ގެސްޓުހައުސްއެއްގައި 11 އަހަރުގެ ކުއްޖަކު ރޭޕްކުރި މައްސަލާގައި 38 އަހަރުގެ ފިރިހެނަކު ހައްޔަރުކޮށްފި
މި މައްސަލަ ފުލުހުންނަށް ހުށައެޅިފައިވަނީ މިދިޔަ ބުދަ ދުވަހު
ޖިންސީ އަނިޔާ ރިޕްރެޒެންޓޭޝަނަލް ފޮޓޯ - ޖިންސީ އަނިޔާގެ މައްސަލަތައް 1412 އަށް ގުޅައިގެން ރިޕޯޓް ކުރެވޭނެ
މާލޭ ގެސްޓްހައުސްއެއްގެ ތެރޭގައި 11 އަހަރުގެ އަންހެން ކުއްޖަކަށް ޖިންސީ ގޯނާކުރި މައްސަލައެއް ފުލުހުން ބަލަން ފަށައިފިއެވެ.
އެކަމާ ގުޅޭގޮތުން ފުލުހުން ބުނީ، މި މައްސަލަ ފުލުހުންނަށް ހުށައެޅިފައިވަނީ މިދިޔަ ބުދަ ދުވަހު ކަމަށެވެ. އަދި މި މައްސަލަ ޚާއްސަ އިސްކަމެއްދީގެން ތަހުޤީޤު ކުރަމުންދާކަމަށްވެސް ފުލުހުން ބުނެފައިވެއެވެ.
ފުލުހުން ބުނީ، މި މައްސަލައާ ގުޅިގެން ކޯޓު އަމުރެއްގެ ދަށުން 38 އަހަރުގެ ދިވެހި ފިރިހެނަކު ހުކުރު ދުވަހުގެރޭ ހައްޔަރު ކޮށްފައިވާ ކަމަށެވެ.
އޭގެ އިތުރުން، އަނިޔާ ލިބިފައިވާ ކުއްޖާއަށް ބޭނުންވާ އެހީތެރިކަމާއި ރައްކާތެރިކަން ކަށަވަރު ކުރުމަށް ގުޅުންހުރި އިދާރާތަކާއި ގުޅިގެން އަޅަންޖެހޭ ފިޔަވަޅުތައް އަޅަމުންދާކަންވެސް ފުލުހުން ފާހަގަކޮށްފައިވެއެވެ. އަދި އަނިޔާ ލިބިފައިވާ ކުއްޖާ މިހާރު ރައްކާތެރި މާޙައުލަކަށް ބަދަލު ކުރެވިފައިވާކަމަށް ފުލުހުން މައުލޫމާތު ދެއެވެ.
