ވަކި ވިޔަފާރިތަކަށް 4000 ށް ވުރެ ގިނަ ހުއްދަ ދޫކޮށްފައިވާ ކަމަށް އެސިސްޓެންޓް ކޮމިޝަނަރ އޮފް ޕޮލިސް އިސްމާއިލް ނަވީން ވިދާޅުވެއްޖެ އެވެ.

ބުރާސްފަތި ދުވަހުގެ ރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ނަވީން ވިދާޅުވީ، ބުދަ ދުވަހުގެ ރެއިން ފެށިގެން ބުރާސްފަތި ދުވަހުގެ ރޭގެ ނިޔަލަށް 1380 ބިޒްނަޒް ޕަރމިޓް ދޫކޮށްފައިވާ ކަމަށެވެ. އަދި އެ ވިޔަފާރިތަކުގެ 3534 ސަޕޯޓިން ސްޓާފުންނަށް ޕާމިޓް ދޫކޮށްފައިވާ ކަމަށެވެ. މީގެއިތުރުން، ޑެލިވަރީ ކުރުމަށް ފުލުހުންވަނީ 9739 ޕަރމިޓް ދޫކޮށްފަ އެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ރެޖިސްޓްރަރ އޮފް ކޮމްޕެނީސް މަރިޔަމް ވިސާމް ވިދާޅުވީ، ބިޒްނަސް ޕާމިޓަށް ފުލުހުންގެ ޕޯޓަލްގައި އެދެން ބަދަލުކުރަން ނިންމީ ކޮވިޑް-19 ޓާސްކުފޯހުން ކަމަށެވެ. މީގެ ކުރިން ބިޒްނަސް ޕަރމިޓަށް އެދި ނުލިބި ތިބި ފަރާތްތައް މިހާރު ހުއްދަ އެދެން ޖެހޭނީ، ފުލުހުން ގާއިމްކޮށްފައިވާ ޕޯޓަލް ގައެވެ.

ވިޔަފާރީގެ ހުއްދަތައް ދޫކުރުމުގެ ހިދުމަތް ފުލުހުންގެ ޕޯޓަލް މެދުވެރިކޮށް ކުރިއަށްގެންދާގޮތަށް ހަމަޖައްސާފައިވަނީ، މާލެ ސިޓީ ކައުންސިލްގެ ޕޯޓަލް މެދުވެރިކޮށް އެ ހިދުމަތް ދެމުން ގެންދަނިކޮށެވެ.