ޝަރުތުތަކާއެކު ހިލޭ ޑިގްރީ ޕްރޮގްރާމްގައި ބައިވެރި ކުރުމަށް އެޑިއުކޭޝަން މިނިސްޓަރު ހުށައަޅުއްވައިފި
21 ޖޫން 2020 | އާދީއްތަ 14:45އެެއްޗެއް ހިލޭ ލިބެންޏާ ވެލިއު ދަށްވެދާނެ
އެޑިއުކޭޝަން މިނިސްޓަރު ޑރ. އައިޝަތު އަލީ
ހިލޭ ޑިގްރީ ޕްްރޮގްރާމްގައި ބައިވެރިވާން ޝަރުތުތަކެއް ހިމެނުމަށް އެޑިއުކޭޝަން މިނިސްޓަރު ޑރ. އައިޝަތު އަލީ ހުށައަޅުއްވައިފިއެވެ.
ތައުލީމީ ބިލް ދިރާސާ ކުރުމަށް އާދިއްތަ ދުވަހު ކުރިޔަށް ދިޔަ ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގައި، އެޑިއުކޭޝަން މިނިސްޓަރު ވިދާޅުވީ، އެއްވެސް އެއްޗެއް ހިލޭ ލިބޭކަމަށްވާނަމަ އޭގެ އަގު ކުޑަވެގެން ހިނގާދާނެ ކަމަށެވެ. އަދި ދައުލަތުން ޑިގްރީއަށް ހަރަދު ކުރާތީވެ ޑިގްރީއެއް ހަދައިގެން އޭގެ އެއްވެސް ބޭނުމެއް ނުކުރެވޭތަން މުސްތަގުބަލުގައި ފެނިގެން ހިނގައިދާނެ ކަމަށް ވިދާޅުވިއެވެ.
އޭގެ އިތުރުން ޑރ. އައިޝަތު އަލީ ވިދާޅުވީ، އަލަށް ތައުލީމީ ދާއިރާއަށް ނިކުންނަ ޓީޗަރެއްނަމަ އެންމެ މަދުވެގެން ހަތަރު އަހަރުގެ ޑިގްރީއެއް އޮންނަން ޖެހޭނެ ކަމަށާއި، ބޭނުންވަނީ ފެންވަރު ރަނގަޅު ޓީޗަރުން ކަމަށެވެ.
އެ ކޮމިޓީގައި ވާހަކަ ދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަބްދުﷲ ރަޝީދު އަހުމަދު ވިދާޅުވީ، ހިލޭ ޑިގްރީ ދިނުމުގައި ޝަރުތުތަކެއް ހުންނައިރުގައި އެ ހަދާ ކޯހަކީ ނެޝަނަލް ޑިވޮލޮޕްމެންޓުގެ ރިކުއަރމަންޓަކަށް ވާން ޖެހޭނެ ކަމަށެވެ. އަދި ހިލޭ ޑިގްރީއަށް ދައުލަތުން ހަރަދުކުރަންވާނީ އެ ދުވަސްވަރަކު ނެޝަނަލް ޑިވޮލޮޕްމެންޓަށް ބޭނުންވާ ރިކުއަރމެންޓަށް ފެތޭ ކޯހެއް ކަމަށް ވާނަމަ ކަމަށެވެ.
