ތަރިކައާއި ބެހޭ ގަވާއިދު ގެޒެޓްކުރުން: ހެރިޓޭޖް ޓްރަސްޓް ފަންޑް ބޯޑަކާއި ކޮމެޓީއެއް އުފެއްދުން ހިމެނޭ
2 ޖޫން 2020 | އަންގާރަ 09:34ވަޒީރުގެ ލަފާގެ މަތިން، މަރުކަޒުގެ އިސްވެރިޔާ، 7 އަށްވުރެ މަދުނޫން، އޮނަހިރު އަދަދެއްގެ މެމްބަރުންގެ މައްޗަށް ކޮމެޓީއެއް
ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ޠާރިޤް - ތަރިކަ ރައްކާތެރި ކުރުމުގެ ގަވާއިދު މވަނީ ގެޒެޓް ކޮށްފައި
ދިވެހިރާއްޖޭގެ ސަގާފީ ތަރިކައިގެ ގާނޫނުގެ 56 ވަނަ މާއްދާގެ (ހ)ގެ ދަށުން އެކުލަވާލަންޖެހޭ ގަވާއިދު "ދިވެހިރާއްޖޭގެ ސަގާފީ ތަރިކަ ރައްކައުތެރި ކުރުމުގެ ގަވާއިދު" އެކުލަވާލައި، ސަރުކާރުގެ ގެޒެޓްގައި ޝާއިއުކޮށްފި އެވެ.
މި ގަވާއިދުގައި ބުނާގޮތުން، ވަޒީރުގެ ލަފާގެމަތިން، މަރުކަޒުގެ އިސްވެރިޔާ، 7 އަށްވުރެ މަދުނޫން، އޮނަހިރު އަދަދެއްގެ މެމްބަރުންގެ މައްޗަށް ކޮމެޓީއެއް އުފައްދަން ޖެހެ އެވެ. އަދި އެކޮމެޓީގެ ރިޔާސަތު ބަލަަހައްޓާނީ މަރުކަޒުގެ އިސްވެރިޔާ އެވެ.
އެކޮމެޓީގެ މަސްއޫލިއްޔަތުތަކުގެ ތެރޭގައި، ސަގާފީ ތަރިކަ ގިންތިކުރުމާއި، ފާހަގަކުރެވޭ ސަގާފީ އަގު ކުރުމާއި، ހިމާޔަތް ކުރެވިފައިވާ ސަރަހައްދު ކަނޑައެޅުން އަދި ސަގާފީ ތަރިކައެއް ދަފްތަރުން އުނިކުރުމާއި ކޮމެޓީއަށް ހުށަހެޅޭ މައްސަލަތައް ބަލައި ފިޔަވަޅު އެޅުންފަދަ މުހިއްމު ކަންކަން ހިމެނެ އެވެ.
އެގަވާއިދުގައި އެންމެ މުހިއްމު ކަމެއްގެ ގޮތުގައި، ދިވެހިރާއްޖޭގެ ސަގާފީ ތަރިކައިގެ ގާނޫނުގެ 18 ވަނަ މާއްދާގެ ދަށުން އުފައްދާފައިވާ، "ހެރިޓޭޖް ޓްރަސްޓް ފަންޑް" މި ގަވާއިދުގައިވާ ގޮތުގެ މަތިން ހިންގުމަށް އެކުލަވާލަންޖެހެ އެވެ. ހެރިޓޭޖް ޓްރަސްޓް ފަންޑުގެ ބޯޑު އެކުލެވިގެންވަނީ 9 މެމްބަރުންގެ މައްޗަށެވެ.
ހެރިޓޭޖް ޓްރަސްޓް ފަަންޑް ބޯޑުގެ ޗެއަރޕާސަނަކީ ސަގާފީ ތަރިކައިގެ ކަންކަމަށް ޒިންމާވާ ވުޒާރާގެ ވަޒީރެވެ. އަދި އެވުޒާރާގެ ދެ މެމްބަރުން އެކޮމެޓީއަށް ވަޒީރަށް އައްޔަން ކުރެވޭއިރު، ދެން ހިމެނެނީ، މާލީ، ފަތުރުވެރިކަން، ތިމާވެށި، ތައުލީމް، ދީނީ، މިއިން ކޮންމެ ކަމަކަށް ޒިންމާވާ ވުޒާރާއިން ކަނޑައަޅާ މެމްބަރެއްގެ އިތުރުން ލޯކަލް ގަވަރުމަންޓް އޮތޯރިޓީން ކަނޑައަޅާ މެމްބަރެކެވެ.
ހެރިޓޭޖް ޓްރަސްޓް ފަންޑް ބޯޑުގެ މަސްއޫލިއްޔަތަކީ، ޓްރަސްޓް ސްޓޭޓްމަންޓުގައި ބަޔާންކޮށްފައިވާ ގޮތުގެ މަތިން ފަންޑުން ޚަރަދު ކުރުމުގެ ހުއްދަ ދިނުމާއި، ކޮންމެ މީލާދީ އަހަރެއް ނިމޭތާ 2 މަސް ދުވަހުގެ ތެރޭގައި ފާއިތުވި އަހަރުގެ އަހަރީ ރިޕޯޓް ތައްޔާރުކޮށް، އަދި ކޮންމެ މާލީ އަހަރެއް ނިމޭތާ 2 މަސްދުވަހުގެ ތެރޭގައި މާލީ ބަޔާން ތައްޔާރުކޮށްފައި ވަޒީރަށް ހުށަހެޅުމެވެ.
ހެރިޓޭޖް ޓްރަސްޓް ފަންޑުގެ ފައިސާ ބޭނުންކުރާނެ ގޮތުގެ ތަފްސީލްތަކާއި އަދި މިނޫންވެސް، ދިވެހިރާއްޖޭގެ ސަގާފީ ތަރިކަ ރައްކާތެރި ކުރުމާ ގުޅޭ ގިނަ ކަންތައްތަކެއް މިގަވާއިދުގައި ވެއެވެ.
