ރާއްޖެއިން އިތުރު 12 މީހުން ކޮވިޑް-19 އަށް ޕޮޒިޓިވްވެއްޖެ އެވެ.

އަންގާރަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ޓާސްކްފޯސް ގެ ތަރުޖަމާނު މަބްރޫކު އަޒީޒް ވިދާޅުވީ، ރާއްޖެއިން އިތުރު 12 މީހުން ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭގެ ތެރޭގައި ހިމެނެނީ 11 ދިވެހިންނާއި ބިދޭސީއެއް ކަމަށެވެ.

މަބްރޫކު ވިދާޅުވީ، އޭގެ ތެރޭގައި ހިމެނޭ 7 ދިވެހިންނަކީ ކުރިންވެސް ފާހަގަވި ކްލަސްޓަރތަކާ ގުޅުންހުރި ބައެއް ކަމަށެވެ. އަދި ބާކީ ތިބި 4 ދިވެހިން ކްލަސްޓަރއަކާ ގުޅުމެއް ނެތް ކަމަށާއި، އެހެން ނަމަވެސް ބިދޭސީ މީހާ އަކީ ކުރީގެ ކްލަސްޓަރއަކާ ގުޅުންހުރި މީހެއްކަން މަބްރޫކު ފާހަގަ ކުރެއްވި އެވެ.

އޭގެ އިތުރުން، އެ 12 މީހުންގެ ތެރެއިން 5 ދިވެހިންނަކީ އިތުރު ބަލިތައް ތަޙައްމަލު ކުރަމުންދާ މީހުންކަން ފާހަގަ ކުރައްވައި މަބްރޫކު ވިދާޅުވީ، އެއީ ބަލި ޙާލަތު ގޯސް ވުމުގެ ފުރުޞަތު ބޮޑު މީހުން ކަމަށެވެ. އަދި މިހާރު ރާއްޖެއިން ޕޮޒިޓިވްވީ މީހުންގެ ތެރެއިން ޖުމުލަ 67 މީހުންނަކީ އެގޮތަށް އިތުރު ބަލިތައް ތަޙައްމަލު ކުރަމުންދާ މީހުންކަން މަބްރޫކު ފާހަގަ ކުރެއްވި އެވެ.

އެއާއެކު ރާއްޖެއިން ޕޮޒިޓިވްވީ މީހުންގެ ޖުމުލަ އަދަދު ވަނީ 1841ށް އަރާފައިވާކަމަށް ހެލްތު ޕްރޮޓެކްޝަން އޭޖެންސީން ކުރި ޓްވީޓެއްގައި ބުނެފައިވެ އެވެ.