ޤުރުއާން މާއްދާއިން އިމްތިހާނު ދިނުން ފަސްކުރަން ނިންމި ނިންމުމަށް މަޖިލީހުން ތާޢީދުކޮށްފި
ވޯޓުގައި ބައިވެރިވެ ވަޑައިގެންނެވި 62 މެމްބަރުންގެ ވޯޓުން ވަނީ އެގޮތަށް ފާސްކޮށްފައި
ރައްޔިތުންގެ މަޖިލީހުގެ ޖަލްސާ އެއްގެ ތެރެއިން
ކީ ސްޓޭޖް 4 ގައި ކިޔަވާ ދަރިވަރުން ކީރިތި ޤުރުއާން މާއްދާއިން އިމްތިހާން ކުރުމާއި ގުޅޭ ސަރކިޔުލަރގައި ކީ-ސްޓޭޖް 4 ގެ މުޤައްރަރާ އެއްގޮތަށް ދަރިވަރުން ތައްޔާރު ކުރެވެންދެން ޑިޕާޓްމަންޓް އޮފް ޕަބްލިކް އެގްޒަމިނޭޝަންސްއިން ކަނޑައަޅާފައިވާ އިމްތިހާން ކުރުމުގެ އުސޫލަށް އަމަލުކުރުމަށް ފަސްކުރުމަށް ނިންމާފައިވާ ނިންމުމަށް ރައްޔިތުންގެ މަޖިލީހުން ތާޢީދުކޮށްފިއެވެ.
ރައްޔިތުންގެ މަޖިލީހުން މިކަމަށް ތާޢީދުކޮށްފައިވަނީ މިއަހަރު ގްރޭޑް 10 ގައި ކިޔަވާ ކުދިންނަށް ތައްޔާރުވުމަށް ވަގުތު ނުލިބި ޤުރުއާން މާއްދާއިން އެސް.އެސް.ސީ އިމްތިހާން ދިނުމާ މެދު ބެލެނިވެރިންގެ ކަންބޮޑުވުންތައް ބަޔާންކޮށް ހަދާފައިވާ ޕެޓިޝަނެއް ޕެޓިޝަން ކޮމިޓީން ދިރާސާކޮށް ނިންމިގޮތުގެ ރިޕޯޓް ފާސްކުރުމަށް ނެގި ވޯޓުގައި ބައިވެރިވެ ވަޑައިގެންނެވި 62 މެމްބަރުންގެ ވޯޓުން އެގޮތުން ފާސްކުރުމާއި އެކުއެވެ.
މިޕެޓިޝަނަކީ މިއަހަރުގެ ފެބްރުއަރީ މަހު ރައްޔިތުންގެ މަޖިލީހަށް ބެލެނިވެރިންތަކެއް ހުށަހަޅާފައިވާ ޕެޓިޝަނެކެވެ. މިޕެޓިޝަންގައި ސޮއި ކުރައްވާފައިވަނީ މަކުނުދޫ ދާއިރާގެ މެމްބަރ މުހައްމަދު ރާޢީއެވެ. މިޕެޓިޝަންގައި 318 ބެލެނިވެރިއަކު ވަނީ ސޮއިކޮށްފައެވެ.
މި ޕެޓިޝަން ދިރާސާކުރި ޕެޓިޝަން ކޮމިޓީގެ ރިޕޯޓްގައި ބުނެފައިވަނީ މި ޕެޓިޝަން ދިރާސާކުރުމަށް ފެށުމާއެކު މިމައްސަލައާ ގުޅޭގޮތުން 17 ފެބްރުއަރީ ގައި އެޑިޔުކޭޝަން މިނިސްޓްރީން ނިންމާފައިވާ ނިންމުންތަކުގެ ތަފްސީލު ކޮމިޓީއަށް ފޮނުވާފައިވާ ކަމަށެވެ. އެގޮތުން ކީ ސްޓޭޖް 4 ގައި ކިޔަވާ ދަރިވަރުން ކީރިތި ޤުރުއާން މާއްދާއިން އިމްތިހާން ކުރުމާއި ގުޅޭގޮތުން މިނިސްޓްރީން ނެރެފައިވާ ސަރކިޔުލަރ ކޮމިޓީއަށް ފޮނުވާފައިވާ ކަމަށް ރިޕޯޓްގައި ބުނެފައިވެއެވެ. އަދި މިސަރކިޔުލަރގެ ދަށުން އިމްތިހާން ކުރުމުގެ އުސޫލަށް އަމަލުކުރުން ފަސްކުރުމަށް ނިންމާފައިވާ ނިންމުމަކީ ޕެޓިޝަން ހުށަހެޅި ފަރާތުން އެދިފައިވާ ގޮތް ހާސިލްވުންކަމުގައި ކޮމިޓީއަށް ފާހަގަކުރެވިފައިވާ ކަމަށެވެ.
އެހެންނަމަވެސް މިމައްސަލަ ކޮމިޓީން ދިރާސާ ކުރިއިރު ފާހަގަކުރެވުނު 10 ކަމެއް ވަނީ ފާހަގަކޮށްފައެވެ. އޭގެތެރޭގައި ހިމެނެނީ މިއަހަރު ގްރޭޑް 10 ގައި ކިޔަވާ ދަރިވަރުން ސްޓްރީމްތައް ކަނޑައެޅިއިރު ކިޔަވަންޖެހޭ މަޖުބޫރު މާއްދާތަކާއި އޮޕްޝަނަލް މާއްދާތަކުގައި ގުރުއާން މާއްދާ ހިމަނާފައިނުވާ ކަމަށް ރިޕޯޓްގައި ފާހަގަކޮށްފައިވެއެވެ. އަދި ގުރުއާން މާއްދާ މަޖުބޫރުކުރުމަށް ކުއްލިގޮތަކަށް ނިންމާފައިވާއިރު ދަރިވަރުންނާއި ޓީޗަރުން ތަމްރީން ކޮށްފައިނުވާ ކަމަށްވެސް ކޮމިޓީގެ ރިޕޯޓްގައި ފާހަގަކޮށްފައިވެއެވެ. އަދި ދަރިވަރުން މިފަދަ އިމްތިހާނަކަށް އަހުލުވެރި ވެފައިނުވާކަމަށްވެސް ކޮމިޓީ ރިޕޯޓްގައި ބުނެފައިވެއެވެ.
