ކޮވިޑް-19ށް ޕޮޒިޓިވްވާ މީހުންގެ އާލާމާތްތައް ރަނގަޅުވުމަށްފަހު ޓެސްޓުނުކޮށް ދޫކޮށްލަން ނިންމައިފި
7 ޖޫން 2020 | އާދީއްތަ 07:24ޕީސީއާރް ޓެސްޓުން ވަރަށް ގިނަ ދުވަހު ޕޮޒިޓިވް ކަމަށް ދައްކާ
ހޮނިހިރު ދުވަހުގެރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ މުސްތަފާ ވާހަކަ ދައްކަވަނީ
ކޮވިޑް-19ށް ޕޮޒިޓިވް މީހުންގެ އަލާމާތްތައް ރަނގަޅުމަށްފަހު މަދުވެގެން ތިން ދުވަސްވުމުން ޓެސްޓު ނުހަދާ ދޫކޮށްލާގޮތަކަށް ހަމަޖައްސައިފިއެވެ.
ހޮނިހިރު ދުވަހުގެރޭ ނޭޝަނަލް އިމަޖެންސީ އޮޕަރޭޝަންސް ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ މުސްތަފާ ވިދާޅުވީ މިހާތަނަށް ބަލިން ރަނގަޅުވާ މީހުން ޕީސީއާރް ޓެސްޓު ހަދާ ކަމަށާއި، ދޫކުރަމުން ގެންދިޔައީ ނަތީޖާ ނެގެޓިވްވުމުން ކަމަށެވެ. ނަމަވެސް ޕީސީއާރް ޓެސްޓުން ވަރަށް ގިނަ ދުވަހު ޕޮޒިޓިވް ކަމަށް ނަތީޖާ ދައްކާ ކަމަށް ޑރ. ނަޒްލާ ވިދާޅުވިއެވެ.
ފަހުގެ އާ ދިރާސާތަކަށް އަލިއަޅުއްވާލައްވާ ޑރ. ނަޒްލާ ވިދާޅުވީ ޕީސީއާރް ޕޮޒިޓިވްވުމުގެ މާނައަކީ ވައިރަސް އެކަކުގައިން އަނެކަކު ގަޔަށް ފޯރާފާނެ ކަމެއް ނޫން ކަމަށެވެ.
ޑރ. ނަޒްލާ ވިދާޅުވީ ކޮވިޑް-19ގެ އަލާމާތްތައް ފެނުމުން މަދުވެގެން 14 ދުވަސް މަޑުކުރަންޖެހޭ ކަމަށާއި، އެއްކޮށް އަލާމާތްތައް ރަނގަޅުމަށްފަހު މަދުވެގެން ތިން ދުވަސްވުމަށްފަހު ޓެސްޓު ނުހަދާ ދޫކޮށްލާނެ ކަމަށެވެ. އަދި މިގޮތަށް ދޫކޮށްލެވޭނީވެސް އާދައިގެ ރޯގާއެއްގައި އެހެން ހުންނަ މީހުން ކަމަށް ޑރ. ނަޒްލާ ވިދާޅުވިއެވެ. ނަމަވެސް ބޮޑަށް ބަލިގެން ހޮސްޕިޓަލްގައި އެޑްމިޓް ކުރުމަށްފަހު މަދުވެގެން 21 ދުވަސް ހަމަކުރަންޖެހޭ ކަމަށާއި، 21 ދުވަސްވުމަށްފަހު އަދި އެމީހާ މުޅި ބަލިން ރަނގަޅުވުމަށްފަހުވެސް ތިން ދުވަސް ހަމަވުމުން ނޫނީ ހޮސްޕިޓަލުން ދޫނުކުރާނެ ކަމަށް ޑރ. ނަޒްލާ ވިދާޅުވިއެވެ.
މިހާރު ޕީސީއާރް ޓެސްޓެއް ނުހަދާނެ ކަމަށާއި، ނަމަވެސް ދިފާއީ ނިޒާމް ބަލި ކަށި މީހުންނާއި، ބާރުގަދަ ބޭސްތައްކާ މީހުންގެ ޓެސްޓު ހަދާނެކަން ޑރ. ނަޒްލާ ފާހަގަކުރެއްވިއެވެ.
ޑރ. ނަޒްލާ ވިދާޅުވީ ކޮވިޑް-19ގެ ކަންތައްތަކުގައި އަމަލު ކުރަމުންދަނީ ބޭރުގެ ގައުމުތަކުން އަމަލު ކުރަމުންދާގޮތާއި، ޑަބްލިޔުއެޗްއޯގެ މިންގަނޑާ އެއްގޮތަށް ކަމަށެވެ.
