ޑޯޓްމުންޑުގެ ސަންޗޯ އާއި އަކަންޖީ ޖޫރިމަނާ ކޮށްފި

ނޮވެލް ކޮރޯނާވައިރަސް (ކޮވިޑް-19) އާ ގުޅިގެން ކަނޑައަޅާފައިވާ އުސޫލުތަކާ ޚިލާފުވުމުން ބޮރޫޝިއާ ޑޯޓްމުންޑުގެ ޖޭޑަން ސަންޗޯ އާއި މެނުއެލް އަކަންޖީ ޖޫރިމަނާ ކުރަން ޖަރުމަން ލީގުން ނިންމައިފި އެވެ.

މީގެ ކުރިން ޖަރުމަންގެ ނޫހަކުން ވަނީ ޑޯޓްމުންޑްގެ ހަތަރު ކުޅުންތެރިއަކު ބޯކޮށަން އިން ވަގުތު ފޭސް މާސްކް ނާޅައި އިންދާ ނަގާފައިވާ ފޮޓޯތަކެއް ހިއްސާ ކޮށްފަ އެވެ. އެގޮތުން ޖަރުމަންގެ ސިޓީ އެއް ކަމަށްވާ ޑުސެލްޑޯފް އަށް ނިސްބަތްވާ ބޯކޮށާ މީހަކު، ސަންޗޯ އާއި އަކަންޖީގެ އިތުރުން ޑޭން-އެކްސެލް ޒަގަޑޫ އާއި ރަފައެލް ގުއެރޭރޯގެ ބޯކޮށަން ހުރި ވަގުތު، އެ ހަތަރު ކުޅުންތެރިން މާސްކް ނާޅައި ނަގާފައިވާ ފޮޓޯތަކެއް އެ ނޫހުން ވަނީ ހިއްސާ ކޮށްފަ އެވެ. އަދި ޑޯޓްމުންޑްގެ އިތުރު ދެ ކުޅުންތެރިން ކަމަށްވާ އެކްސެލް ވިޓްސެލް އާއި ތޯގަން ހަޒާޑް ވެސް އެ މީހާއާއެކު ބޯކޮށި ކަމަށް ވަނީ ރިޕޯޓު ކޮށްފަ އެވެ. އެކަމަކު އެ ދެ ކުޅުންތެރިންގެ ފޯޓޯ އެއް ހިއްސާ ކޮށްފައެއް ނުވެއެވެ.

މިކަމާ ގުޅިގެން ޑޯޓްމުންޑުގެ ސްޕޯޓިންގ ޑިރެކްޓަރު ބުނީ ކަނޑައަޅާފައިވާ ގަވާއިދުތަކާ ޚިލާފު ނުވާކަން އެ ހަ ކުޅުންތެރިން ވެސް ކަށަވަރު ކޮށްދީފައިވާ ކަމަށެވެ. އަދި އެ ކުޅުންތެރިން ބޯކޮށި ވަގުތު މާސްކް ނެގީ ހަމައެކަނި ފޮޓޯ އެއް ނެގުމަށް ކަމަށް އޭނާ ވަނީ ބުނެފަ އެވެ.

އެކަމަކު މި މައްސަލައިގައި ޖަރުމަން ލީގުން ވަނީ ސަންޗޯ އާއި އަކަންޖީ ޖޫރިމަނާ ކޮށްފަ އެވެ. އެހެން ނަމަވެސް، އަނެއް ހަތަރު ކުޅުންތެރިންނަށް ފިޔަވަޅު އަޅާފައެއް ނުވެއެވެ.

ޖަރުމަން ލީގުން ނެރުނު ބަޔާނެއްގައި ބުނެފައި ވަނީ ކޮންމެ ކުޅުންތެރިއަކު ވެސް ބޯކޮށަން ޖެހޭނެ ކަމަށާއި، އެކަމަކު މި ދަނޑިވަޅުގައި އެކަންކަން ކުރަން ވާނީ ކަނޑައަޅާފައިވާ އުސޫލުތަކާ އެއްގޮތްވާ ގޮތުގެ މަތިން ކަމަށެވެ.

އެކަމަށް ރައްދު ދެމުން ސަންޗޯ ބުނީ ބޯކޮށި އިރު މާސްކް ނާޅައި އިނދެ ނަގާފައިވާ ފޮޓޮއެއް ދައުރުވުމުން، އޭނާ ޖޫރިމަނާ ކުރުމަކީ ބޮޑު ޖޯކެއް ކަމަށެވެ.

ކޮވިޑް-19 އާ ގުޅިގެން މިދިޔަ މެއި މަހުގެ ތެރޭގައި ޖަރުމަން ލީގުގެ ކުޅުން އަލުން ފަށާފައިވާއިރު، ލީގު ކުރިއަށްދަނީ ހާއްސަ އުސޫލުތަކެއްގެ ދަށުންނެވެ. އެގޮތުން ކްލަބުތަކުންނާއި ކުޅުންތެރިންވެސް އަމަލުކުރަންޖެހޭ ހާއްސަ ގަވާއިދުތަކެއް ވަނީ ކަނޑައަޅާފަ އެވެ.