ޖޯޖް ފްލޮއިޑްގެ މަރުގެ މައްސަލާގައި ފުލުސް މީހާގެ މައްޗަށް ކުރާ ދައުވާ ބަދަލުކޮށްފި

ޖޯޖް ފްލޮއިޑްގެ މަރުގެ މައްސަލާގައި ފުލުސް މީހާގެ މައްޗަށް ކުރާ ދައުވާ ބަދަލުކޮށްފިއެވެ.

ފުލުސް މީހާގެ މައްޗަށް ފުރަތަމަ ކޮށްފައިވަނީ ތާޑް ޑިގްރީގެ މަރޑާއެވެ. ނަމަވެސް މިހާރު ވަނީ ސެކަންޑް ޑިގްރީ މަރޑާގެ ދައުވާ އުފުލާފައެވެ.

މީޑިއާގެ ރިޕޯޓުތައް ބުނާ ގޮތުން ފްލޮއިޑް މަރާލިކަމަށް ބުނާ ޕޮލިސް އޮފިސަރު ޑެރަކް ޗޯވިން މައްޗަށް ވަނީ ސެކަންޑް ޑިގްރީ މާރޑާގެ ދައުވާ އުފުލާފައެވެ. އަދި ބާކީ ތިބި އޮފިސަރުންނަށް އޭނާ މަރާލުމުގައި އެހީތެރިވި ކަމުގެ ދައުވާ އުފުލާފައިވެއެވެ.

މިނެސޯޓާގެ ސެނެޓަރ އޭމީ ކްލޯބިއުޗަރ ކޮށްފައިވާ ޓްވީޓެއްގައި ވިދާޅުވެފައިވަނީ ޖޯޖް ފްލޮއިޑްގެ މަރުގެ މައްސަލާގައި ޝާމިލްވާ ހުރިހާ އެންމެންގެ ދައުވާ ބޮޑުކޮށް އެމީހުންނާ މެދު އެކަށީގެންވާ އަދަބު ދިނުމަށް ނިންމާފައިވާ ކަމަށެވެ.

ޖޯޖް ފްލޮއިޑްގެ އާއިލާއިން ބުނެފައިވަނީ މިމަރުގައި ޝާމިލްވާ ހުރިހާ ފުލުހުންނަށް ކުރަން ޖެހޭނީ ފަސްޓް ޑިގްރީ މަރޑާގެ ދައުވާ ކަމަށެވެ.

މައްސަލަ އިތުރަށް ތަހުގީގު ކުރަމުންދާތީ އެމީހުންގެ މައްޗަށް ކުރާ ދައުވާ ބަދަލުވުމުގެ ފުރުސަތު އަދިވެސް އެބައޮތް ކަމަށް ފުލުހުންނާ ހަވާލާދީ ރިޕޯޓު ކޮށްފައިވެއެވެ.

ޖޯޖް ފްލޮއިޑްގެ މަރުގެ މި ހާދިސާ ހިނގައިދިޔައީ އެމެރިކާގެ މިނިއާޕޮލިސް ގައެވެ. މަންޒަރު ބަލަން ހުރި މީހަކު ސޯޝަލް މީޑިއާގައި ހާމަ ކޮށްފައިވާ ވީޑިއޯއަކުން، ދޮން ނަސްލުގެ ފުލުހަކު، ޑެރެކް ޝޯވިން، ފްލޮއިޑް ގެ ކަނދުރާ އަށް ކަކުލުން އަރާފައިވާ މަންޒަރު ފެނެ އެވެ. އަދި އޭނާ ބިންމަތީގައި އޮވެގެން ނޭވާ ނުލެވިގެން، އަހަަންނަކަށް ނޭވާ ނުލެވެޔޭ ބުނާ އަޑު ދެތިން ފަހަރަކު އިިވެ އެވެ. ރިޕޯޓުތައް ބުނާ ގޮތުގައި އޭނާ މަރުވެފައިވަނީ ފުލުސް މީހާގެ މި އަމަލުގެ ސަބަބުން ނޭވާ ހާސްވެގެންނެވެ.

މަންޒަރު ބަލަން ތިބި މީހުން ފްލޮއިޑް އަށް ނޭވާ ނުލެވޭ ކަމަށް ބުނުމުން ވެސް، ފުލުސް މީހާ އަޅާ ވެސް ނުލައެވެ. ފްލޮއިޑް ނޭވާ ހާސްވެގެން އާދޭސް ކުރިއިރު، އޭނާ އޮތީ އަނގަވަތަށް، ފަހަތަށް ބިޑި އަޅުވާފަ އެވެ. އެތަނުން އެމްބިއުލާންސެއްގައި ހޮސްޕިޓަލަށް ގެންދިޔަ އިރުވެސް، ފްލޮއިޑް މަރުވެފައިވާ ކަމަށް ޑޮކްޓަރުން ވަނީ ހާމަކޮށްފައެވެ.

ނަސްލީ ތަފާތު ކުރުން ބޮޑު އެމެރިކާގައި ފުލުހުން، ކަޅު ނަސްލުގެ މީހުންނާ މެދު ތަފާތު ކުރުން ގެންގުޅުން އަނެއްކާ ވެސް މިވަނީ އިތުރުވާން ފަށާފަ އެވެ. އަދި މިކަމުން ހިތްވަރު ލިބިގެން މިފަދަ އަމަލުތައް އާންމުންގެ ތެރޭގައި ހިންގާ މިންވަރުވެސް ދަނީ އިތުރުވަމުންނެވެ.