މުއްދަތެއް ނެތް ގޮތަށް ފަސްކޮށްފައިވާ އިންޑިއަން ޕްރިމިއާ ލީގު (އައިޕީއެލް)، ޔުނައިޓެޑް އަރަބި އެމިރޭޓްސް (ޔޫއޭއީ) ގެ ސިޓީއެއް ކަމަށްވާ ދުބާއީގައި ބޭއްވުމަށް ހުށަހަޅައިފިއެވެ.

ކޮރޯނާވައިރަސް (ކޮވިޑް-19) އާ ގުޅިގެން އައިޕީއެލް ވަނީ މުއްދަތެއް ނެތް ގޮތަށް ފަސްކޮށްފައެވެ. މުއްދަތެއް ނެތް ގޮތަށް އައިޕީއެލް ފަސްކުރަން އިންޑިއާގެ ބޯޑް އޮފް ކޮންޓްރޯލް ފޯ ކްރިކެޓް (ބީސީސީއައި) އިން ނިންމީ ކޮވިޑް-19އާ ގުޅިގެން އިންޑިއާގައި ލޮކްޑައުންގެ މުއްދަތު އިތުރުކުރަން އެ ގައުމުގެ ސަރުކާރުން ނިންމުމާ ގުޅިގެންނެވެ.

އައިޕީއެލް ފަށަން އެންމެ ފުރަތަމަ ތާވަލުކޮށްފައި އޮތީ މާޗު މަހުގެ 29 ވަނަ ދުވަހުއެވެ. އެކަމަކު ޓީ-ޓުވެންޓީ މި މުބާރާތް މުއްދަތެއް ނެތް ގޮތަށް ފަސްކުރަން އޭޕްރީލް މަހުގެ 16 ވަނަ ދުވަހު ވަނީ ނިންމާފައެވެ.

ރިޕޯޓުތައް ބުނާ ގޮތުން ޔޫއޭއީން ވަނީ އެ ގައުމުގެ ސިޓީއެއް ކަމަށްވާ ދުބާއީގައި މި މުބާރާތް ބޭއްވުމަށް ބީސީސީއައިއަށް ހުށަހަޅާފައެވެ. އަދި އޭގެ ކުރިން މި މުބާރާތް ބޭއްވުމަށް ސްރީލަންކާއިން ވެސް ހުށަހެޅި ކަމަށް ރިޕޯޓުތައް ބުނެއެވެ. މިކަމާއި ގުޅިގެން ބީސީސީއައިއިން އަދި އެއްވެސް ފަރާތަކާއި މަޝްވަރާ ކޮށްފައިނުވާ ކަމަށް ރިޕޯޓުތައް ބުނެއެވެ.

މިއަހަރުގެ އައިޕީއެލް ފަސްކުރިއިރު، މި މުބާރާތް މީގެ ކުރިން 2009 ވަނަ އަހަރު ވަނީ ސައުތު އެފްރިކާގައި ބާއްވާފައެވެ. އޭރު މުބާރާތް ސައުތު އެފްރިކާއަށް ބަދަލުކުރީ ސަލާމަތީ ސަބަބުތަކަށްޓަކައެވެ. އަދި އޭގެ ފަހުން 2014 ވަނަ އަހަރު މި މުބާރާތުގެ އެއްބައި ޔޫއޭއީގައި ވަނީ ކުރިއަށް ގެންގޮސްފައެވެ.

ކޮވިޑް-19އާ ގުޅިގެން މުއްދަތެއް ނެތް ގޮތަށް އައިޕީއެލް ފަސްކުރިއިރު، އިންޑިއާގައި މި ވައިރަސް އަންނަނީ ހަލުވިކަމާއެކު ފެތުރެމުންނެވެ. އެގޮތުން މިހާތަނަށް އިންޑިއާއިން މި ވައިރަހަށް 267،200ށް ވުރެ ގިނަ މީހުން ވަނީ ޕޮޒިޓިވްވެފައެވެ. އަދި މި ވައިރަސް ޖެހިގެން އެ ގައުމުން 7،400ށް ވުރެ ގިނަ މީހުން ވަނީ މަރުވެފައެވެ.