ރާއްޖެއިން އިތުރު 56 މީހަކު ކޮވިޑް-19 އަށް ޕޮޒިޓިވް ވެއްޖެ
ސާމްޕަލް ނެގުމާއި، ކޮންޓެކްޓް ޓްރޭސިންގެ މަސައްކަތްތައް ކުރިއަށްދޭ
ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވަނީ އިތުރު ކޭސްތަކެއް ޕޮޒިޓިވްވެފައިވާކަން އިއުލާނު ކުރައްވާފައި
ރާއްޖެއިން އިތުރު 56 މީހަކު ކޮވިޑް-19 އަށް ޕޮޒިޓިވް ވެއްޖެ އެވެ.
ހޯމަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ރާއްޖެއިން އިތުރު 56 މީހަކު ކޮވިޑް-19 އަށް ޕޮޒިޓިވް ވެފައިވާ ކަމަށާއި، އަދިވެސް ބައެއް ސާމްޕަލް ތަކުގެ ނަތީޖާ ޕެންޑިންގ ގައި ވާ ކަމަށެވެ.
މަބްރޫކް ވިދާޅުވީ، އޭގެ ތެރޭގައި ހިމެނެނީ 27 ދިވެހިންނާއި، 29 ބިދޭސީން ކަމަށް މަބްރޫކު ވިދާޅުވި އެވެ.
އެއާއެކު 1333 އެކްޓިވް ކޭސް ފާހަގަވެފައިވާ ކަމަށާއި، ބަލިން ރަނގަޅުވި މީހުންގެ އަދަދަކީ 488 ކަމަށް މަބްރޫކު ވިދާޅުވި އެވެ. އަދި ރާއްޖެއިން ޕޮޒިޓިވް ޖުމުލަ އަދަދަކީ 1829 އެވެ.
ރާއްޖެއިން މިހާތަނަށް ފެނިފައިވާ ޕޮޒިޓިވް ކޭސްތަކާއި ގުޅިގެން ސާމްޕަލް ނެގުމާއި، ކޮންޓެކްޓް ޓްރޭސިންގެ މަސައްކަތްތައް އަދިވެސް ކުރިއަށް ދާއިރު، ކޮވިޑް-19 އާ ގުޅިގެން އިޢުލާނު ކޮށްފައިވާ ސިއްޙީ ކުއްލި ނުރައްކަލުގެ ޙާލަތުގެ މުއްދަތުވެސް ވަނީ އިތުރުކޮށްފަ އެވެ.
