ކޮވިޑް-19 ފެތުރުން ކޮންޓްރޯލް ކުރުމަށް މާލެ ސަރަޙައްދުގައި މިސްކިތްތަކުގައި ޖަމާޢަތުގައި ނަމާދުކުރުން މެދުކަނޑާލާފައިވާއިރު، އަލުން ޖަމާޢަތުގައި ނަމާދުކުރެވޭނެ ވަކި ތާރީޚެއް އަދި ދަންނަވަން ނޭނގޭ ކަމަށް އިސްލާމިކް މިނިސްޓަރު ޑރ. އަޙްމަދު ޒާހިރު ވިދާޅުވެއްޖެއެވެ.

ހޯމަ ދުވަހު ކުރިއަށްދިޔަ ރައްޔިތުންގެ މަޖިލީހުގެ ޖަލްސާގައި ވަޒީރުންނާއި ސުވާލުކުރުމުގެ އެޖެންޑާގެ ދަށުން މާލެ ސަރަހައްދުގައި ޖަމާޢަތުގައި ނަމާދުކުރެވޭނީ ކޮންދުވަހަކުންތޯ މެމްބަރަކު ކުރެއްވި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ މިސްކިތްތަކުގައި ޖަމާޢަތުގައި ނަމާދުކުރެވޭނީ ކިހާތާކުތޯ ބެލުމުގެ ކަންކަން ހެލްތު ޕްރޮޓެކްޝަން އެޖެންސީ (އެޗްޕީއޭ) އާ ވާހަކަ ދައްކައިގެން ކުރިއަށް ގެންދާ ކަމަށެވެ. އަދި މިސްކިތްތަކުގައި ޖަމާޢަތުގައި ނަމާދުކުރުމަށް ނިންމާނީ ހާލަތަށް ރިޢާޔަތްކުރުމަށް ފަހު ކަމަށް މިނިސްޓަރު ވިދާޅުވިއެވެ.

ކޮވިޑް-19 އާ ގުޅިގެން މާލެ ސިޓީގެ މިސްކިތްތަކުގައި ނަމާދުކުރުން މުޅިން ބަންދުކޮށްފައިވަނީ އޭޕްރީލް މަހުގެ 15 ވަނަ ދުވަހުން ފެށިގެންނެވެ. އޭގެ ފަހުން މި މަހުގެ 14 ވަނަ ދުވަހު ވަނީ ޖަމާޢަތުގައި ނަމާދު ކުރުން މަނާކޮށް، ވަކިވަކިން ނަމާދު ކުރެވޭ ގޮތަށް މާލެ ސަރަހައްދުގެ މިސްކިތްތައް ހުޅުވާލާފައެވެ.

އެ ހުއްދަ ދެމުން އިސްލާމިކް މިނިސްޓްރީން ނެރެފައިވާ ބަޔާނުގައި ބުނެފައިވަނީ މިނިސްޓްރީން ސަމާލުކަން ދިނުމަށް އަންގާފައިވާ ކަންކަމަށް ސަމާލުކަން ދިނުމާއެކު މާލެ ސަރަހައްދުގެ މިސްކިތްތަކުގައި ވަކިވަކިން ނަމާދު ކުރުން އެންމެ ރަނގަޅު ކަމުގައެވެ. އަދި މިގޮތަށް މިސްކިތްތައް ހުޅުވާލިކަމުގައި ވީނަމަވެސް، އިމާމާ މިސްކިތުގައި ޖަމާޢަތް ހަދައިގެން ނަމާދުކުރާ ގޮތަށް ހަމަޖެހިފައިނުވާތީ، އިމާމުން ބަންގީގެ ފަހުގައި "ޞައްލޫ ފީ ބުޔޫތިކުމް" މިފަދައިން 2 ފަހަރު ގޮވުމަށް ވަނީ އަންގާފައެވެ.

އަދި ލޮކްޑައުންގެ ހާލަތަށް ލުއި ދިނުމުގައި މަރުޙަލާތަކަކަށް ބަހާލެވިގެން ކުރިއަށް ގެންދިއުމަށް ނިންމާފައިވާތީ، ހާލަތަށް ރިޢާޔަތްކޮށް އިތުރު ލުއިތަކެއް ދިނުމަށް އެޗްޕީއޭއިން ކަނޑައަޅައިފި ހާލަތެއްގައި ޖަމާޢަތުގައި ނަމާދުކުރުމާ ގުޅޭގޮތުން އިތުރު ލުއިތައް ދެމުން ދާނެ ކަމަށް އިސްލާމިކް މިނިސްޓްރީން ވަނީ ބުނެފައެވެ.