އަންނަ މަހު މިސްކިތްތަކާއި ސްކޫލްތައް ހުޅުވާލަނީ
މާލެ ލޮކްޑައުން ކުރެވުނީ އޭޕްރިލް މަހުގެ 15 ވަނަ ދުވަހު
ކޮވިޑް-19އާއި ގުޅިގެން މާލެސިޓީގެ މިސްކިތްތައް ބަންދުކޮށްފައި
އަންނަ ޖުލައި މަހުން ފެށިގެން މާލޭގެ މިސްކިތްތަކާއި ސްކޫލްތަކާއި ކޮލެޖުގެ އިތުރުން، އޮފީސްތައް ހުޅުވާލުމަށް ނިންމައިފިއެވެ.
ބުރާސްފަތި ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ން ބޭއްވި ނޫސްވެރިންގެ ބައްދަލުވުމުގައި ކޮވިޑް-19 އާ ގުޅިގެން އަޅާފައިވާ ފިޔަވަޅުތަކަަށް ދޭ ލުއިތަކާއި ގުޅިގެން މައުލޫމާތު ދެއްވަމުން ހެލްތު މިނިސްޓްރީގެ އެސިސްޓެންޓް ޑިރެކްޓަރު އާމިނަތު ޝައިނާ އަބްދުﷲ ވިދާޅުވީ އެތަންތަން ހުޅުވުވާލުމުގެ ތައްޔަރީތައް މިހާރު ވަމުންދާ ކަމަށެވެ. އެގޮތުން ކަމާގުޅުން ހުރި މިނިސްޓްރީތަކުން ދަނީ އެޗްޕީއޭ އިން ކަނޑައަޅާފައިވާ ގައިޑްލައިންތަކާ އެއްގޮތަށް މި ތަންތަން ހުޅުވާލުމުގެ ތައްޔާރީތައް ވަމުން ކަމަށެވެ.
މާލެ ސަރަހައްދުން ކޮވިޑް-19 ގެ ކޭސްތަކެއް ފެނުމާއި ގުޅިގެން މާލެ ލޮކްޑައުން ކުރެވުނީ އޭޕްރިލް މަހުގެ 15 ވަނަ ދުވަހުއެވެ. އެއާއި އެކު، ޖަމާއަތުގައި ނަމާދުކުރުން ހުއްޓާލާ، ސްކޫލްތަކާއި ކޮލެޖުތައް ބަންދުކޮށް، ސަރުކާރު އޮފީސްތައް ބަންދުކުރެވުނެވެ.
މީގެ އިތުރުން ޝައިނާ ވިދާޅުވީ ޖުލައި މަހުގެ 15 ވަނަ ދުވަހުން ފެށިގެން 10 މީހުންނަށް ވުރެން ގިނަ ނުވާނެ ގޮތައް އެއްވެ އުޅެވޭނެ ކަމަށެވެ. އެގޮތުން، ޖުލައި މަހު ޓީމް ކުޅިވަރު ހަރަކާތްތައް ބޭއްވުމުގެ އިންތިޒާމް ހަމަޖެހިގެންދާނެ ކަމަށާއި ރެސްޓޯރެންޓް ކެފޭގެ ޚިދުމަތްތައް އެތަނުގައި ތިބެގެން ހޯދޭނެ ކަމަށެވެ.
ޖޫން މަހުގެ 15 ވަނަ ދުވަހުން ފެށިގެން ރެސްޓޯރެންޓް ކެފޭ ތަކުން ޑެލިވަރީގެ އިތުރުން ޓޭކްއަވޭ ކުރެވޭނެ ކަމަށް ހެލްތު މިނިސްޓްރީން ވަނީ ބުނެފައެވެ.
