އެސްޓީއޯ އަދި އެމްޕީއެލްގެ އެހީގައި ހަދާ ބިދޭސީންގެ އެކޮމަޑޭޝަން ބްލޮކްތައް މިމަހުގެ 20ށް ނިންމަނީ
މި މަސައްކަތް ކުރިޔަށް ގެންދަނީ ތިން ޕްރޮޖެކްޓަކަށް ބަހާލައިގެން
ހުޅުމާލޭ ފޭސް ޓޫ ގައި ބިދޭސީންނަށް ވަގުތީ ބޯހިޔާވަހިކަން ހޯދައިދިނުމަށް އަޅަމުންދާ ބައެއް ތަންތަން
އެމްޕީއެލް އަދި އެސްޓީއޯގެ އެހީގައި ހުޅުމާލެ ދެވަނަ ފިޔަވަހީގައި ތަރައްޤީކުރަމުން އަންނަ ބިދޭސީންގެ އެކޮމަޑޭޝަން ބްލޮކްތަކުގެ މަސައްކަތް މިމަހުގެ 20 ވަނަ ދުވަހުގެ ނިޔަލަށް ނިންމާލެވޭނެކަމަށް ހުޅުމާލެ ޑިވެލޮޕްމަންޓް ކޯޕަރޭޝަން ( އެޗްޑީސީ) އިން ހާމަކޮށްފި އެވެ.
ކޮވިޑް-19 ރާއްޖޭގައި ފެތުރެމުން ދާއިރު އަދި މި ވައިރަސްގެ ނުރައްކާ ބޮޑު ތޮއްޖެހިގެން ދިރިއުޅޭ ބިދޭސީންނަށް ވަގުތީ ބޯހިޔާވަހިކަން ހޯދައިދިނުމަށް ސަރުކާރުން އަންނަނީ މަސައްކަތް ކުރަމުންނެވެ. އެގޮތުން ބިދޭސީންނަށް އަމާޒުކޮށްގެން ހުޅުމާލެ ފޭސް-2 ގައި އަންނަނީ ވަގުތީ ބޯހިޔާވަހިކަން ދިނުމަށް ތަންތަން ތަރައްޤީ ކުރަމުންނެވެ. އެޗްޑީސީން ވަނީ ހުޅުމާލޭގައި ބިދޭސީންނަށް ބޯހިޔާވަހިކަން ޤާއިމު ކޮށްދިނުމަށް ބޭނުންވާ ފަރާތްތަކަށް އެކަން ކުރުމުގެ ފުރުޞަތު ހުޅުވާލާފަ އެވެ. މިތަންތަން ހަދަމުން އަންނަނީ ސަރުކާރު ހިއްސާވާ ކުންފުނިތަކުންނެވެ.
އެގޮތުން މި މަސައްކަތް ކުރިޔަށް ގެންދަނީ ތިން މަޝްރޫޢަކަށް ބަހާލައިގެން ކަމަށް އެޗްޑީސީން ވަނީ މީގެކުރިން ބުނެފަ އެވެ.
އެސްޓީއޯ ހިޔާ ކުއާޓަރުގައި ނަމުގައި 1292 މީހުންގެ ޖާގައިގެ މިފެސިލިޓީގެ 96 އިންސައްތަ މަސައްކަތް ނިމިފައިވާ ކަމަށް އެޗްޑީސީން ބުނެއެވެ. މިއީ 6 ބިލްޑިންގ ބްލޮކް އާއި 96 ފާޚާނާ ހިމެނޭ ގޮތަށް ހަދާ ފެސިލިޓީއެކެވެ. އަދި މި ފެސިލިޓީގައި 310 މީހުންނަށް އެއްފަހަރާ ބޭނުންކުރެވޭނެ ކެންޓީނެއްވެސް ހިމެނެއެވެ.
މީގެއިތުރުން އެމްޕީއެލުން ތަރައްޤީ ކުރަމުން އަންނަ 1292 މީހުންގެ އެކޮމަޑޭޝަން ބްލޮކްތަކުގެވެސް 96 އިންސައްތަ މަސައްކަތްވަނީ ނިމިފަ އެވެ. މި މަސައްކަތުގެ ދަށުން ޕްރީފެބްރިކޭޓް 6 އެކޮމަޑޭޝަން ބްލޮކާއި، 96 ފާޚާނައާއި 310 މީހުންނަށް އެއްފަހަރާ ބޭނުންކުރެވޭ ކެންޓީނެއް އަންނަނީ ހަދަމުންނެވެ.
މީގެކުރިން އެޗްޑީސީން ވަނީ ބިދޭސީންނަށް ބޯހިޔާވަހިކަން ފޯރުކޮށްދިނުމަށް ހުޅުމާލޭގައި 667 އެނދުގެ ފެސިލިޓީއެއްގެ މަސައްކަތް ނިންމާފަ އެވެ. ބިދޭސީންނަށް ވަގުތީ ބޯހިޔާވަހިކަން ހޯދައިދިނުމަށް ސަރުކާރުން ގުޅީފަޅުގައިވެސް އަންނަނީ އެކޮމަޑޭޝަން ފެސިލިޓީތަކެއް ހަދަމުންނެވެ.
މީގެއިތުރުން ގިނަ ޢަދަދެއްގެ ބިދޭސީން އަންނަނީ އެމީހުންގެ ޤައުމުތަކަށްވެސް ފޮނުވާލަމުންނެވެ.
