ވިލިއަން ހޯދަން ޔުނައިޓެޑުންވެސް މަސައްކަތް ކުރަނީ

ބްރެޒިލްގެ މިޑްފީލްޑަރު ވިލިއަން ހޯދަން މެންޗެސްޓާ ޔުނައިޓެޑުންވެސް މަސައްކަތް ކުރަމުން އަންނަ ކަމަށް ރިޕޯޓުތައް ބުނެފިއެވެ.

ޗެލްސީއާއެކު ވިލިއަން ހަދާފައިވާ އެއްބަސްވުން މި މަހުގެ 30 ވަނަ ދުވަހު ހަމަވާނެއެވެ. ޗެލްސީން މީގެ ކުރިން ވިލިއަންގެ އެއްބަސްވުން އާކުރަން މަސައްކަތް ކުރި ނަމަވެސް، ވިލިއަން އަށް ކުރު މުއްދަތެއްގެ އެއްބަސްވުމެއް ހުށަހެޅުމުން، އެ އެއްބަސްވުން ގަބޫލު ނުކުރަން އޭނާ ކުރިން ނިންމި ނަމަވެސް، ކޮރޯނާވައިރަސް (ކޮވިޑް-19) އާ ގުޅިގެން ކްލަބުތަކަށް މާލީ ގޮތުން ގޮންޖެހުންތަކާ ކުރިމަތިލާން ޖެހިފައިވުމުން، ކުރު މައްދަތަކަށް ޗެލްސީގެ އެއްބަސްވުން އާކުރަން ވިލިއަން މިހާރު ނިންމާފައިވާ ކަމަށް ރިޕޯޓުތައް ބުނެއެވެ.

މީގެ ކުރިން ހޫނު މޫސުމުގެ ޓްރާންސްފާގައި ހިލޭ ޓްރާންސްފާއެއްގެ ދަށުން ވިލިއަން އެހެން ކްލަބަކަށް ބަދަލުވާން ނިންމި ކަމަށް ރިޕޯޓުތައް ބުނިއިރު، ދާދި ފަހުން ފްރާންސްގެ މީޑިއާތަކުން ވަނީ ވިލިއަން ހޯދުމަށް މެންޗެސްޓާ ޔުނައިޓެޑުންވެސް މަސައްކަތް ކުރަމުން އަންނަ ކަމަށް ރިޕޯޓުކޮށްފައެވެ.

ޔުނައިޓެޑްގެ އިތުރުން ވިލިއަން ހޯދަން މަސައްކަތް ކުރަމުން އަންނަނީ ޓޮޓެންހަމް ހޮޓްސްޕާ، އާސެނަލް، ބާސެލޯނާ، ރެއާލް މެޑްރިޑް އަދި ޔުވެންޓަސް އިންނެވެ. އެކަމަކު މީގެ ކުރިން ވިލިއަން ވަނީ އޭނާ އިންގްލެންޑުގައި މަޑުކުރަން ބޭނުންވާ ކަމަށް ބުނެފައެވެ.

ބްރެޒިލްގެ ކޮރިންތިއަންސްއިން ކެރިއަރު ފެށި ވިލިއަން ޗެލްސީއަށް ބަދަލުވީ 2013 ވަނަ އަހަރުގެ ސީޒަނުގައެވެ. އޭނާ ވަނީ މިހާތަނަށް އެޓީމަށް ކުޅުނު 328 މެޗުގައި 58 ލަނޑު ކާމިޔާބު ކޮށްފައެވެ.

ވިލިއަން ވަނީ ޗެލްސީ އާއެކު އިނގިރޭސި ޕްރިމިއާ ލީގު ދެ ފަހަރު، އެފްއޭ ކަޕް އެއް ފަހަރު އަދި އިނގިރޭސި ލީގު ކަޕް އެއް ފަހަރު ކާމިޔާބު ކޮށްފައެވެ.