މާލެ ސަރަހައްދުގައި 7700 ހައުސިންގް ޔުނިޓުގެ ބިންގާއެޅި މޯބިލައިޒް ކުރެވިގެންދާނެ
ހައުސިންގް މިނިސްޓަރ އައިމިނަތު އާތިފާ، ރައްޔިތުންގެ މަޖިލީހުގެ ކޮމެޓީގައި
ރާއްޖޭގެ ބޯޑަރު ހުޅުވާލުމާއިއެކު 1700 ހައުސިންގް ޔުނިޓުގެ ބިންގާއެޅި، މޯބިލައިޒް ކުރެވިގެންދާނެކަމަށް ހައުސިންގް މިނިސްޓަރ އައިމިނަތު އާތިފާާ ވިދާޅުވެއްޖެއެވެ.
ބުރާސްފަތި ދުވަހު އޮންލައިންކޮށް ބޭއްވި ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮޮމިޓީގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރ ވިދާޅުވީ މާލެ ސަރަހައްދުގައި 7700 ހައުސިންގް ޔުނިޓުގެ ބިންގާއެޅި މޯބިލައިޒް ކުރެވިގެންދާނެ ކަމަށެވެ.
އިތުރަށް ތަފްސީލުކޮށްދެއްވަމުން މިނިސްޓަރ ވިދާޅުވީ މާލެ ފުރަބަންދުކުރެވުނު ހަފްތާގައި 1700 ހައުސިންގް ޔުނިޓުގެ ބިންގާ އެޅިފައިވާކަމަށާއި އަދި އިތުރު 2000 ހައުސިންގް ޔުނިޓުގެ އެގްރީމެންޓުގައި ސޮއި ކޮށްފައިވާކަމަށެވެ. މީގެއިތުރުން، ހުޅުމާލެގައި ހުރި 4000 ހައުސިންގް ޔުނިޓާއި ގުޅިގެން މިނިސްޓަރ ވިދާޅުވީ މިހަފްތާގެ ތެރޭގައި އެގްޒިމް ބޭންކްގެ އެޕްރޫވަލްތައް ލިބިގެންދާނެ ކަމަށެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެފައިވަނީ މީގެ ކުރިން ހެދިފައިވާ އެސެސްމެންޓްތަކުން ދައްކާ ގޮތުން 20،000 އާއިލާއަށް ބޯހިޔާވަހިކަން ބޭނުންވެފައިވާ ކަމަށެވެ. އެހެންކަމުން އެހުރިހާ އެންމެނަށް ބޯހިޔާވަހިކަން ފޯރުކޮށްދިނުމަކީ އެމަނިކުފާނުގެ ރިޔާސީ ވަޢުދުފުޅެކެވެ.
