާތަނަށް ހޯދާފައިވާ ކުރިއެރުންތައް ފާހަގަކުރައްވާ ރައީސް ވިދާޅުވީ، ރާއްޖޭގައި މި ބައްޔަށް ޝައްކުވެގެން ފުރަތަމަ ނެގި ހަތް މީހުންގެ ސާމްޕަލްވެސް ޓެސްޓް ކުރަން ފޮނުވަން ޖެހުނީ ރާއްޖެއިން ބޭރަށް ކަމަށެވެ. ރާއްޖެއިން އެންމެ ފުރަތަމަ ކޮވިޑަށް ޓެސްޓުކުރަން ފޮނުވީ އިންޑިއާގެ ޕޫނޭއަށެވެ.
މީގެ އިތުރުންވެސް ކޮވިޑާއި ގުޅިގެން ކިތަންމެ ގޮންޖެހުންތަކެއް ކުރިމަތިލާން ޖެހުނު ކަމަށާއި ނަމަވެސް އެތައް ބައެއްގެ މަސައްކަތުން ކޮވިޑް-19އަށް ޕޮޒިޓިވްވާ މީހުންނަށް އެކަށީގެންވާވަރަށް ފަރުވާދިނުމަށް ތައްޔާރުވެވިފައި ކަމަށް ރައީސް ވިދާޅުވިއެވެ.
ރައީސް ވިދާޅުވީ މިހާތަނަށް ރާއްޖޭގައި 41699 ޕީސީއަރު ޓެސްޓް ހެދިފައިވާ ކަމަށާއި މާލޭގެ އިތުރުން ރާއްޖޭގެ ފަސް ސަރަހައްދެއްގައި ކޮވިޑް-19ގެ ބަލި މީހުންނަށް ފަރުވާ ދިނުމަށް 250 އައިސީޔޫ އެނދު އަދި 655 އައިސޮލޭޝަން އެނދު ޤާއިމް ކުރެވިފައިވާ ކަމަށެވެ. މި ކުރެވުނު ބުރަ މަސައްކަތާއި އެކު ރާއްޖެ މިވަނީ އާންމު ދިރިއުޅުމަކަށް ދިއުމަށް ދެވަނަ މަރުހަލާއެއް ފަށަން ތައްޔާރުވެފައި ކަމަށް ރައީސް ވިދާޅުވިއެވެ.
