ކޮރޯނާވައިރަސް (ކޮވިޑް-19) އާ ގުޅިގެން ދަށް ފަންތީގެ ލީގުތަކުގެ ކްލަބްތައް ބަނގުރޫޓުވަމުންދާ ކަމަށް ދުނިޔޭގެ ފުޓްބޯޅައާ ބެހޭ މައި އިދާރާ، ފީފާގެ ޓެކްނިކަލް ޑިވެލޮޕްމަންޓްގެ ހެޑް އާސެން ވެންގާ ބުނެފިއެވެ.

ފްރާންސަށް އުފަން އުމުރުން 70 އަހަރުގެ ވެންގާ ފީފާގެ މަގާމާ ހަވާލުވީ އާސެނަލްގެ ކޯޗެއްގެ ގޮތުގައި 22 އަހަރު ހޭދަކުރުމަށްފަހު މިދިޔަ އަހަރުގެ ނޮވެމްބަރު މަހުގެ ތެރޭގައެވެ.

ކޮވިޑް-19 އާ ގުޅިގެން ފުޓްބޯޅައިގެ ނަން މަޝްހޫރު ބޮޑެތި ކްލަބުތަކަށް ވެސް މާލީ ގޮތުން ގެއްލުން ވެފައިވާއިރު، ގިނަ ގައުމުތަކެއްގެ ދަށް ޑިވިޝަނުގެ ލީގުތައް ވަނީ ކެންސަލް ކޮށްފައެވެ. އަދި ބައެއް ގައުމުތަކުގެ ލީގުތައް ސަޕޯޓަރުން ނުވައްދައި މެޗުތައް ކުޅޭ ގޮތަށް ފަށާފައިވީ ނަމަވެސް، ގިނަ ކްލަބުތަކަށް ވަނީ މާލީ ގޮންޖެހުންތަކާ ކުރިމަތިލާން ޖެހިފައެވެ.

އިންގްލެންޑަށް ބަލާއިރު، މި މަހުގެ ތެރޭގައި ފުރަތަމަ ޑިވިޝަން (އިނގިރޭސި ޕްރިމިއާ ލީގު) އާއި، ދެވަނަ ޑިވިޝަން (އީއެފްއެލް ޗެމްޕިއަންޝިޕް) ފަށަން ތާވަލުކޮށްފައިވީ ނަމަވެސް، ތިންވަނަ ޑިވިޝަނާއި ހަތަރުވަނަ ޑިވިޝަން ވަނީ ކެންސަލް ކުރަން ނިންމާފައެވެ.

ބެއިން ސްޕޯޓްސްއަށް ދިން އިންޓަވިއުއެއްގައި ވެންގާ ބުނީ ކޮވިޑް-19 ގެ ބަލިމަޑުކަމުގެ ސަބަބުން އިންގްލެންޑުގެ ދަށް ފަންތީގެ ލީގުތައް މުޅިން ބިކަވެގެން ހިނގައިދާނެ ކަމުގެ ބިރު އެބައޮތް ކަމަށެވެ. ވެންގާ ބުނީ އިނގިރޭސި ފުޓްބޯޅައިގައި ވާދަކުރަމުން އަންނަ 92 ކްލަބުގެ ތެރެއިން 65 ކްލަބަކާ މެދު ކަންބޮޑުވާ ކަމަށާއި، އެއީ ސަޕޯޓަރުން ނުވައްދާ މެޗުތައް ކުޅެން ޖެހުމުން އާމްދަނީ ލިބޭ ގޮތް އެ ކްލަބުތަކަށް ބަންދުވެފައި އޮތުމުން ކަމަށެވެ. އެހެންކަމުން ދަށް ފަންތީގެ ކްލަބުތަކަށް އެހީވެވޭނެ ގޮތެއް ހޯދަން ޖެހޭ ކަމަށްވެސް ވެންގާ ބުންޏެވެ.

ވެންގާ އިތުރަށް ބުނީ ފުޓްބޯޅަ އަށް ލިބޭނެ ކަމަށް ލަފާކޮށްފައިވާ އާމްދަނީގެ 20 އިންސައްތަ، ކޮވިޑް-19 ގެ ސަބަބުން ގެއްލިގެންދާނެ ކަމަށެވެ. އެގޮތުން އަހަރެއްގެ މައްޗަށް 45 ބިލިއަން ޔޫރޯ ލިބޭނަމަ، އޭގެ ތެރެއިން 10 އާއި 14 ބިލިއަން ޔޫރޯއާ ދެމެދުގެ އަދަދެއް ގެއްލިގެންދާނެ ކަމަށްވެސް ވެންގާ ބުންޏެވެ.

ކޮވިޑް-19 ގެ ސަބަބުން މިދިޔަ މާޗު މަހު އިންގްލެންޑުގައި ފުޓްބޯޅަ ހަރަކާތްތައް މެދުކަނޑާލާފައި އޮތުމަށްފަހު، މި މަހުގެ 17 ވަނަ ދުވަހު ޕްރިމިއާ ލީގު އަލުން ފަށަން ވަނީ ނިންމާފައެވެ. އަދި އީއެފްއެލް ޗެމްޕިއަންޝިޕް ފަށާނީ މި މަހުގެ 20 ވަނަ ދުވަހު އެވެ.

ޔޫރަޕްގެ ގަދަ ފަސް ލީގުގެ ތެރެއިން ފްރެންޗު ލީގު ކެންސަލް ކޮށްފައިވީ ނަމަވެސް، މިދިޔަ މެއި މަހު ޖަރުމަން ލީގުގެ ކުޅުން ވަނީ ފަށާފައެވެ. އަދި މި މަހުގެ 11 ވަނަ ދުވަހު ސްޕެނިޝް ލީގުގެ ކުޅުން އަލުން ފަށާފައިވާއިރު، 20 ވަނަ ދުވަހު އިޓާލިއަން ލީގުގެ ކުޅުން ފަށާނެ އެވެ.