ބައްޕަގެ ބަލި ހާލާތުގެ ނާޖާއިޒު ފައިދާ ސިޔާސީ ފަރާތްތަކުން ދަނީ ނަގަމުން: ޝުނާނާ
17 ޖޫން 2020 | ބުދަ 17:43އެކި ފަރާތްތަކުން ފުރައްސާރަކުރަމުންދާ ކަމަށް ޝުނާނާ ވިދާޅުވި
އިބްރާޙިމް ޖައުފަރު (ޖޯރޭ)، ރައީސް ޑރ. ވަހީދު ވަނީ މައްސަލަ އަނބުރާ ނަންގަވާފައި
އެމްޑީޕީގެ ހަރަކާތްތަކުގައި ފޮޓޯގްރާފަރެއްގެ ގޮތުގައި މަސައްކަތްކޮށްފައިވާ އިބްރާހިމް ޖައުފަރު (ޖޯރޭ) ގެ ނަފްސާނީ ހާލާތުގެ ނާޖާއިޒު ފައިދާ ސިޔާސީ ފަރާތްތަކުން ނަގަމުންދާ ކަމަށް ވިދާޅުވެ، އޭނާގެ ދަރިފުޅު އަދި މަޝްހޫރު ގާނޫނީ ވަކީލާ މަރިޔަމް ޝުނާނާ ކަންބޮޑުވުން ފާޅުކުރައްވައިފިއެވެ.
އުސްފަސްގަނޑު ސަރަހައްދުގައި، ކުރީގެ ރައީސް ޑރ. މުހައްމަދު ވަހީދު ހަސަން މަނިކު އުޅުއްވަނިކޮށް އެމަނިކުފާނާއި އެމަނިކުފާނުގެ އަނބިކަނބަލުންނަށް ޖައުފަރު ދިމާކުރި ކަމަށް ވަނީ ތުހުމަތު ކޮށްފައެވެ. އެކަމާއި ގުޅިގެން އެކި ފަރާތްތަކުން ދަނީ ސޯޝަލް މީޑިއާގައި ޖައުފަރުއާ ގުޅުވައިގެން އެކި ކަހަލަ ވާހަކަ ދައްކަމުންނެވެ.
އެކަންތައްތަކާއި ބެހޭ ގޮތުން ކަންބޮޑުވުން ފާޅުކުރައްވަމުން ޝުނާނާ ނެރުނު ބަޔާނެއްގައި ވިދާޅުވީ، އޭނާގެ ފަރާތުން އެއްވެސް މީހަކަށް ގޯސްގޮތަކަށް ކަންތައް ކޮށްފައިނުވާނެ ކަމަށާއި، މިހާތަނަށް މަސައްކަތް ކޮށްފައިވާނީ ވަކި ސިޔާސީ ކުލައަކަށް ބެލުމެއްނެތި މީހުންނަށް އެހީފޯރުކޮށް ދިނުމަށް ކަމަށެވެ.
ނަމަވެސް ފާއިތުވި ތިން ދުވަސް ތެރޭގައި، ފުރައްސާރަކޮށް، އަނިޔާކުރުމަށް ހިތްވަރުދީ އަދި ބައެއް ފަރާތްތަކުން އޭނާ ރޭޕްކޮށްލަންވެސް ގޮވާލާފައިވާ ކަމަށެވެ. ޝުނާނާ ވިދާޅުވީ، މީގެ ކުރިން އެމްޑީޕީން ކުރި މުޒާހަރާތަކުގައި ބައްޕައަށް ލިބުނު އަނިޔާތަކުގެ ސަބަބުން ބައްޕަގެ ނަފްސާނީ ހާލަތު އެހާ ރަނގަޅު ނޫން ކަމަށެވެ. ލިބުނު އަނިޔާތަކަށް އިންސާފު ނުލިބި އޭނާގެ އާއިލާއިން އެކަން ކޮންމެ ދުވަހަކު ތަހައްމަލު ކުރަމުންދާ ކަމަށް ވިދާޅުވިއެވެ.
ނަމަވެސް ބައްޕަގެ ހާލަތުގެ ނާޖައިޒު އެނގިތިބެ ބައެއް މީހުން އެކަމުގެ ނާޒާއިޒު ފައިދާ ނަގާ، ގަސްތުގައި ރުޅިއަރުވައި ފުރައްސާރަ ކުރަމުންދާ މިންވަރު އިތުުރުވެފައިވާ ކަމަށެވެ. އަދި ރުޅިއަރުވާލުމަށްފަހު، ވީޑިއޯކޮށް ސޯޝަލް މީޑިއާގައި ދައުރުކުރުވަނީ، ސިޔާސީ ސަބަބުތަކަށްޓަކައި ބައްޕާގެ ހާލާތާމެދު އެއްވެސް އިންސާނިއްޔަތު ކަމެއް ނެތުމުން ކަމަށް ޝުނާނާ ސިފަކުރެއްވިއެވެ.
އެ ވީޑިއޯތަކުގައި، އެ މީހުން މަލާމާތްކޮށް ހޭ އަޑު ވެސް އިވެއެވެ. ޖައުފަރުގެ ނުކުޅެދުންތެރިކަމަށް މަލާމާތްކޮށް ގަނާކުރަމުންދާ ކަމަށް ޝުނާނާ ވިދާޅުވިއެވެ. އެއީ އާއްމުކޮށް ކުރަމުންދާ ކަމެއް ކަމަށް ވިދާޅުވެ، މިއީ ކަންތައްތައްކުރަންވީ ގޮތްތޯ އޭނާ ސުވާލުއުފެއްދެވިއެވެ.
ނަފުސާނީ ގޮތުންނާއި ޖިސްމާނީ ގޮތުން ޖައުފަރަށް އެތައް މައްސަލަތަކެއް ދިމާވެފައިވާކަން އެނގިވަޑައިގަތުމުން، ޖައުފަރާ ދެކޮޅަށް ހުށަހެޅިފައިވާ މައްސަލަ ކުރިއަށް ނުގެންދިއުމަށް ޑރ. ވަހީދު ވަނީ ކަމާއި ބެހޭ އިދާރާތަކުގައި އެދިިވަޑައިގަންނަވާފައެވެ.
