ހަރުކަށި ފިކުރު ފަތުރަމުންދާ މީހުން ހޯދުމަށް މަޑުއްވަރީގައި ހާއްސަ އޮޕަރޭޝަނެއް އަނެއްކާ ވެސް ފަށައިފި
މަޑުއްވަރީ ހަރުކަށި ފިކުރު ފަތުރަމުންދާ މީހުންގެ އަދަދު ގިނަ ކަމަށް ބުނެވޭ
ރ. މަޑުއްވަރީގައި ފުލުހުން ހަރަކާތްތެރިވަމުންދާ ގެ
ހަރުކަށި ފިކުރު ފަތުރަމުންދާ މީހުން ހޯދުމަށް އަނެއްކާވެސް ރ. މަޑުއްވަރީގެ ގެތައް ބަލާ ފާސްކުރަން ފުލުހުން ފަށައިފިއެވެ.
ރާއްޖެއެމްވީއަށް އިތުބާރު ހުރި މަސްދަރަކުން މައުލޫމާތު ދިން ގޮތުގައި މަޑުއްވަރީގައި ފުލުހުން ހާއްސަ އޮޕަރޭޝަނެއް ކުރިއަށް ގެންދަނީ ކުރިންވެސް ހަރުކަށި ފިކުރު ފަތުރަމުން ދާކަމުގެ ތުހުމަތުގައި ބަލާ ފާސްކުރި އެރަށު "އައިޝާ" ނަމަކަށް ކިޔާ ގެޔެކެވެ. މިއީ ހަރުކަށި ފިކުރު ފަތުރާ ކަމުގެ ތުހުމަތުގައި ހައްޔަރުކޮށްފައިވާ ހުސައިން ސިޔާދުގެ ގެ ކަމަށް މައުލޫމާތު ލިބެއެވެ. ސިޔާދަކީ ހަރުކަށި ފިކުރާ ދެކޮޅަށް، ރ. މަޑުއްވަރީގައި ފުލުހުންނާއި ކަމާބެހޭ އިދާރާތަކުން ގުޅިގެން ކުރިއަށް ގެންދިޔަ އޮޕަރޭޝަނުގައި ޖެނުއަރީ މަހުގެ 7 ވަނަ ދުވަހު ހައްޔަރުކުރި 3 ފިރިހެނުން ތެރެއިން އެކަކެވެ.
ރާއްޖެއެމްވިއަށް މައުލޫމާތު ލިބިފައިވާ ގޮތުގައި، އެ ރަށުގައި 20ށް ވުރެ ގިނަ ފުލުހުން ރައޮޓް ގިއަރގައި ހަރަކާތްތެރިވަމުން އެބަދެއެވެ. އަދި އެންމެ ގެއެއް ބަލައި ފާސްކުރި ކަމުގައި ވީނަމަވެސް އިތުރު ގެތައް ބަލާ ފާސްކުރާނެ ކަމަށް ވެސް ވަނީ މައުލޫމާތު ލިބިފައެވެ. މައުލޫމާތު ލިބިފައިވާ ގޮތުގައި އެ ގޭގައި ދިރިއުޅެމުން ދިޔަ ބީރައްޓެހި ބަޔަކު ވަނީ އަނބުރާ ރ. އުނގޫފާރަށް ގޮސްފައެވެ. އަދި ފުލުހުން ވަނީ އެ މީހުން ދަތުރު ކުރި ލޯންޗު ވެސް ހިފަހައްޓާފައެވެ.
މިކަމާއި ގުޅިގެން ފުލުހުން ބުނެފައިވަނީ، ކޮވިޑް-19 ފެތުރުން ކޮންޓްރޯލް ކުރުމަށް ސިއްހީ ކުއްލި ނުރައްކަލުގެ ހާލަތު އިޢުލާނުކޮށް ދަތުރު ފަތުރު ކުރުން މަނާކޮށްފައި އޮތްއިރު، ރަސްމީ އެއްވެސް އިދާރާއަކުން ނަގަންޖެހޭ ހުއްދަ ނެގުމަކާނުލައި ރ. އަތޮޅުގެ ފަޅު ރަށެއްގައި ބަޔަކު އުޅޭކަމަށާއި އަދި ޖަމާޢަތް ހަދައިގެން މީހުން ދިރިއުޅޭ ރަށްރަށާއި ރިސޯޓްތަކަށް އަރައި ރާވައިގެން ބޮޑެތި ވައްކަންތައް ކޮށް މުދަލަށް ގެއްލުންދޭ މައްސަލައަކާ ގުޅިގެން ފުލުހުން ހިންގާ ހަރަކާތެއް ރ. އަތޮޅުގައި ފުލުހުން ކުރިއަށް އެބަދާކަމަށެވެ.
މައުލޫމާތު ލިބިފައިވާ ގޮތުގައި، ފުލުހުން އެ ގެ ބަލާ ފާސްކުރުމަށް ގޮސްފައިވަނީ ކޯޓު އަމުރެއް ހިފައިގެންނެވެ. އަދި މިހާތަނަށް އެ ގޭގެ ތެރެއަށް ވަދެފައި ނުވާކަމަށް މައުލޫމާތު ލިބެއެވެ.
އެ ރަށުގައި ހަރުކަށި ފިކުރު ފަތުރައި ދައުލަތުގެ އާންމު ނިޒާމާއި އިންތިޒާމުތަކުން ބޭރުން ވަކި ޖަމާޢަތް ހަދައިގެން އުޅޭ ބަޔަކު، އަންހެނުންނާއި ކުޑަކުދިންގެ ޙައްޤުތަކުން މަޙްރޫމުކޮށް އެ ފަރާތްތަކަށް ނާޖާއިޒު ފައިދާނަގައި، އަންހެނުންނާއި ކުޑަކުދިން މުޖުތަމަޢާއި ވަކިކޮށް ވެކްސިން ނުދީ، ތަޢުލީމު ޙާޞިލުކުރުމުން މަހްރޫމުކޮށް އަންހެނުންނާއި ކުޑަކުދިންގެ ފުރާނާ އަށް ނުރައްކާތެރި ޙާލަތްތަކަށް ހުށައެޅިފައިވާތީ އެކަން ކުރުމުގައި އިސްވެ ޙަރަކާތްތެރިވާ ފަރާތްތައް ހޯދަން، މީގެ ކުރިންވެސް މަޑުއްވަރީގައި ވަނީ އޮޕަރޭޝަނެއް ކުރިޔަށް ގެންގޮސްފައެވެ.
ފުލުހުން އެއިރު ބުނީ، މަޑުއްވަރީގައި ޙަރަކާތްތެރިވާ ހަރުކަށި ފިކުރުތަކަށް ތާޢީދުކޮށް އެފަދަ ޢަމަލުތައް ފަތުރަން މަސައްކަތްކުރާ ފަރާތްތަކުން ޤަބޫލުކުރާ ކުރުމެއްގެ މައްޗަށް ބިނާކޮށް ހައްޤަކާއި ނުލައި މީހުންގެ މުދަލާއި ތަކެއްޗަށް އަރައިގަނެ ޓެރަރިޒަމާއި ހައްދުފަހަނައަޅާފައިވާ ޢަމަލުތައް ހިންގާ ޖަމާޢަތްތަކަށް ތާޢީދުކޮށް އެކަން ދިފާޢުކޮށް ފަތުރަން މަސައްކަތް ކުރަމުންދާ ފަރާތްތަކަށް ފުލުހުންނާއި ސިފައިން ގުޅިގެން ފިޔަވަޅު އަޅަމުން ގެންދާނެ ކަމަށެވެ.
