ހޮނިހިރު ދުވަހުގެރޭ ސްޕެނިޝް ލީގުގައި ބާސެލޯނާ އާއި މަޔޯކޯ ކުޅެމުން ދިޔަ މެޗުގެ ތެރެއިން ދަނޑަށް ވަން ސަޕޯޓަރަށް ދައުވާ ކުރާނެ ކަމަށް ލަލީގާއިން ބުނެފިއެވެ.

ކޮރޯނާވައިރަސް (ކޮވިޑް-19) އާ ގުޅިގެން ރައްކާތެރިކަމުގެ ފިޔަވަޅެއްގެ ގޮތުން ސަޕޯޓަރުން ނުވައްދާ މެޗުތައް ކުޅެނިކޮށް، ބާސާގެ ކެޕްޓަން ލިއޮނެލް މެސީ އާއެކު ސެލްފީއެއް ނަގަން، ދަނޑުގެ ފެންސު މަތިން އަރައި މީހަކު ވަނީ ދަނޑަށް ވަދެފައެވެ.

މެސީ އާއެކު ފޮޓޯއެއް ނަގަން ދަނޑަށް އެރި އެ ސަޕޯޓަރު ހުރީ ދިހަ ނަންބަރާއެކު މެސީގެ ނަން ޖަހާފައިވާ އާޖެންޓީނާގެ ޖާޒީއެއް ލައިގެންނެވެ. މެސީއާ ދިމާލަށް ދިޔުމުގެ ކުރިން ފޯން ހިފައިގެން އޭނާ އެންމެ ފުރަތަމަ ދިޔައީ ޑިފެންޑަރު ޖޯޑީ އަލްބާއާ ދިމާލަށެވެ.

މަޔޯކާގައި ދިރިއުޅޭ އެ މީހާ ދިން އިންޓަވިއުއެއްގައި ބުނެފައިވަނީ މެޗު ކުޅެމުންދާކަން އެނގުނު ހިސާބުން އޭނާ އެކަމަށް ވިސްނި ކަމަށާއި، އޭނާ ބޭނުންވީ މެސީ އާއެކު ފޮޓޯއެއް ނެގުމަށް ކަމަށެވެ. މެސީ އާއެކު އޭނާ ސެލްފީއެއް ނެގި ނަމަވެސް، ސެކިއުރިޓީން ވަނީ އޭނާ ހިފަހައްޓައި ދަނޑުން ނެރުމަށްފަހު އެ ފޮޓީ ޑިލީޓް ކޮށްފައެވެ.

މި މައްސަލައިގައި ލަލީގާއިން ނެރުނު ބަޔާނުގައި ބުނެފައިވަނީ ޞިއްޙީ ދާއިރާއިން ނެރެފައިވާ އުސޫލުތަކާ ޚިލާފަށް ދަނޑަށް ވަން މީހާއާ ދެކޮޅަށް ދައުވާ ކުރާނެ ކަމަށެވެ. އަދި މަޔޯކާއިން ވަނީ އެ މީހާ ދަނޑަށް ވަނީ ކިހިނެއްތޯ ތަހުގީގު ކުރަމުންދާ ކަމަށްވެސް ބުނެފައެވެ.

ކޮވިޑް-19 އާ ގުޅިގެން މާޗު މަހު މެދުކަނޑާލި ސްޕެނިޝް ލީގުގެ ކުޅުން އަލުން ފަށާފައިވަނީ މި މަހުގެ 11 ވަނަ ދުވަހެވެ. މެދުކެނޑުމަށްފަހު ލީގުގައި ބާސާއިން ކުޅުނު ފުރަތަމަ މެޗުން ވަނީ މަޔޯކާ އަތުން ފަސޭހަކަމާއެކު 4-0ން މޮޅުވެފައެވެ.