އައު އާންމު ހާލަތުގައި މާލޭ ލޯކަލް މާރުކޭޓް ހުޅުވުމަށް ވާންޖެހޭ ތައްޔާރީތައް ފަށައިފި
18 ޖޫން 2020 | ބުރާސްފަތި 17:49ލޯކަލް މާރުކޭޓް ދެން ހުޅުވޭނީ އައު އާންމު ހާލަތާ އެއްގޮތަށް
މާލެ ސިޓީ ކައުންސިލްގެ މޭޔަރ ޝިފާ މުހައްމަދު
މާލޭގެ ލޯކަލް މާރުކޭޓް ހުޅުވުމަށް ވާންޖެހޭ ތައްޔާރީތައް މާލެ ސިޓީ ކައުންސިލުން ފަށައިފި އެވެ.
ކޮވިޑް-19 ރޯގާ މާލޭ ސިޓީގައި ފެތުރެން ފެށުމުން މާލެ ސިޓީ ސަރަހައްދު ފުރަބަންދު ކުރުމާ ގުޅިގެން މާލޭގެ ލޯކަލް މާރުކޭޓްތައް ބަންދުކޮށްފައި ވެއެވެ. މާލެ ސިޓީ ސަރަހައްދު ފުރަބަންދު ކޮށްފައިވަނީ އޭޕްރީލް މަހުގެ 15 ވަނަ ދުވަހު އެވެ. މާލެ ސިޓީ ފުރަބަންދު ކުރުމުން މާލޭގައި ހުރި ލޯކަލް މާރުކޭޓްތައް ހުސްކުރުމުގެ މަސައްކަތް މާލެ ސިޓީ ކައުންސިލުން ފެށިއެވެ.
މާލެ ސިޓީ ކައުންސިލުން ބުނެފައިވާ ގޮތުގައި، މާލެ ސިޓީގެ ފުރަބަންދަށް ލުއި ދޭން ފެށުމުން މާލެ ސިޓީގެ ލޯކަލް މާރުކޭޓް އަލުން ހުޅުވުމަށްޓަކައި ވާންޖެހޭ ތައްޔާރީތައް އެ ކައުންސިލުން ދަނީ ވަމުންނެވެ. އެގޮތުން، މާލެ ސިޓީ ކައުންސިލްގެ ޓީމަކުން ލޯކަލް މާރުކޭޓަށް ގޮސް ވަނީ އިންސްޕެކްޓް ކޮށްފަ އެވެ.
އައު އާންމު ހާލަތާ އެއްގޮތަށް، މާލޭގެ ލޯކަލް މާރުކޭޓްތައް ހުޅުވުމަށް ތައްޔާރު ވަމުންދާއިރު، ޚިދުމަތް ދިނުމުގައި އަމަލު ކުރަންޖެހޭ އުސޫލުތައް މާލޭ ސިޓީ ކައުންސިލުން ވަނީ އާންމުކޮށްފައެވެ.
މާލޭ ސިޓީ ކައުންސިލުން ނެރެފައިވާ މިންގަނޑުތަކަކީ ހެލްތް ޕްރޮޓެކްޝަން އެޖެންސީ (އެޗްޕީއޭ)ގެ އުސޫލުތަކާއި އެއްގޮތްވާގޮތުގެ މަތިން ކަނޑައަޅާފައިވާ މިންގަނޑެއްކަމަށް ސިޓީ ކައުންސިލުން ބުނެއެވެ. އެގޮތުން މާރުކޭޓުތަކުގައި ހިންގާ ގޮޅިތަކުގައި ހިފަހައްޓަންޖެހޭ ސާފުތާހިރުކަމުގެ މިންގަނޑުތަކާއި ހިދުމަތްދޭން ތިބޭ ފަރާތްތަކުގެ ސާފުތާހިރުކަން ހުންނަންޖެހޭ މިންގަނޑުތަކުގެ އިތުރުން ވިއްކަން ބަހައްޓާ ތަކެތީގެ ސާފުތާހިރުކަމުގެ މިންގަނޑުތައްވެސް މި އުސޫލުގައި ހިމެނިފައިވެއެވެ. މީގެއިތުރުންވެސް، ސާފުތާހިރުކަމާއި، ކާބޯތަކެތީގެ ރައްކާތެރިކަމުގެ ގިނަ ފިޔަވަޅުތަކެއް އެޅުމަށް އެސޫލްގައި ވެއެވެ.
ކޮވިޑް-19 ރޯގާ ރާއްޖޭގައި ފެތުރެން ފެށުމާއި ގުޅިގެން، މާލެ ސިޓީގެ ފުރަބަންދަށް މިއަދަށް 103 ދުވަސް ވެފައިވާއިރު، މިހާރު މިހިނގަނީ ފުރަބަންދަށް ލުއި ދިނުމުގެ ދެވަނަ ފޭސް އެވެ.
އަންނަ ޖުލައި މަހުން ފެށިގެން ރާއްޖޭގެ ބޯޑަރުތައް ހުޅުވައި، ރާއްޖޭގެ ޓޫރިޒަމްގެ ސިނާއަތް ފެށުމަށް ސަރުކާރުން ދަނީ މަސައްކަތް ކުރަމުން ނެވެ.
