ހަމަނުޖެހުމާއި ގުޅިގެން 7 ބިދޭސީއަކު ހައްޔަރުކޮށްފައިވޭ: ފުލުހުން
3 ޖޫން 2020 | ބުދަ 02:39ހަމަނުޖެހުން ހިނގާފައިވަނީ ބިދޭސީންނާއި އެމީހުންގެ ސްޕޮންސާރ އާއި ދެމެދު
ތިލަފުށީގައި ހިންގި ހަމަނުޖެހުމުގެ ތެރެއިން
ކ. ތިލަފުށީގައި އަންގާރަ ދުވަހު ހަމަނުޖެހުން ހިނގާފައިވަނީ ބިދޭސީންނާއި އެމީހުންގެ ސްޕޮންސާރ އާއި ދެމެދު ކަމަށް ފުލުހުން ބުނެފިއެވެ.
ފުލުހުން ބުނީ ތިލަފުށީގައި ގިނަ އަދަދެއްގެ ބިދޭސީންނާއި އެމީހުންގެ ސްޕޮންސާރ އާއި ދެމެދު ހިނގި ހިތްހަމަނުޖެހުމެއްގައި ސްޕޮންސަރގެ ގޯޑައުންއަށް ގެއްލުންދޭ މައްސަލަ އަންގާރަ ދުވަހު މެންދުރުފަހުގެ ވަގުތެއްގައި ފުލުހުންނަށް ހުށަހެޅިފައިވާ ކަމަށެވެ. މި މައްސަލައާއި ގުޅިގެން ސީންއަށް ދިޔަ ފުލުހުންނަށް ހަމަނުޖެހުން ހިންގަމުންދިޔަ ބިދޭސީންގެ ތެރެއިން ބަޔަކު ހަމަލާދީފައިވާ ކަމަށާއި މި ހަމަލާގައި ދެ ފުލުހަކަށް އެކިވަރުގެ އަނިޔާވެފައިވާ ކަމަށް ފުލުހުން ބުންޏެވެ.
މި ހަމަނުޖެހުންތަކާއި ގުޅިގެން ސްޕެޝަލް އޮޕްރޭޝަންސްގެ ފުލުހުން އަންގާރަ ދުވަހު ހަވީރު 4:30 ހާއިރު ތިލަފުއްޓަށް ގޮސްފައިވާ ކަމަށް ފުލުހުން މައުލޫމާތު ދެއެވެ. އަދި 133 ބިދޭސީއަކު ވަގުތީގޮތުން ހުއްޓުވާފައިވާ ކަމަށާއި އެމީހުންގެ ތެރެއިން ފުލުހުންގެ ބެލުމުގެ ދަށުގައި މިހާރު ތިބީ ހަތް ބިދޭސީން ކަމަށް ފުލުހުން ބުންޏެވެ.
އެމީހުންގެ ތެރޭގައި ހިމެނެނީ އިންޑިއާއަށް ނިސްބަތްވާ ފިރިހެނުން ކަމަށް ފުލުހުން ބުންޏެވެ.
މި މައްސަލަ ފުލުހުން ދަނީ އިތުރަށް ތަހުޤީގު ކުރަމުންނެވެ.
