ބޭރުގައި ތާށިވި ދިވެހިން ގެނައުމުގެ އުސޫލާއި، ޖަލުތަކުގެ ހާލަތު އަދި ތިލަފުށީގައި ހިނގައިދިޔަ ހަމަނުޖެހުމުގެ މައުލޫމާތު މަޖިލީހުން ސާފު ކުރަނީ
3 ޖޫން 2020 | ބުދަ 13:47ކޮވިޑް-19 އާއި ގުޅިގެން ޖަލުތަކުގެ ހާލަތު ސާފުކުރުމަށް ވަނީ ހުށަހަޅާފައި
ރައްޔިތުންގެ މަޖިލީހުގެ ގައުމީ ސަލާމަތާއި ހާރިޖީ ގުޅުންތަކުގެ ކޮމިޓީގެ ބައްދަލުވުމެއްގެ ތެރެއިން؛ ބޭރުގައި ހާލުގައި ޖެހުނު ދިވެއްސެއްގެ މައްސަލަ ސާފުކުރަން ކޮމިޓީން ވަނީ ނިންމާފައި
ކޮވިޑް-19 އާއި ގުޅިގެން ޖަލުތަކުގެ ހާލަތާއި، ބޭރުގައި ތާށިވެފައި ތިބި ދިވެހިން ނާދެވި ތިބި މައްސަލައިގެ އިތުރުން ތިލަފުށީގައި ހިނގައިދިޔަ ހާދިސާގެ މައްސަލަ ސާފުކުރަން ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ނިންމައިފި އެވެ.
ބުދަ ދުވަހު ބޭއްވި ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީން ބޭއްވި ބައްދަލުވުމުގައި އެ ކޮމިޓީގައި ހިމެނިވަޑައިގަންނަވާ މެންބަރުން ވަނީ ކޮވިޑް-19 އާއި ގުޅިގެން ފާހަގަކުރެވުނު މައްސަލަތަކުގެ އިތުރުން ތިލަފުށީގައި ބިދޭސީންނާއި ފުލުހުންނާއި ކުރިމަތިލާން ޖެހުނު މައްސަލައިގެ ތަފުސީލު ހޯދުމަށް އެދިވަޑައިގެންފަ އެވެ.
ކޮވިޑް-19 އާއި ގުޅިގެން ބޭރު ގައުމުތަކުގައި ތާށިވި ދިވެހިން ނުގެނެވި ލަސްވާ މައްސަލައާއި ސަރުކާރުން އެހީތެރިކަން ފޯރުކޮށްދޭ އުސޫލު އަދި ދިވެހިން ގެނައުމަށް ކުރަމުންދާ މައްސަލަ ސާފުކޮށްދެއްވުމަށް މެންބަރުން ވަނީ އެދިވަޑައިގެންފަ އެވެ. މީގެ ތެރެއިން މައްޗަންގޯޅީ ދެކުނު ދާއިރާގެ މެންބަރު އަހުމަދު ހައިތަމް ވަނީ އިންޑޮނޭޝިއާގައި ތާށިވެ ހާލުގައި ޖެހުނު ދިވެއްސެއްގެ މައްސަލަ ބަލައިދިނުމަށް ވެސް ހުށަހަޅުއްވާފަ އެވެ.
މެންބަރު ހައިތަމް ހުށަހެޅުއްވި މައްސަލައިގައި ވިދާޅުވީ އިންޑޮނޭޝިއާއިން ރާއްޖެއަށް މީހުން ގެނައުމުގެ ވާހަކައަކީ ކުރިން ވެސް ދެކެވެމުންއައި ވާހަކައަކަށް ވާތީ އެންމެ ފަހުވަގުތާ ހަމައަށް ވަގުތު ކައިރިވެފައި އޮއްވާ މިހުން އެއްތަނުން އަނެއްތަނަށް ގެންދިއުމަށް ލަސްވުމުން އެކަން ނުކުރެވޭނެކަމަށް ގަބޫލުކުރައްވާ ކަމަށެވެ. އަދި ދުރާލާ އެކަމާ އުޅުއްވި ނަމަ ކޮންމެވެސް ގޮތެއް ފެނިވަޑައިގަންނަވާނެ ކަމަށާއި، އެންމެ ފަހު ވަގުތު އެކަން ކުރައްވަން އުޅުއްވިކަމަށް މައުލޫމާތު ލިބިވަޑައިގެންފައިވާ ކަމަށެވެ. އަދި ކުރީ ބައިގައި އިންޑޮނޭޝިއާގައި ތާށިވެ ހާލުގައި ޖެހުނު ދިވެހި މީހާއަށް އަޅާލެވުނު ނަމަ އެކަން އެގޮތަށް ނުވީސް ކަމަށް ހައިތަމް ވިދާޅުވި އެވެ.
މިކަމާއި ގުޅިގެން ގައުމީ ސަލާމަތާއި ޚާރިޖީ ގުޅުންތަކުގެ ކޮމިޓީގެ މުގައްރިރު، މަރަދޫ ދާއިރާގެ މެންބަރު އިބްރާހިމް ޝަރީފް ވިދާޅުވީ އިންޑޮނޭޝިއާ ލޮކްޑައުންކޮށްފައި އޮތުމުން ބާލީން ޖަކާޓާއަށް އެމީހާއަށް ނާދެވުނު ކަމަށާއި، އިންޑޮނޭޝިއާއިން ރާއްޖެ އައި ފުލައިޓުގައި ދެން އައި ދިވެހިންނަކީ އެމްއޭސީއެލްގެ މުވައްޒަފުން ކަމަށާއި، އެމީހުން އައީ ކުންފުނިން ޓިކެޓް ހަމަޖައްސައިގެން ކަމަށެވެ.
ބައްދަލުވުން ނިންމަވާލައްވަމުން ޝަރީފް ވަނީ މެންބަރުން ހުށަހެޅުއްވި ކަންކަން ކަމާބެހޭ ފަރާތްތަކުން ސާފުކުރައްވާނެ ކަމަށާއި، އެގޮތުން ކޮވިޑް-19 އާއި ގުޅިގެން ޖަލުތަކާއި ބެހޭ މައުލޫމާތު ސާފުކުރުމަށާއި، ބޭރު މީހުންނާއި ފުލުހުންނާއި ކުރިމަތިލުމުގެ މައްސަލައިގެ އިތުރުން ސްރީލަންކާގައި ހާލުގައި ޖެހިފައިތިބި މީހުންނާއި އިންޑޮނޭޝިއާގެ ބާލީގައި ހުރި މީހާގެ މައުލޫމާތު ސާފުކުރުމަށް ހުށަހަޅުއްވާނެ ކަމަށެވެ.
މީގެ އިތުރުން ބެރުން ދިވެހިން ގެނައުމުގެ ކަންކަމުގައި ފޮރިން މިނިސްޓްރީން މައުލޫމާތު ސާފުކުރައްވާ އިރު، ސަރުކާރުގެ ސިޔަސަތާއި ކަންތައްތައް ކުރައްވާ ގޮތުގެ އިތުރުން ސަރުކާރުން ގެންގުޅުއްވާ އުސޫލު ސާފުކުރައްވާނެ ކަމަށެވެ.
