ފްރެންޗު ލީގުގައި ރެލިގޭޝަނަށް އަމަލު ނުކުރަން ކޯޓުން އަމުރުކޮށްފި

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ކެންސަލް ކުރި ފްރެންޗު ލީގުގައި ރެލިގޭޝަނަށް އަމަލު ނުކުރަން ފްރާންސްގެ ކޯޓަކުން އަމުރެއް ނެރެފިއެވެ.

ސެޕްޓެމްބަރު މަހުގެ ކުރިން މީހުން އެއްވެ އުޅެ ކުރިއަށް ގެންދާ އެއްވެސް ހަރަކާތެއް ނުބޭއްވޭނެ ކަމަށް ފްރާންސް ސަރުކާރުން ނިންމުމާއެކު ފްރެންޗު ލީގު ކެންސަލް ކުރީ އޭޕްރީލް މަހުގެ 30 ވަނަ ދުވަހުއެވެ.

ފްރެންޗު ލީގު ކެންސަލް ކޮށް، ޕީއެސްޖީއަށް ވަނީ ޗެމްޕިއަންކަން ދީފައެވެ. ފްރެންޗު ލީގަކީ ޔޫރަޕުގެ ގަދަ ފަސް ލީގުގެ ތެރެއިން ކެންސަލް ކުރި ހަމައެކަނި ލީގެވެ. ލީގު ކެންސަލް ކުރުމާއެކު ތާވަލުގެ ފުލުގައި އޮތް ދެ ޓީމު ކަމަށްވާ އަމިއެންސް އާއި ޓުލޫސް ވަނީ ދެވަނަ ޑިވިޝަނަށް ރެލިގޭޓް ވެފައެވެ.

ލީގު ކެންސަލްކުރިއިރު ގިނަ ކުލަބުތަށް ނުކުޅެ 10 މެޗު އޮތެވެ. ލީގުގެ އެންމެ ފުލުގައި އޮތް ޓުލޫސަށް 28 މެޗުން ލިބުނީ 13 ޕޮއިންޓެވެ. ނަވާރަ ވަނައިގައި އޮތް އަމިއެންސް އަށް 28 މެޗުން ލިބިފައިވަނީ 23 ޕޮއިންޓެވެ.

އެހެންކަމުން ރެލިގޭޝަނާ ދެކޮޅަށް އަމިއެންސް އާއި ޓުލޫސްއިން ވަނީ ކޯޓަށް މައްސަލަ ހުށަހަޅާފައެވެ. ފްރާންސްގެ އެންމެ މަތީ އެޑްމިނިސްޓްރޭޓިވް ކޯޓުން އަންގާރަ ދުވަހު އަމުރުކުރީ ރެލިގޭޝަން އުސޫލަށް އަމަލުކުރުމުގައި ދެވަނަ ވިސްނުމަކަށް ދިއުމަށެވެ. އެ ގޮތުން ފްރެންޗު ލީގުގައި ރެލިގޭޝަނަށް އަމަލުނުކުރަން ކޯޓުން ވަނީ އަންގާފައެވެ.

ކޯޓުގެ މި އެންގުމާއެކު އަންނަ ސީޒަނުގައި ފްރެންޗް ލީގުން 22 ޓީމު ފެނުމުގެ ފުރުސަތު ބޮޑެވެ. އެއީ މި ސީޒަނުގައި ފްރެންޗް ދެވަނަ ޑިވިޝަނުގައި އެންމެ ކުރީގައި އޮތް ލޮރިއެންޓާއި ލެންސް ހިމަނައިގެންނެވެ.

އަމިއެންސް އާއި ޓުލޫސް އިން ކޯޓަށް ހުށަހެޅި މައްސަލައިގައި އަމުރެއް ނެރުނު ނަމަވެސް، މީގެ ކުރިން ލިޔޯނުން ކޯޓަށް ހުށަހެޅި މައްސަލަ ބަލައިގެންފައެއް ނުވެއެވެ.

ފްރެންޗު ލީގު ކެންސަލް ކުރީ އަންނަ ސީޒަނުގެ ޔޫރަޕް މުބާރާތްތަކަށް ކޮލިފައިވާ ޓީމުތައް ކަނަޑައެޅުމަށް ފަހު އެވެ. އެގޮތުން ފްރެންޗު ލީގުން ޔުއެފާ ޗެމްޕިއަންސް ލީގަށް ކޮލިފައިވީ އެއްވަނައިގައި އޮތް ޕީއެސްޖީ އާއި ދެވަނައިގައި އޮތް މާސޭ އަދި ތިންވަނައިގައި ރެނެސް އެވެ. އަދި ޔުއެފާ ޔޫރޮޕާ ލީގަށް ކޮލިފައިވީ ހަތަރުވަނައިގައި އޮތް ލިލް އާއި ފަސްވަނައިގައި އޮތް ރެއިމްސް އަދި ހަވަނައިގައި އޮތް ނީސް އެވެ. އެހެންކަމުން މިއީ 1997 ވަނަ އަހަރަށް ފަހު ޔޫރަޕުގެ މުބާރާތަކުން ތާވަލުގެ ހަތްވަނައިގައި އޮތް ލިޔޯނަށް ފުރުސަތު ގެއްލުނު ފުރަތަމަ ފަހަރެވެ.

ކޯޓުން ލިޔޯނުގެ މައްސަލަ ބޭރުކޮށްލި ނަމަވެސް، ލިޔޯނުގެ ރައީސް ޖިއަން-މިކޭލް އައުލަސް ވަނީ ފްރާންސް ސަރުކާރުގެ އެންގުމަށް ލީގު ކެންސަލްކޮށްފައި ވާތީ އަލުން ލީގު ފަށަން ސަރުކާރުން އިސްނެގުމަށް އެދިފައެވެ.