އަތޮޅުތެރޭގެ ބައެއް ސްކޫލުތައް ހުޅުވައިގެން ކިޔަވާ ދެމުންދާ ވާހަކަތައް މިނިސްޓްރީން ދޮގުކޮށްފި
19 ޖޫން 2020 | ހުކުރު 06:55ތިން ސްކޫލަކުން ކުރިންވެސް އެކުގައި މަސައްކަތްތައް ކުރޭ
އެންއީއޯސީގައި ބޭއްވި ނޫސްވެރިންގެ ބައްދަލުވުމެއްގެ ތެރެއިން އެޑިއުކޭޝަން މިނިސްޓަރ ޑރ. އައިޝަތު އަލީ
އަތޮޅުތެރޭގެ ބައެއް ސްކޫލުތައް ހުޅުވައިގެން ކިޔަވާ ދެމުންދާ ވާހަކަތައް އެޑިއުކޭޝަން މިނިސްޓްރީން ދޮގުކޮށްފިއެވެ.
ބުރާސްފަތި ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ އައްޑޫ ހައި ސްކޫލް، ގދ. އަތޮޅު ތަޢުލީމީ މަރުކަޒު އަދި ލ. ގަން ހަމަދު ބިން ޚަލީފާ އައްސާނީ ސްކޫލު ހުޅުވައިގެން ކިޔަވާ ދެމުންދާ ކަމަށް ސޯޝަލް މީޑިއާގައި ހަގީގަތާ ޚިލާފު ވާހަކަތަކެއް ދެކެވެމުންދާ ކަމަށެވެ. އެކަމަކު އެކަން އެގޮތަށް ކުރިއަށްނުދާ ކަމަށް އެޑިއުކޭޝަން މިނިސްޓްރީން ބުނެފައިވާ ކަމަށް މަބްރޫކް ވިދާޅުވިއެވެ.
އެޑިއުކޭޝަން މިނިސްޓްރީއާ ހަވާލާދީ މަބްރޫކް ވިދާޅުވީ މި ތިން ސްކޫލަކީވެސް ކުރިންވެސް އެކުގައި މަސައްކަތްތަކެއް ކުރި ސްކޫލުތަކެއް ކަމަށެވެ. އެގޮތުން ތިން ސްކޫލުން އެކުވެގެން ކުރެވުނު މަސައްކަތުގެ ތެރެއިން މިދުވަސްވަރު އޮންލައިން ކްލާސްތަކެއް ކުރިއަށް ގެންގޮސްފައިވާ ކަމަށް މަބްރޫކް ވިދާޅުވިއެވެ.
ކޮވިޑް ނެތް ރަށްރަށުގައި، އަންނަ ޖުލައި މަހުގެ އެކެއްގައި ސްކޫލުތައް ހުޅުވާލަން މިހާރު ވަނީ ނިންމާފައެވެ. ނިއު ނޯމަލްގައި ސްކޫލުތައް ހުޅުވާލާނީ ފޭސްތަކަކަށް ބަހާލައިގެންނެވެ.
އެޑިއުކޭޝަން މިނިސްޓްރީން ބުނީ ސްކޫލުތައް ހުޅުވާލައިރުވެސް އެންމެ ބޮޑަށް އިސްކަމެއްދެނީ ސްކޫލުގެ ދަރިވަރުންގެ ޞިއްޙީ ރައްކާތެރި ކަމަށެވެ. އެކަމަކު ކޮވިޑް ބަލީގެ ހާލަތުގައި ސްކޫލުތައް ހުޅުވަން ނިންމީ، އެއީ ވަރަށް މުހިއްމު ކަމެއް ކަމަށް ދެކޭތީ ކަމަށާއި، ގިނަ ދުވަސްތަކަކަށް ސްކޫލުތައް ބަންދުކޮށްފައި އޮތުމުން ދަރިވަރުން ވަރަށް ގިނަ ކަންތައްތަކުން މަހުރޫމް ވެފައިވާތީ ކަމަށް މިނިސްޓްރީން ބުނެއެވެ.
އެޑިއުކޭޝަން މިނިސްޓްރީން ބުނީ، ސްކޫލުތައް ހުޅުވާލުމުގެ ޕްލޭން ހަދާފައިވަނީ ޔުނިސެފްއާ ގުޅިގެން ކަމަށެވެ. ޕްލޭން ބެހިގެންވަނީ މައިގަނޑު ފަސް ބަޔަކަށެވެ. އެއީ ސްކޫލުތައް ރައްކާތެރިކަމާއިއެކު ހިންގުމާއި، ކިޔަވައިދިނުމާއި އުނގެނުމާއި، މެދުނުކެނޑި ކުރިޔަށް ދިޔުމާއި، ވަލްނަރަބަލް ކުދިންނާ ހަމަޔަށް ވާސިލްވުމުގެ އިތުރުން ބަލިން ރައްކާތެރިވުމާއި ''ރެޒިލިއަންސް'' ބިލްޑް ކުރުމެވެ.
ރައްކާތެރިކަމުގެ ފިޔަވަޅެއްގެ ގޮތުން ހުރިހާ ސްކޫލުތަކެއްގައި އަތް ދޮވެވޭނެ އިންތިޒާމު ހަމަޖެއްސުމުގެ ވަސީލަތްތައް ފޯރުކޮށް ދިނުމުގެ މަސައްކަތް ދަނީ ކުރަމުންނެވެ. އަދި އޭގެ އިތުރުން ސްކޫލުތައް ޑިސްއިންފެކްޓު ކުރުމަށް ބޭނުންވާ ތަކެތި ފޯރުކޮށް ދިނުމުގެ މަސައްކަތް ކުރަމުންދާ ކަމަށްވެސް މިނިސްޓްރީން ބުނެއެވެ. އަދި ސްކޫލުތަކަށް ދަރިވަރުން ވެއްދުމުގެ ކުރިން ގޭޓް ކައިރިން ހުން ހުރިތޯ ޗެކްކުރާނެއެވެ. ފިޒިކަލް ޑިސްޓެންސިންގެ އިސްކަން ދިނުމުގެ ގޮތުން ސްކޫލުތަކުގެ ކްލާސް ރޫމްތަކުގެ ސައިޒް މިހާރު ވަނީ ކުޑަކޮށްފައެވެ. އެގޮތުން 30 އާއި 32 ދަރިވަރުން ތިބޭ ކްލާސްތަކުގެ ސައިޒް މިހާރު 16ށް ވަނީ ބަދަލުކޮށްފައެވެ.
