އެމްޓީސީސީއަށް ލިބެންޖެހޭ 800 މިލިއަން ރުފިޔާ އެބަހުރި، ކޯޓު މަރުހަލާގައި 38 މިލިއަން ރުފިޔާ!
ފައިސާ ހޯދުމުގެ މަސައްކަތް މިހާރު ދަނީ ކުރަމުން
އެމްޓީސީސީގެ ހެޑް އޮފީސް
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އަށް ލިބެންޖެހޭ 800 މިލިއަން ރުފިޔާ އެބަހުރި ކަމަށް އެ ކުންފުނީގެ ސިއީއޯ އާދަމް އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން އާޒިމް ވިދާޅުވީ، އެކި ތަންތަނުން ކުންފުންޏަށް ލިބެންޖެހޭ ފައިސާ ހޯދުމަށް ރަނގަޅަށް މަސައްކަތް ނުކުރެވުމުގެ ސަބަބުން 800 މިލިއަން ރުފިޔާ ނުލިބި އެބަހުރިކަމަށެވެ. އެގޮތުން އެކި އެކި ކޯޓު މަރުހަލާގައި 38 މިލިއަނަށް ވުރެ ގިނަ ރުފިޔާ ހޯދުމަށް އެބަހުރި ކަމަށެވެ. އޭނާ ވިދާޅުވީ، އެތައް ޒަމާނެއް ވަންދެން މީހުންނަށް ދައްކަންޖެހޭ ފައިސާ ނުދައްކާ ހުރުމުގެ ސަބަބުން 100 މިލިއަނަށް ވުރެ ގިނަ ރުފިޔާ އެ ފަރާތްތަކަށް ދައްކަން ޖެހިފައިވާކަމަށެވެ.
ޕްރޮގުރާމުގައި ވާހަކަ ދައްކަވަމުން އާޒިމް ވިދާޅުވީ، ވަޒީފާގެ މާހައުލުގައި ހޭދަކުރަންޖެހޭ ވަގުތު ތަކުގައި ރަނގަޅަށް މަސްއޫލިއްޔަތުތައް އަދާކުރެވޭ ނަމަ އެއްވެސް މަސައްކަތެއް ނުނިމި ނުހުންނާނެ ކަމަށެވެ. ބޮޑު ތިން ކުންފުންޏެއްގެ އިސްމަގާމު ފުރުއްވި ބޭފުޅެއްގެ ހައިސިއްޔަތުން، މަސައްކަތްތައް ތޮއްޖެހުމުގެ މައްސަލައަކީ ކުންފުނި ހިންގަން ހަވާލުކުރި ފަރާތްތަކުން، އެކަންކަމަށް އިސްކަން ނުދިނުމުގެ ނަތީޖާކަމަށް އާޒިމް ވަނީ ވިދާޅުވެފައެވެ.
މާޒީގައި ކަންތައް ކޮށްފައި ހުރި ގޮތުން ޑޮކިއުމެންޓްތައް ނެތުމާއި ގުޅިގެން ކޯޓުތަކުން އެ ފައިސާ ލިބުމުގައި ގިނަ ގިންޖެހުންތަކާއި ކުރިމަތުވަމުން ދާކަން ފާހަގަކޮށް އާޒިމް ވިދާޅުވީ، ބެކް ލޮގްގައި ހުރި ކަންތައްތައް ކުރަމުން އަދި މިހާރު ހިންގަމުންދާ ޕްރޮޖެކްޓްތައް ހިންގަމުން މިފަދަ ކަންތައް ހައްލުކުރުމަކީ ވަރަށް އުނދަގޫ ކަމަށެވެ. ކިތަންމެ ގޮންޖެހުންތަކެއް ހުރި ނަމަވެސް އެކަންތައް ހައްލުކުރުމަށް ކުރެވެން ހުރި ހުރިހާ މަސައްކަތްތަކެއް ކުރައްވާނެކަމަށް އާޒިމް ވިދާޅުވިއެވެ.
އާޒިމް މިހެން ވިދާޅުވެފައިވާއިރު، ޑީއާރުޕީން އެމްޓީސީސީން ހޯދާފައިވާ ޚިދުމަތްތަކުގެ އަގުގެ ގޮތުގައި ދަންކަންޖެހޭ 1،111،438.96ރ. ދައްކަން ސިވިލް ކޯޓުން ކޮށްފައިވާ ހުކުމަށް ހައިކޯޓުން ވަނީ ތާއީދުކޮށްފައެވެ. އަދި އިސްތިއުނާފް ކުރުމުގެ ފުރުސަތު ދެވެން ނެތްކަމަށް ސުޕްރީމް ކޯޓުންވެސް ވަނީ ނިންމައިފައެވެ.
