ޔޫއެސް އޯޕަންގައި ނުކުޅެން ގިނަ ކުޅުންތެރިން ނިންމަނީ

ޓެނިހުގެ ގްރޭންޑް ސްލޭމް މުބާރާތެއް ކަމަށްވާ ޔޫއެސް އޯޕަން މިއަހަރު ބާއްވަން ނިންމި ނަމަވެސް، އެ މުބާރާތުގައި ނުކުޅެން ގިނަ ކުޅުންތެރިން ނިންމާނެ ކަމަށް މީޑިއާ ރިޕޯޓުތައް ބުނެފިއެވެ.

ޔޫއެސް އޯޕަން ބާއްވަން ނިއުޔޯކްގެ ގަވަރުނަރު އެންޑްރޫ ކޫމޯ ހުއްދަ ދެއްވިއިރު، ޔޫއެސް އޯޕަން މިހާރު ތާވަލުކޮށްފައިވަނީ އޮގަސްޓް މަހުގެ 31ން ސެޕްޓެމްބަރު މަހުގެ 13 ވަނަ ދުވަހުގެ ނިޔަލަށެވެ. މި މުބާރާތުގެ މެޗުތައް ކުޅޭނީ ސަޕޯޓަރުން ނުވައްދައި ކަމަށް މުބާރާތް އިންތިޒާމުކުރާ ފަރާތުން ވަނީ ބުނެފައެވެ.

އެކަމަކު މުބާރާތް ބާއްވާ ނިއުޔޯކް ސިޓީއަކީ އެމެރިކާއިން ކޮރޯނާވައިރަސް (ކޮވިޑް-19) ގެ ނުރައްކާ އެންމެ ބޮޑުވި އެއް ސިޓީއެވެ. އެ ސިޓީން އެކަނި ވެސް ކޮވިޑް-19 ޖެހިގެން 30،000 (ތިރީސް ހާސް) ށްވުރެ ގިނަ މީހުން ވަނީ މަރުވެފައެވެ.

އެހެންކަމުން މިއަހަރުގެ ޔޫއެސް އޯޕަންގައި ނުކުޅެން މަޝްހޫރު ގިނަ ޓެނިސް ކުޅުންތެރިން ނިންމާނެ ކަމަށް މީޑިއާތަކުން ވަނީ ރިޕޯޓުކޮށްފައެވެ. އެގޮތުން ސަލާމަތީ ސަބަބުތަކަށްޓަކައި މި ވަގުތު އެމެރިކާއަށް ދަތުރުކުރުން ރަނގަޅު ނޫން ކަމަށް ބުނެ ޔޫއެސް އޯޕަންގައި ނުކުޅޭނެކަން ނިންމާފައިވާ އެއް ކުޅުންތެރިއަކީ އޮސްޓްރޭލިއާގެ ނިކް ކިރްގިއޯސްއެވެ. އަދި އެންމެ ފަހުގެ ޗެމްޕިއަން ރަފައެލް ނަޑާލްވެސް ވަނީ ޔޫއެސް އޯޕަންގައި ކުޅެން މާ ބޮޑު ޝައުގުވެރިކަމެއް ނެތް ކަމަށް ބުނެފައެވެ. މީގެ އިތުރުން ދުނިޔޭގެ ރޭންކިންގެ އެއްވަނައިގައި އޮތް ސާބިއާގެ ނޮވަކް ޖޮކޮވިޗް ވަނީ މުބާރާތުގައި ކުޅުމާ މެދު ވަކި ގޮތެއް އަދި ނުނިންމާ ކަމަށް ބުނެފައެވެ.

ރިޕޯޓުތައް ބުނާގޮތުން އެމެރިކާގެ އިންތިޒާމުތައް ހުރި ގޮތުންނާއި ދަތުރުފަތުރުކުރުމުގައި ވެސް ގޮންޖެހުންތައް ހުރުމުގެ ސަބަބުން ގިނަ ކުޅުންތެރިންތަކެއް ޔޫއެސް އޯޕަންގައި ނުކުޅޭނެއެވެ.

ކޮވިޑް-19ގެ އަސަރު ޓެނިހުގެ މުބާރާތްތަކަށްވެސް ކޮށްފައިވާއިރު، މި އަހަރުގެ ވިމްބަލްޑަން ޓެނިސް މުބާރާތް މިހާރު ވަނީ ކެންސަލް ކޮށްފައެވެ. މިއީ ދެވަނަ ބޮޑު ހަނގުރާމައަށްފަހު މި މުބާރާތް ނުބާއްވާ ފުރަތަމަ އަހަރެވެ. އަދި ފްރެންޗް އޯޕަން ޓެނިސް މުބާރާތް ވަނީ ސެޕްޓެމްބަރު މަހުގެ 20ން އޮކްޓޯބަރު މަހުގެ 4ށް ފަސްކޮށްފައެވެ.