ބޮލްސޮނާރޯގެ ދަރިކަލުންގެ އަރިސް ބޭފުޅެއްގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއް!

ބްރެޒިލްގެ ރައީސް ހައިރް ބޮލްސޮނާރޯގެ ދޮށީ ދަރިކަލުންގެ އަރިސް ބޭފުޅެއްގެ މައްޗަށް ކޮރަޕްޝަންގެ ބޮޑެތި ތުހުމަތުތަކެއް ކުރެވިއްޖެއެވެ.

ބީބީސީގައި ރިޕޯޓް ކޮށްފައިވާ ގޮތުން ބޮލްސޮނާރޯގެ ދޮށީ ދަރިކަލުންގެ އަރިސް ބޭފުޅެއް ކަމަށްވާ ފެބްރިސިއޯ ކުއެރޯޒްގެ މައްޗަށް އުފުލާފައިވާ ތުހުމަތުތަކާއި ގުޅިގެން އޭނާ ވަނީ ހައްޔަރު ކޮށްފައެވެ. އޭނާގެ މައްޗަށް ތުހުމަތު ކުރެވެނީ ފްލަވިއޯ ބޮލްސޮނާރޯ ދައުލަތުގެ ޤާނޫނު ހަދާ މަޖިލިހުގައި އުޅުއްވިއިރު، ރިއޯ ޑި ޖެނީރޯގެ އެސެމްބްލީގެ މުވައްޒަފުންތަކަކަށް މުސާރަ ދިނުމުގައި ހިޔާނަތްތެރި ވެފައިވާ ކަމުގެ ކުށުގެ ތުހުމަތެވެ. ކުއެރޯޒްގެ އަމަލުގައި ޝާމިލުނުވާ ކަމަށް ފްލަވިއޯ ބޮލްސޮނާރޯ ބުނެފައިވެއެވެ.

ރިޕޯޓްތައް ބުނާގޮތުން މި ކޭސްއާ ގުޅިގެން ބްރެޒިލްގެ ރައީސް ބޮލްސޮނާރޯއަށް ވަނީ ބޮޑެތި ފާޑުކިއުންތަކެއް އަމާޒުވެފައެވެ. އެގޮތުން މިދިޔަ އަހަރުގެ ޖެނުއަރީ މަހު ބޮލްސޮނާރޯ ބްރެޒިލްގެ ރައީސްކަަމަށް ވަޑައިގެންނެވިއިރު، ވެވަޑައިގެންފައިވާ އެންމެ ބޮޑު ވައުދުފުޅަކީ އެ ޤައުމުން ކޮރަޕްޝަން ނައްތާލާނެ ކަމާއި، ކުށްތަކަށް ހަރުކަށި އަދަބު ދެއްވާނެ ކަމުގެ ވައުދުފުޅެވެ.

އޭގެ އިތުރުން، މި ދަނޑިވަޅަކީ ބްރެޒިލްގައި ކޮވިޑް-19 ފެތުރުން ކޮންޓްރޯލް ކުރުމަށް ބްރެޒިލްގެ ސަރުކާރުން ނުކުޅެދިފައިވާ ކަމަށް ބުނެ، އާންމުންގެ ގިނަ ފާޑުކިއުންތަކެއްވެސް ރައީސް ބޮލްސޮނާރޯއަށް އަމާޒުވެފައިވާ ދަނޑިވަޅެކެވެ. އެގޮތުން ބްރެޒިލްއިން ޕޮޒިޓިވްވި މީހުންގެ އަދަދު 955،000ށް ވުރެވެސް އިތުރުވެފައިވާއިރު، ބްރެޒިލްއަކީ މިހާތަނަށް މުޅި ދުނިޔެއިން ދެވަނައަށް އެންމެ ގިނަ މީހުން ޕޮޒިޓިވްވެފައިވާ އަދި މަރުވެފައިވާ ޤައުމުވެސްމެއެވެ.