ތިނަދޫ އައިސްޕްލާންޓް ސަރަހައްދުގައި ގާއިމްކުރާ ޖެޓީގެ 74 އިންސައްތަ ނިމިއްޖެ
13 ޖޫން 2020 | ހޮނިހިރު 07:25މި މަހުގެ ތެރޭގައި މަސައްކަތް އެއްކޮށް ނިމޭނެ
ތިނަދޫ އައިސް ޕްލާންޓް ސަރަހައްދު
ގދ ތިނަދޫގައި ގާއިމްކޮށްފައިވާ އައިސް ޕްލާންޓް ސަރަހައްދުގައި ހަދަމުންދާ ޖެޓީގެ މަސައްކަތުގެ 74 އިންސައްތަ ނިމިފައިވާކަމަށް އެމްޓީސީސީން ބުނެފިއެވެ.
މިސައްކަތުގެ އެންމެ ފަހުގެ މައުލޫމާތު ހިއްސާކޮށް އެމްޓީސީން ކޮށްފައިވާ ޓުވީޓެއްގައި ބުނެފައިވަނީ، 31 ޖުލައިގައި 2019ގައި ހާވަލުކޮށްފައިވާ މި މަޝްރޫއުގެ ދަށުން 9245 ކިއުބިކް މީޓަރުގެ ބިން ހިއްކައި, 10 މީޓަރުގެ ސަރަހައްދެއްގައި ރިވެޓްމެންޓް ޖެހުމުގެ އިތުރުން 130 މީޓަރުގެ ސަރަހައްދެއްގައި ޝީޓް ޕައިލް ކީވޯލް ޖެހުމަށް ހަމަޖެހިފައިވާކަމަށެވެ. އަދި 620 ސްކެއަރ މީޓަރުގެ ޕޭމަންޓް ހެދުމުގެ މަސައްކަތާއި ބަނދަރުމަތީގައި ބައްތި ހަރުކުރުމުގެ މަސައްކަތް ކުރަން ޖެހޭއިރު އެ މަސައްކަތުގެ ޖުމްލަ 74 އިންސައްތަ ނިފައިވާކަމަށް އެމްޓީސީސީން ބުނެއެވެ.
މި މަޝްރޫއުގެ އަމަލީ މަސައްކަތް މި ހިނގާ 2020ވަނަ އަހަރުގެ މާރޗް މަހުގެ 4 ވަނަ ދުވަހު ފަށާފައިވާއިރު، އެ މަސައްކަތް އެއްކޮށް މި މަހުގެ ނިޔަލަށް ނިންމާލެވޭނެކަމަށް ކުންފުނިން ބުނެއެވެ.
ތިނަދޫ އައިސް ޕްލާންޓް ގާއިމްކޮށްފައިވާ ސަރަހައްދުގައި ޖެޓީ ހެދުމުގެ މަޝްރޫއަކީ 17.4 މިލިއަން ރުފިޔާގެ މަޝްރޫއެކެވެ.
