ވަޒީފާއާ ބެހޭ ޓްރިބިއުނަލުން އޮންލައިންކޮށް އަޑުއެހުމެއް ބާއްވައިފި
8 ޖޫން 2020 | ހޯމަ 13:22މައްސަލަ ބެއްލެވީ ޓްރިބިއުނަލްގެ ރައީސް މުސްތަފާ
ވަޒީފާއާ ބެހޭ ޓްރިބިއުނަލުން ހޯމަ ދުވަހު ކުރިޔަށް ގެންދިޔަ އަޑުއެހުން
ވަޒީފާއާބެހޭ ޓްރައިބިއުނަލުގެ އަޑުއެހުމެއް ފުރަތަމަ ފަހަރަށް ވީޑިއޯ ކޮންފަރެންސް މެދުވެރިކޮށް ބާއްވައިފިއެވެ.
އޮންލައިންކޮށް އަޑުއެހުމެއް ފުރަތަމަ ފަހަރަށް ގެންގޮސްފައިވަނީ، ހޯމަ ދުވަހު އެވެ. ވަޒިފާއާ ބެހޭ ޓްރިބިއުނަލުން ބުނީ، އެ އަޑު އެހުމަކީ ޓްރައިބިއުނަލުގެ ރައީސް އަމްޖަދު މުސްތަފާ ބައްލަވަމުންގެންދަވާ 72VTR2020 މައްސަލައިގެ ފުރަތަމަ އަޑުއެހުން ކަމަށެވެ.
ކޮވިޑް-19ން ރައްކާތެރިވުމުގެ ފިޔަވަޅެއްގެ ގޮތުން މާލެ ލޮކްޑައުންކޮށްފައިވާ މިހާލަތުގައި ސަރުކާރުގެ އިތުރުން އެހެނިހެން ވުޒާރާތަކުން ބާއްވާ ބައްދަލުވުންތައް ކުރިޔަށް ގެންދަނީ އޮންލައިންކޮށެވެ. ވަކިން ހާއްސަކޮށް ކޯޓުތަކުގެ އަޑުއެހުންތައް ވެސް ވީޑިއޯ ކޮންފަރެންސް މެދުވެރިކޮށް ދަނީ ކުރިޔަށް ގެންދަމުންނެވެ.
އޭގެ އިތުރުން، ސަރުކާރުގެ ފަރާތުން ރައްޔިތުންގެ މަޖިލިހަށް ހުށައަޅާފައިވާ ކޮވިޑް-19ގެ ހާއްސަ ބިލުގައި ވަނީ ޓްރައިބިއުނަލް ފަދަ ތަންތަނުގައި އަޑުއެހުންތައް ކުރިއަށް ގެންދާނެ ގޮތުގެ ގަވައިދެއް އެކުލަވާލުމަށް ހުށައަޅާފައެވެ.
