ވަޒީފާ ނެތް މީހުންނަށް އިނާޔަތް ދިނުމާގުޅޭ ބާބެއް ވަޒީފާއާ ބެހޭ ޤާނޫނަށް އިތުރުކުރުމަށް ހުށަހަޅައިފި
ވަޒީފާ ނެތް މީހުންނަށް އިނާޔަތް ދިނުމުގެ މަގްސަދުކަަށްވަނީ ވަޒީފާ އަދާކުރާ ފަރާތްތަކަށް ރައްކާތެރިކަން ހޯދައިދިނުން
ހިންނަވަރު ދާއިރާގެ މެމްބަރު ޖީހާން މަހުމޫދު ވަޒީފާއާ ބެހޭ ޤާނޫނަށް އިސްލާހު ގެނައުމުގެ ބިލަށް ވާހަކަ ދައްކަވަނީ
ކޮވިޑް-19 އާ ގުޅިގެން މިހާރު ކުރިމަތިވެފައިވާ މިހާލަތުގެ ސަބަބުންނާއި އަދި ކުރިޔަށް އޮތްތަނުގައިވެސް މިހާލަތު ދެމިގެންދާނެތީ ވަޒީފާނެތް މީހުނަށް އިނާޔަތް ދިނުމުގެ ބާބެއް ވަޒީފާއާ ބެހޭ ގާނޫނުގައި ހިމެނުމަށް ހިންނަވަރު ދާއިރާގެ މެމްބަރު ޖީހާން މަހުމޫދު ހުށަހަޅުއްވައިފިއެވެ.
ހޯމަ ދުވަހުގެ ޖަލްސާއަށް ސަރުކާރުގެ ފަރާތުން ވަޒީފާއާ ބެހޭ ޤާނޫނަށް އިސްލާހު ގެނައުމުގެ ބިލް ހުށަހެޅުއްވީ ކެނދިކުޅުދޫ ދާއިރާގެ މެންބަރު އަހުމަދު އީސައެވެ. މި ބިލަށް ބަހުސް ކުރައްވަމުން ޖީހާން ވިދާޅުވީ ވަޒީފާ ނެތް މީހުންނަށް އިނާޔަތް ދިނުމުގެ މަގްސަދުކަށްވަނީ ވަޒީފާ އަދާކުރާ ފަރާތްތަކަށް ރައްކާތެރިކަން ހޯދައިދިނުން ކަމަށެވެ. އެއީ އެމީހެއްގެ ކުށަކާއިނުލާ ހާލަތާއި ގުޅިގެން ނުވަތަ ކުރިމަތިކުރުވި ހާލަތާއި ގުޅިގެން އެމީހެއްގެ ވަޒީފާ ގެއްލިއްޖެ ހާލަތެއްގައި އެމީހަކަށް ދޭންޖެހޭ ރައްކާތެރިކަމުގެ މަގްސަދުގައި ދޭންޖެހޭ އެއްޗެއް ކަމަށް ޖީހާން ވިދާޅުވިއެވެ.
މި ބިލަށް ބަހުސް ކުރައްވަމުން ޖީހާން ވަނީ ސަރުކާރުން ހުށަހެޅުއްވި އިސްލާހުގައި ޕްރޮބޭޝަން މުއްދަތުގެ ގޮތުގައި ހަ މަސް އޮތުމުން އެކަމާ ހިތްހަމަނުޖެހުން ފާޅުކުރައްވާފައެވެ. ޖީހާން ވިދާޅުވީ ވަޒީފާގެ ޔަގީންކަން ނެތި އެހާ ގިނަ ދުވަހު މަސައްކަތް ކުރުމަކީ ކުރަން ދަތި ކަމަކަށް ވާނެ ކަމަށެވެ. އަދި އެކަމުގެ ސަބަބުން ވަޒީފާ އަދާކުރާ މީހާގެ ހައްގުތަކަށް އުނިކަން އަންނަކަމަށް ޖީހާން ވިދާޅުވިއެވެ. އެހެންކަމުން މިހާރުވެސް އޮތް ގޮތަށް ޕްރޮބޭޝަން މުއްދަތަކީ ތިން މަހުގެ ގޮތުގައި ބާއްވަން ޖީހާން ހުށަހެޅުއްވިއެވެ.
މީގެއިތުރުން ޖީހާން ވިދާޅުވީ އެންމެ ކުޑަމިނުން ދެވޭ އުޖޫރަ ކަނޑައަޅާއިރު އެ އުޖޫރައަކީ ބޭސިކް ސެލެރީގެ ގޮތުގައި ކަނޑައަޅަން ޖެހޭ ކަމަށެވެ. މިހާރު މަޖިލީހަށް ހުށަހަޅާފައިވާ ވަޒީފާއާ ބެހޭ ޤާނޫނުގައި 12 އިސްލާހެއް ވަނީ ހުށަހަޅާފައެވެ.
ވަޒީފާ ނެތް މީހުންނަށް އިނާޔަތެއް ދިނުމަކީ ރައްޔިތުންގެ މަޖިލިސް ކެމްޕެއިންގެ އެމްޑީޕީގެ "އެޖެންޑާ 19" ވައުދުނާމާގައި ހިމެނި މުހިއްމު ކަމެކެވެ.
