އިތުރު 9 މީހަކު ޕޮޒިޓިވްވެ ޖުމްލަ އަދަދު 1850ށް، ރިކަވަރވި މީހުންގެ އަދަދު 644ށް
މިހާތަނަށް 27،329 ސާމްޕަލެއް ނެގިފައިވޭ
ރާއްޖެއިން ފެންނަމުންދާ ކޭސްތަކާ ގުޅިގެން ސާމްޕަލް ނެގުމާއި ކޮންޓެކްޓް ޓްރޭސިން ކުރިއަށްދޭ
ރާއްޖެއިން އިތުރު 9 މީހުން ކޮވީޑް-19 އަށް ޕޮޒިޓިވްވެއްޖެ އެވެ.
ބުދަ ދުވަހު ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ކުރި ޓްވީޓެއްގައި ބުނީ، ރާއްޖެއިން އިތުރު 9 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށެވެ. އޭގެ ތެރޭގައި ހިމެނެނީ 7 ދިވެހިންނާއި، ބަނގްލަދޭޝް އަށް ނިސްބަތްވާ 2 މީހެއް ކަމަށް އެޗްޕީއޭއިން ބުނެ އެވެ. އެއާއެކު ރާއްޖެއިން ޕޮޒިޓިވްވި މީހުންގެ ޖުމުލަ އަދަދު ވަނީ 1850ށް އަރާފަ އެވެ.
އެޗްޕީއޭއިން ބުނީ، މިހާތަނަށް 27،329 ސާމްޕަލެއް ނެގިފައިވާ ކަމަށާއި، އޭގެ ތެރޭގައި ރިޕީޓްކޮށް ނަގާފައިވާ ސާމްޕަލްތައް ވެސް ހިމެނޭ ކަމަށެވެ.
އޭގެ އިތުރުން، މިހާރުވެސް 1248 މީހުން އައިސޮލޭޝަން ފެސިލިޓީތަކުގައި އެބަތިބި ކަމަށާއި، ކަރަންޓީން ފެސިލިޓީ ތަކުގައި 1484 މީހުން ތިބިކަމަށް އެޗްޕީއޭއިން މައުލޫމާތު ދެއެވެ.
ރާއްޖެއިން ކޮވިޑް-19 ޖެހިގެން ރަނގަޅުވި މީހުންގެ ޖުމުލަ އަދަދު ވަނީ 644ށް އަރާފައެވެ. އަދި 7 މީހަކު ވައިރަސް ޖެހިގެން މަރުވެފައި ވެއެވެ.
