އެއްގަރާޖެއްގައި ގިނަ އުޅަނދު ރަޖިސްޓްރީކޮށްދިނުމުގައި މިނިސްޓްރީގެ ބައެއް މުވައްޒަފުންގެ ބައިވެރިވުން އަބައޮތް: ނަހުލާ
ބައެއް ގަރާޒުރަކުގައި 200 އާއި 300 އާދެމެދުގެ އަދަދަކަށް ކާރު ރަޖިސްޓްރީ ކޮށްފައިވޭ
ޓްރާންސްޕޯޓް މިނިސްޓަރ އައިޝަތު ނަހުލާ: ކޮރަޕްޝަންގެ އަމަލުތައް ހުއްޓުވުމަށް ހަރުދަނާ އުސޫލްތަކެއް ޤާއިމް ކުރެވިފައިވާކަމަށް މިނިސްޓަރ ވިދާޅުވި
އެއްގަރާޖެއްގައި ގިނަ އުޅަނދު ރަޖިސްޓްރީ ކޮށްދިނުމުގައި ޓްރާންސްޕޯޓް އޮތޯރިޓީގެ ބައެއް މުވައްޒަފުންގެ ބައިވެރިވުން އެބައޮތް ކަމަށް ޓްރާންސްޕޯޓް މިނިސްޓަރ އައިޝަތު ނަހުލާ ވިދާޅުވެއްޖެ އެވެ.
ހުކުރު ދުވަހުގެ ރޭ ބެއްވި ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރުބަލާ ކޮމެޓީގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ނަހުލާ ވިދާޅުވީ ގަރާޖުތަކުގައި މީގެ ކުރިން އޮޅުވާލުންތައް ހިންގާ، ބައެއް ގަރާޖުތަކުގައި 200 އާއި 300 އާއި ދެމެދުގެ ވެހިކަލް ރަޖިސްޓްރީ ކޮށްފައިވާ ކަމަށެވެ.
މިނިސްޓްރީގެ މުވައްޒަފުންގެ ބައިވެރިވުން ނެތި އެކަން ކުރެވޭނެ ކަމަށް ޤަބޫލު ނުކުރައްވާ ކަމަށާއި، ނަމަވެސް އެކަންކަން ނިމުމަކަށް ގެނެސް މިހާރު ހަރުދަނާ އުޞޫލުތަކެއް ޤާއިމު ކުރެވިފައިވާ ކަމަށް މިނިސްޓަރ ވިދާޅުވި އެވެ.
މިނިސްޓަރ ނަހުލާ ވިދާޅުވީ ގިނަ އަދަދެއްގެ އުޅަނދުތައް އެއް ގަރާޖަކަށް ރަޖިސްޓްރީ ކޮށްފައިވާކަން އެނގުން ނަމަވެސް ހުރިހާ އުޅަނދެއް މަގުމަތި ނުކުރެވޭނެ ކަމަށާއި އެކަމަށް އޮތް ޙައްލަކީ އެ އުޅަނދުތައް ޕާކް ކުރާނެ އާ ޖާގަތަކެއް ހޯދައި ދިނުންކަމަށެވެ.
މިކަމާއި ގުޅިގެން ކޮމިޓީގައި ވާހަކަ ދައްކަވަމުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން މިނިސްޓަރުގެ ނައިބު ޝިމާޒް އަލީ ވިދާޅުވީ ގަރާޖް ހުއްދައަކީ ފުރަތަމަ މާލޭސިޓީ ކައުނސިލުން ދޭ ހުއްދައެއް ކަމަށެވެ. އެ ހުއްދަ އިމާރާތުގެ ވެރިފަރާތަށް ލިބުމުން އިމާރާތުގެ ވެރިފަރާތުން 75،000 ނުވަތަ 80،000 ރުފިޔާ އެޑްވާންސަށް ނެގުމަށް ފަހު ކާރު ރަޖިސްޓްރީ ކުރަން ބޭނުންވާ ފަރާތަށް ދޫކޮށްފައިވާ ކަން ފާހަގަ ކުރެވިފައިވާ ކަމަށެވެ.
ނަމަވެސް މިހާރު ޓްރާންސްޕޯޓް މިނިސްޓްރީން ކާރު ރަޖިސްޓްރީކޮށް ދިނުމުގައި ޓްރާންސްޕޯޓް އޮތޯރިޓީގެ އެއްވެސް ކަހަލަ ނާޖާއިޒުކަމެއް އެތެރޭގައި ހިނގާފައި ނުވާނެ ކަމުގެ ޔަޤީންކަން ޝިމާޒް ވަނީ ދެއްވާފަ އެވެ.
މާލޭ ސިޓީކައުންސިލުން އެ ދޫކުރާ ހުއްދައަކީ ރަނގަޅު ހުއްދައެއްތޯ އާއި އެ ހުއްދައިގެ މިނަކީ ރަނގަޅު މިނެއްތޯ ޓްރާންސްޕޯޓް އޮތޯރިޓީގެ މުވައްޒަފުން ގޮސް ބަލާ ގަރާޖް ޗެކް ކުރުމަށްފަހުގައި ނޫނީ މިހާރު ހުއްދަ ނުދޭކަން ޝިމާޒު ފާހަގަ ކުރެއްވި އެވެ. އަދި އެ ގަރާޖަކަށް އެލޮކޭޓް ކުރެވިފައި އޮންނަ ސައިޒަށް ވުރެ އިތުރަށް އެއްވެސް ކާރެއް ރަޖިސްޓްރީ ކުރެވިފައި ނުވާނެކަމުގެ ޔަޤީންކަން ވެސް ޝިމާޒް ވަނީ ދެއްވާފަ އެވެ.
