ސްޕެނިޝް ލީގު އަލުން ފަށާއިރު، ބާސެލޯނާ އިން ކުޅޭ ފުރަތަމަ މެޗުގައި އެޓީމުގެ ކެޕްޓަން ލިއޮނެލް މެސީއަށް ކުޅެވޭނެ ކަމަށް ބާސާގެ ކޯޗު ކިކޭ ސެޓިއެން ބުނެފި އެވެ.

މެސީގެ ފައިގެ ފަލަމަސްގަނޑަށް އަނިޔާވުމުން، ސްޕެނިޝް ލީގު އަލުން ފަށާއިރު، ބާސާ ކުޅޭ ފުރަތަމަ މެޗަށް އޭނާ ފިޓު ވެދާނެ ކަމާމެދު މީގެ ކުރިން ވަނީ ސުވާލު އުފެދިފަ އެވެ. މިމަހުގެ 11 ވަނަ ދުވަހު ސްޕެނިޝް ލީގު އަލުން ފަށާއިރު، ބާސާ ކުޅޭ ފުރަތަމަ މެޗުގައި މިމަހުގެ 13 ވަނަ ދުވަހުގެރޭ ނުކުންނާނީ މަޔޯކާއާ ދެކޮޅަށެވެ.

މީގެ ކުރިން ބާސާއިން ނެރުނު ބަޔާނެއްގައި ބުނީ މެސީގެ ފައިގެ ފަލަމަސްގަނޑަށް އަނިޔާ ވެފައިވާ ކަމަށާއި، އިތުރަށް ރިސްކު ކުޑަ ކުރުމަށް ޓީމާ ވަކިން ޚާއްޞަ ކަސްރަތުތަކެއް ކުރަމުން ގެންދާ ކަމަށެވެ. މެސީއަށް އަނިޔާވީ، ބާސާއިން ކުރިއަށް ގެންދިޔަ ފަރިތަކުރުންތަކުގެ ތެރެއިންނެވެ.

ދާދި ފަހުން ދިން އިންޓަވިއުއެއްގައި ބާސާގެ ކޯޗު ކިކޭ ސެޓިއެން ބުނީ މެސީއަށް ލިބުނު އަނިޔާ ސީރިއަސް ނޫން ކަމަށާއި، މަޔޯކާއާ ދެކޮޅަށް ކުޅޭ މެޗުގައި މެސީއަށް ކުޅެވޭނެ ކަމަށެވެ.

އުމުރުން 32 އަހަރުގެ މެސީ ބާސާގައި އަދިވެސް މޮޅު ކުޅުމެއް ދައްކަމުން އަންނައިރު، މި ސީޒަނުގައި އޭނާ ވަނީ ބާސާއަށް ކުޅެދިން 31 މެޗުގައި 24 ލަނޑު ކާމިޔާބުކޮށްފަ އެވެ.

މެސީގެ އިތުރުން ބާސާގެ ފޯވަރޑް ލުއިސް ސުއަރޭޒް ވެސް ވަނީ އަނިޔާ އިން ރަނގަޅުވެ، މަޔޯކާއާ ދެކޮޅަށް ނުކުންނަ މެޗަށް ފިޓުވެފަ އެވެ. މި މެޗުގައި ސުއަރޭޒް ކުޅޭނެ ކަމަށް ރިޕޯޓުތައް ބުނިއިރު، މިއީ ޖެނުއަރީ މަހު ބާސާގެ ކޯޗުކަމާ ހަވާލުވި ކިކޭ ސެޓިއެންއަށް ސުއަރޭޒް ބޭނުން ކުރަން ލިބޭނެ ފުރަތަމަ މެޗެވެ.

ސްޕެނިޝް ލީގު އަލުން ފަށާއިރު، އެއްވަނައިގައި އޮތް ބާސާ އާއި ދެވަނައިގައި އޮތް ރެއާލް މެޑްރިޑާއި ދެމެދު އޮތީ ދެ ޕޮއިންޓުގެ ފަރަގެކެވެ. ބާސާއަށް 27 މެޗުން 58 ޕޮއިންޓު ލިބިފައިވާއިރު، ރެއާލަށް ވަނީ 27 މެޗުން 56 ޕޮއިންޓު ލިބިފައެވެ.