ބާސާއަށް 6.7 މިލިއަން ޔޫރޯ އަނބުރާ ދައްކަން ނޭމާގެ މައްޗަށް އަމުރުކޮށްފި

ބޯނަހުގެ މައްސަލައިގައި 6.7 މިލިއަން ޔޫރޯ ބާސެލޯނާއަށް އަނބުރާ ދައްކަން ނޭމާގެ މައްޗަށް ބާސެލޯނާގެ ކޯޓަކުން އަމުރުކޮށްފިއެވެ.

2017 ވަނަ އަހަރު ޕީއެސްޖީން ނޭމާ ގެންދިޔައީ ބާސެލޯނާ އާއެކު އޭނާ ހަދާފައިވާ އެއްބަސްވުން އުވާލުމަށް 222 މިލިއަން ޔޫރޯ ދެއްކުމަށްފަހުއެވެ. ރިޕޯޓުތައް ބުނާ ގޮތުން ބާސާއިން ނޭމާގެ އެއްބަސްވުން އާކުރީ ބޯނަހުގެ ގޮތުގައި 43 މިލިއަން ޔޫރޯ ނޭމާއަށް ދޭ ގޮތަށް އެއްބަސްވުމަށްފަހުއެވެ. އެގޮތުން އޭގެ ތެރެއިން 14 މިލިއަން ޔޫރޯ މީގެ ކުރިން ނޭމާއަށް ދީފައިވާ ކަމަށް ރިޕޯޓުތައް ބުނެއެވެ.

ބާސާއިން ނޭމާ ވިއްކާލަން ބޭނުންނުވި ނަމަވެސް، ނޭމާ ޕީއެސްޖީއަށް ބަދަލުވާން ބޭނުންވުމުން، އެއްބަސްވުން އުވާލުމަށްފަހު ބާސާއިން ވަނީ ނޭމާ ވިއްކާލާފައެވެ. އެހެންކަމުން ބޯނަހުގެ ގޮތުގައި ދިން 14 މިލިއަން ޔޫރޯގެ އިތުރުން ބާސާއަށް ލިބުނު ގެއްލުމުގެ ބަދަލުގައި އިތުރު 8.5 މިލިއަން ޔޫރޯ އަނބުރާ ހޯދަން ބާސާއިން ވަނީ މަސައްކަތް ކޮށްފައެވެ.

ހުކުރު ދުވަހު ސްޕެއިންގެ ބާސެލޯނާގެ ކޯޓަކުން މި މައްސަލައިގައި ހުކުން އިއްވިއިރު، ބާސާއިން އަނބުރާ ހޯދަން ބޭނުންވި ފުރިހަމަ އަދަދު ދައްކަން ކޯޓުން އަމުރު ނެރެފައެއް ނުވެއެވެ. އެކަމަކު ބާސާއަށް އަނބުރާ 6.7 މިލިއަން ޔޫރޯ ދެއްކުމަށް އެ ކޯޓުން ވަނީ ނޭމާގެ މައްޗަށް އަމުރުކޮށްފައެވެ.

ބާސާ ދޫކޮށް ޕީއެސްޖީއަށް ބަދަލުވި ނޭމާއަށް އެ ކްލަބުގައި އެންމެ އެދެވޭ ކުޅުމެއް ދެއްކިފައި ނުވާއިރު، ނޭމާ އަލުން އަނބުރާ ގެނައުމަށް މިސީޒަން ފެށުމުގެ ކުރިން ބާސާއިން ވަނީ މަސައްކަތް ފަށާފައެވެ. އަދި ނޭމާ ވެސް ވަނީ އޭނާ އެނބުރި ބާސާއަށް ބަދަލުވާން ބޭނުންވާކަން ހާމަކޮށްފައެވެ.

ރިޕޯޓުތައް ބުނާ ގޮތުން ނޭމާ އަލުން އަނބުރާ ހޯދުމަށް ކުރިއަށް އޮތް ޓްރާންސްފާ ބާޒާރުގައި ބާސާއިން އެ ކްލަބުގެ ފްރާންސް ފޯވާޑް އެންޓޮއިން ގްރީޒްމަން އާއި ނޭމާ ބަދަލުކުރަން ހުށަހަޅަން އަންނަނީ ތައްޔާރުވަމުންނެވެ. ދާދި ފަހުން ފީފާއިން އެކުވާލި އައު ޓްރާންސްފާ ގަވާއިދުގައިވާ ގޮތުން އެއްބަސްވުން އުވާލަން ދައްކަން ޖެހޭ އަދަދު ނުހިމަނައި ހަދާ އެއްބަސްވުންތަކުގެ ފުރަތަމަ ތިން އަހަރު ހަމަވުމާއެކު، ކުޅުންތެރިޔާ ކްލަބު ބަދަލުކުރަން ބޭނުންވެއްޖެނަމަ، އެ ކުޅުންތެރިޔާ ވިއްކާނެ އަގެއް ކަނޑައަޅާނީ ފީފާއިންނެވެ.

ސްޕެއިންގެ މީޑިއާ ރިޕޯޓުތައް ކުރިން ބުނި ގޮތުގައި ފީފާއިން ނޭމާގެ އެއްބަސްވުމަށް ބެލުމަށް ފަހު، އޭނާގެ އަގު ކަނޑަޅާއިރު އެ އުޅޭނީ 180 މިލިއަން ޔޫރޯގައެވެ. އެހެންކަމުން ބާސާއިން ނޭމާ ހޯދަން ކުރާ ބިޑުގައި މި ސީޒަނުގައި އެ ޓީމާ ގުޅުނު ގްރީޒްމަން ހިމަނާނެ ކަމަށްވެސް ރިޕޯޓުތައް ބުނެއެވެ.

2017 ވަނަ އަހަރު ޕީއެސްޖީއާ ގުޅުނު ނޭމާއަށް އަދި މިހާތަނަށް އެޓީމުގައި އެންމެ އެދެވޭ ކުޅުމެއް ދެއްކިފައި ނުވި ނަމަވެސް، މިހާތަނަށް އޭނާ ޕީއެސްޖީއަށް ކުޅެދިން 80 މެޗުގައި ވަނީ 69 ލަނޑު ކާމިޔާބުކޮށްފައެވެ.